［科幻有甜］《一場末日危機，令患上中二病的我變成救世者》18+: 第二十九章：陰陽眼少女

眼前嗰個充滿住氣質嘅靚女個名叫辛梓玲，係我中學女同學，正因為我曾經追求過佢，所以我仲記得晒佢所有嘅特徵，就好似佢長髮及肩，並且擁有一雙曉得放電嘅大眼同性感嘅咀唇咁。問題係，佢明明同洛不凡都生勾勾未死，點解會一齊出現喺度？
「洛不凡！快啲放開個女仔，呢度係一個唔屬於你嘅世界，只要你講俾我知你嚟呢度嘅目的，我就放你走！」
「講多無謂！走嗰個應該係你！」洛不凡一邊講，一邊箍緊辛梓玲條頸，令佢講唔到野，表情非常痛苦。「我限你哋十秒之內離開！我依家就由一數到十，數到十就同條女埋單！」
「你夠膽試下喺度殺咗佢，我怕到時你返唔到陽間！」我唔敢叫辛梓玲個名，怕一講，洛不凡更加會對佢不利。
「一、二、三、四.......」洛不凡竟然冇被我拋窒，仲開始喺度逐下數。
面對咁嘅情況，我同蘿莉邊個都唔敢輕舉妄動。結果我跟洛不凡兩對眼互睥，大家都冇放棄主動權，只係一路僵持落去。
「五、六、七、八.......」就嚮呢個緊張關頭，辛梓玲竟然喺自己身上摷到把刀仔，佢冇等洛不凡數埋落去，居然一野插入對方大髀！
「呀.......妳個臭西居然！」洛不凡痛極狂叫，喺走投無路之下，估唔到佢竟然對準我企嘅位置一下將辛梓玲推向我度，我成個呆咗，立即第一時間攬實對方。

面對昔日女神投懷送抱，嗰種感覺真係冇得……頂。嗰一刻，我同辛梓玲四目交投，佢俾到我一種就連蘿莉都搵唔到嘅野，正正係心跳同體温，再加上來自佢身上嗰種淡淡嘅幽香，令我明白咩叫戀愛嘅感覺。


「呯嘭！」點知我嘅FF被一下突如其來嘅爆炸聲摧毀咗。當我定過神之後，發現四周濃煙密佈，原來洛不凡剛剛引爆咗一個煙霧彈。當濃煙散去後，已經唔見咗佢嘅蹤影。
「俾佢走甩咗。」赤裸嘅蘿莉嚮我身邊講：「呢類煙霧彈似係一種專門為入侵裡世界而設嘅EXIT彈，睇嚟佢個彈係預先準備好，方便一旦走路時使用。」
聽完蘿莉咁講，我再望住辛梓玲，見到佢一啲都冇嬲我，反而仲好冧咁，令我更加唔安樂。
「辛梓玲對唔住，如果我頭先唔係咁講嘅話，我怕佢會對妳不利，妳即管打我........」咁耐冇見，我竟然一開口就講咗句廢話。
「我冇事，頭先多謝你救咗我..........我要走啦，遲下聯絡你。」點知辛梓玲講完呢句之後，整個人慢慢咁消失。