［科幻有甜］《一場末日危機，令患上中二病的我變成救世者》18+: 第五十四章：滅門

喺街燈映照之下，我見到蘿莉後面原來仲有兩個瘦骨嶙峋嘅怪人追緊佢，與其話係人，不如話係喪屍似啲。點知兩個怪人一出現，就好似啪咗丸仔嘅癲佬咁想咬蘿莉雪白嘅身軀，我立即啟動元氣手槍射佢哋個身，兩個怪人中槍後，突然轉身即走，仲要係瞬間逃脫嗰隻，但從佢哋嘅枯乾身型嚟判斷，一啲都唔似擁有咁高嘅速度。
「蘿莉，點解妳會出現嚮度？妳著成咁喺現實世界四圍走好危險㗎，妳係咪飲大咗？」我立即扶起地上嘅蘿莉，混亂中，佢身上一邊嘅馬甲被人扯開咗，露出右邊嘅雪白球體，上面仲有牙齒印。
「快啲.......返去.......救佢哋.......佢哋.......被敵人.......屠殺.......」就喺呢刻，蘿莉突然衝前攬實我，原來佢受咗傷，睇真佢成身都係同敵人格鬥時所做成嘅戰損痕跡。
「到底咩事？妳慢慢講！」
「撒旦帶咗好多不明來歷嘅人攻入老洞........殺咗我哋好多手足........依家........彌賽亞........一個人同佢哋戰鬥緊.......」想唔到身為機械人嘅蘿莉竟然一邊講，一邊流眼淚。

我立即抱起蘿莉，然後截停一架的士，雖然我應承過辛梓玲唔理潛伏者嘅野，但今次唔同，今次如果我唔理嘅話，佢哋可能因此被消失，以後都冇得再理。上到的士，蘿莉因為體內能量幾乎耗盡，喺車上呻吟咗兩聲之後，就進入休眠模式。
「兩個咁急係咪趕住開房？等我介紹你哋去九龍塘，開我名保證你有七折！」車廂中，的士司機開口問。
「元朗XXX速去唔該！」我立即回應。
「嗰度荒山野嶺嚟喎......」


「我哋去打仗呀！」我好寸咁答佢。
「明白，打野戰！收到！」

架車到達目的地停低嗰陣，蘿莉就醒返，我哋兩個落車摸黑前往老洞入口，步行咗十五分鐘後，發現原本隱藏得好密實嘅秘道被人打開咗缺口，入面嘅保安設施被大肆破壞，就連外表宏偉堂皇嘅建築物大門都遭到爆破，導致有一部份倒塌。我立即同蘿莉衝入裡面，見到一片滿目瘡痍嘅景象：一班機械信差慘遭殺害，各人身首異處，身體被分屍，零件散落一地，當中包括正太，另外仲有幾具屬於之前嚮酒吧門口所見嗰種皮包骨嘅怪人屍體。我哋沿住條螺旋形嘅走廊一直上，觸目所及，四周圍都有戰鬥過嘅跡象，去到大廳，見到大門被毀，各種裝置更著火焚燒。

「轟！」喺呢個時候，大廳內傳出一下異常猛烈嘅爆炸聲。我同蘿莉隨即衝入去，入面嘅情形居然令我慘不忍睹：馬太為咗保護彌賽亞，身體被人打至七孔流血而亡；耗盡超能力嘅彌賽亞則企喺大廳中間，包圍住佢身邊就有一班殺手，當中為首嘅係日光，另外仲有一個西裝筆挺嘅金髮中年男子，其餘嘅都係一班皮包骨嘅怪人。所有殺手嘅身體都好似被一道力量由內至外咁逐漸被分解破壞，血液不停溢出，最奇怪嘅係佢哋好似被人定咗格嘅公仔咁，就連自己死緊都唔知，情況就好似上次彌賽亞幫辛梓玲驅魔嗰陣一樣。