［科幻有甜］《一場末日危機，令患上中二病的我變成救世者》18+: 第十六章：進化

「屌你啦，殺我？係喎，家陣你死咗喎，即係法律上你個人唔存在啦！我搵人買起你都得！」點知洛不凡竟然還拖，仲一拳打落我個肚，就喺呢個時候，夏娃突然出手拉開我，然後我哋一齊走。
「我哋無謂喺呢個時候節外生枝！」夏娃同我走到附近一個公園，然後坐喺個鞦韆度同我講。
「點解要阻我？我忍受唔到佢咁囂張！一個我阿媽，另一個我妹，家陣佢哋認唔到我，我返唔到屋企呀！我要佢哋相信我，我要驗DNA！」我爆響口回答。
「驗都冇用，依家嘅你再唔係以前嘅你......」
講咩呀？咁玄嘅？雖然夏娃欲言又止，但我知道佢仲係關心我嘅。
「你有冇發現自己身體變得強壯咗，反應快咗，身手敏捷咗？」
俾夏娃一講，我又覺得自己真係好似勁咗咁，特別係同上戶彩肉搏戰嗰一刻，唔知點解我會咁神勇。
「為咗避免喺傳送生物數據嘅時候被宇宙射線照射而產生基因排序突變，個程式會自動修正所有生物嘅基因，每次都有十代人左右嘅基因優化。你每一次打印復活，都會經歷一次基因重組，先前你嗰兩次嘅復活等於經歷咗二千年嘅進化，你依家同原有嘅基因組合只有99.93%相似度，而一般兄弟姊妹之間嘅相似度係99.95%，所以你根本無法證實你就係你阿媽個仔。」睇唔出外表一副KOL樣嘅夏娃可以擁有咁科學嘅頭腦。
咁我究竟要點做？
「你得返一條路可以行，就係加入我哋潛伏者組織。」夏娃講完之後，就將小白放喺地上，小白跟住走過嚟係咁舔我隻腳，好似歡迎我加入佢哋行列咁。



潛伏者組織？係咩嚟㗎？係咪好似復仇者聯盟嗰種？
「潛伏者組織係由一班早期踏足地球嘅元祖潛伏者同後期加入嘅成員共同組成，我哋擁有比人類更完美嘅基因組合，同更強大嘅力量。」就嚮呢個時候，夏娃輕輕發力踩個鞦韆，個鞦韆竟然嚟個360度大回旋，正常人根本冇可能做到，唯一解釋係佢擁有超能力！
「呢啲就係我哋潛伏者所擁有嘅力量。美國心理學之父威廉詹姆斯曾經話過普通人只發揮了其潛在智能的10%，由於人類大腦係有可塑性，只要適當發揮嘅話就可以啟發更多空間，就等我哋幫你發揮人類潛能啦！」