［科幻有甜］《一場末日危機，令患上中二病的我變成救世者》18+: 第六十章：拯救行動

「一言驚醒夢中人！我記得喺一間廢置咗好耐嘅回收工場見過跟老洞相同款式嘅生物打印機。事不宜遲，我哋馬上去！」但當我講完呢句之後，我馬上感到後悔，事關我嚮嗰度殺咗上戶彩，雖然上戶彩事後死而復生，但佢之後命途坎坷嘅遭遇都係由嗰次事件引起。
「唔緊要，我哋一齊去，依家救人要緊！」正當我心情沉重嘅時候，上戶彩居然完全放下成見，對我哋之前嘅恩怨完全唔在乎。

就係咁，我哋三個一齊趕去回收工場，去到嗰度，竟然俾我見到比我哋三個早一步抵達嘅彼得。
「彼得兄，能夠見返你冇事就好！」見到彼得仍然在生，我內心好似舒服咗啲，畢竟十二使徒就只剩返佢同菲臘兩個。雖然彼得冇望我，但至少話俾我哋知，佢中咗撒旦嘅調虎離山計，當佢追到去出面好遠嘅地方先知道中計，返嚟至發現彌賽亞同馬太已經氣絕身亡，而老洞嘅生物打印機連同數據網絡亦已遭到破壞，佢立即根據潛伏者守則，檢查連接住生物數據網絡嘅其他後備打印機，希望可以將死去嘅成員逐一復活。
「彼得，情況如何？可以救返佢哋嘛？」向彼得表露臥底身份嘅菲臘好緊張咁問。
「唔知咩事，成個生物數據網絡都搵唔到佢哋嘅備份，就好似被人刻意刪走晒啲資料咁，我懷疑有內鬼.........」講講下，彼得突然用質問嘅眼神望住我。
「我估唔係佢，我知道佢係彌賽亞指定嘅繼承人。」菲臘講野嘅時候刻意擋喺我同彼得中間。
「哼，就憑呢條靚仔？佢何德何能呀？排隊都未輪到佢啦，話晒我哋都一齊跟咗彌賽亞足足二千年。」
「彌賽亞傳授咗時空夾縫嘅能力俾阿當，全靠佢冒險混入科技館啟動時空夾縫先可以消滅撒旦，佢能夠成為下一任彌賽亞係實至名歸嘅。喺未救得返一班弟兄姊妹之前，我哋依家應該團結。」



「身為方舟號副指揮官，我知道喺土星衞星泰坦上嘅中轉站裝置，係有儲存起所有由地球發射過去嘅生物數據做備份嘅，而夏娃曾經去過嗰度，只要有人能夠去到泰坦上嘅中轉站裝置，將備份數據傳返嚟地球，最少夏娃有機會復活。」面對住兩個男人嘅爭論，上戶彩突然插嘴。
「問題係有邊個去過嗰度？」菲臘問。
「阿當同夏娃，仲有我都去過。」上戶彩答。
「既然新任彌賽亞係咁實至名歸嘅話，救人咁高難度嘅野就留返佢去做。」為對話作最後總結嘅彼得對住我講野時顯得特別囂張。