［科幻有甜］《一場末日危機，令患上中二病的我變成救世者》18+: 第十五章：詭異葬禮

「阿媽、曉彤，我係子奇呀，我返咗嚟啦！妳哋睇真啲！」我向住阿媽同阿妹叫。
「請問你係邊位？」點知我後父忽然上前問我。
「阿爸，我係子奇呀，我唔認得我啦？」
「唔好玩啦，你雖然個樣似佢，但你哋根本就係兩個人！」原來後父覺得我玩佢。
「佢叫阿當史密夫，係子奇嘅朋友嚟，我哋兩個由哈薩克嚟到香港之後，令郎曾經幫過我哋好多，所以佢依家見唔返好朋友就覺得好唔安樂，甚至當咗自己係令郎，真係唔好意思。」夏娃突然出現向佢解釋。
點知嚮呢個時候，我最憎恨嘅哎呀阿哥出現嚮我面前。

「呢位朋友有心啦，我細佬啱先死咗，阿媽同阿妹依家唔受得外界刺激，希望你可以俾佢哋靜下。」
「不凡，你識唔識得呢個人？」輪到後父問佢親生仔。
「我識，阿當史密夫嘛，上次見過，同個女仔由哈薩克嚟嘅.......」


「你.........」我肯定洛不凡認得我，但為免場面尷尬同俾面夏娃，我冇同佢嘈。
「我帶你瞻仰遺容，睇完你好走.......」洛不凡細細聲嚮我耳邊講。
我同夏娃兩個人望住屬於我自己條屍，佢凍冰冰咁瞓喺入面，塊面冇晒血色，但我就一啲都唔覺得自己曾經死過，感覺就好似發夢一樣。諗返起計落自己同夏娃都死過兩次，當場打晒冷震。

「不凡，出嚟同我傾兩句.......」我望完自己條屍之後，就示意洛不凡同我出去講數。
「老實同我講，我知你認得我，點解唔話俾你阿爸知？」結果我同洛不凡嚮殯儀館後巷私底下傾。
眼前呢個叫做洛不凡嘅人渣，係後父嘅親生仔，所以無啦啦做咗我哎呀阿哥，但佢其實好唔妥我。喺我仲係靚仔嘅時候，佢已經想搞我妹，有一次我睇唔過眼，同佢打起上嚟，佢打唔過我就索性搵後父出頭老屈我打佢，點知累我被後父毒打。
「認得你又點？你條仆街仔死咗㗎啦，你只係一個複製人！醒下啦！諗住返屋企扮孝子分我阿爸身家？話你知，有我洛不凡一日，所有財產同層樓都係我嘅！你咪駛旨意掂！就連你個十六歲卜卜脆嘅妹都會........」洛不凡講唔到一半，就俾我一拳窩落塊面度。
「警告你，夠膽搞我個妹我實殺咗你！」