［科幻有甜］《一場末日危機，令患上中二病的我變成救世者》18+: 第五十九章：繼承者

終於，我同月闇合作打敗咗撒旦。我望住撒旦條屍，個腦不斷咁回帶，諗返起彌賽亞臨死前同我講過嘅野，雖然佢個人已經唔喺度，但原來所有野都係佢掌握之內，佢嘅先見之明不禁令我佩服。
「咁我哋到底要點處理撒旦條屍？」我問十二使徒之一嘅菲臘。
「一切由你，亦即係下一任彌賽亞去決定。」
「吓，咪玩啦，我暫時頂住彌賽亞個位，叫我決定去邊度食野就得。」我以無奈嘅眼神望住菲臘。雖然彌賽亞真係走咗，但我相信世上唔會再有其他人可以接任佢個位置。
「就等我嚟。」點知月闇突然插咀，佢一講完，就將兩隻食指按住撒旦兩邊太陽穴嘅傷口，唔駛半分鐘，個傷口竟然會自動消失！「雖然佢個大腦組織已經還原，但接駁自身意識嘅連結點已經唔再存在，換句話講佢依家只係一個活死人，警方只會以為佢喺公司中風暈倒，永遠成為一個植物人。」

「都係上戶.......SORRY，係月闇最有辦法，就照咁做啦。話時話，唔知阿菲臘嚮呢度做臥底嗰陣有冇見過夏娃同約翰兄呢？佢哋失蹤咗咁耐，我有少少擔心佢哋。」
「你同夏娃係咪好熟？」
「叫做有少少關係同身體接觸咁啦........」就喺我回答緊菲臘嘅同時，上戶彩竟然用氣憤嘅表情望住我。「話晒由我暫時做住彌賽亞，我有責任去拯救我班下屬。」
「對唔住，你嚟遲咗一步，就喺撒旦對老洞發動總攻擊嗰一刻，夏娃同約翰都一齊被佢處死，由於係由撒旦親自監督行刑，其餘人包括我都一律禁止進入行刑室。最慘係夏娃，佢死前曾經多次被撒旦強姦......」


「處死？冇理由.......佢哋冇咁易死........你一定唔知，仲有生物打印機呢樣野........」
「你聽我講，佢哋一入老洞就兵分兩路，一批人進攻大廳，另一批人就破壞嚮嗰度嘅生物打印機。」
「冇理由.......佢哋冇咁易死........夏娃冇咁易死........一定仲有辦法........」一陣突如其來嘅內疚感覺喺我內心深處滋生，令我不自覺眼泛淚光。
「菲臘，到底仲有冇救佢哋嘅辦法？」
「辦法唔係冇。生物打印機其實唔只得老洞嗰一部，只要我哋搵到連接住生物數據網絡嘅其他生物打印機就得。」