［科幻有甜］《一場末日危機，令患上中二病的我變成救世者》18+: 第五十三章：禍根

今日，我見辛梓玲唔舒服，就陪佢出去睇醫生，醫生話佢啱啱有咗兩個月，我聽完即刻好驚，就好似身邊多咗個計時炸彈咁，令我明白到點解彌賽亞要大傷元氣去救返辛梓玲。
「你係咪唔鍾意我有咗？」走嗰陣，辛梓玲同我講。
「冇呀，點解要咁問？」
「醫生同我講我有咗兩個月嗰陣我見你冇表情。」
「傻啦，我開心都離唔切，只係一時諗起媽咪，心情未能平復，妳咪胡思亂想。」
「你老實答我，你係咪仲掛住報仇嘅野？」
「我應承妳，喺BB出世前我唔會亂嚟.......」
「咁之後又點？唔通你想個BB冇老竇？你答應過照顧我嘅.......」
「放心，我一定會令妳幸福，等我搞掂個假身份之後，我哋上妳爸爸媽媽屋企傾結婚嘅野好冇？」
就喺我哋差不多返到屋企嗰陣，我同辛梓玲留意到離遠有一隻黑色大狼狗一直跟嚮我哋後面。辛梓玲好驚，原來隻狗跟咗佢好幾日，就好似僕人想保護主人免受傷害咁。如果真係咁邪，個BB嘅經手人係撒旦嘅話，我到底要點樣同辛梓玲講？



翌日，辛梓玲如常返工，當我接完曉彤放學返屋企，正想約辛梓玲出街拍拖嗰陣，對方話公司要加班，叫我自己搵節目，於是我一個人去上次尖沙咀間酒吧飲悶酒。我向bartender叫咗杯啤酒，等咗一陣，對方奉上一杯金黃色生啤。正當我想俾錢嘅同時，身邊突然有一把熟悉嘅聲音叫住我：「on the house.......今次就等我請你飲。」
我立即望一望隔離位，請客嗰位原來係穿著黑色低胸背心同短裙嘅上戶彩。望真啲，佢套衫原來係酒吧女嘅揾食衫嚟。
「點解又會嚮度撞返妳？」
「我已經離開咗班衰人，依家自食其力，喺度做陪酒女郎，我請你飲野當係報答你上次救我。」
「其實我都冇幫過妳，一切都係靠妳自己，不過點都好，cheers…...」
當我準備飲酒嗰下，上戶彩突然黐埋我身，然後咀落我塊面度。
「我諗妳誤會咗，有啲野我想同你講好耐…...」
「你想講咩我一早知道，只係我唔想令到自己後悔，我要嘅野最終一定會得到手，cheers….」就喺同上戶彩乾杯嗰陣，佢面上展現出一絲詭異嘅笑容。
我同上户彩寒暄咗幾句之後就離開酒吧，時間大約係晚上十點，正想打電話俾辛梓玲接佢放工嘅同時，竟然俾我喺街邊撞到一個衣衫不整嘅靚女，對方走起路時一仆一碌，身上只穿著馬甲內衣，來者原來係蘿莉！