《你信唔信，真係有前世今生》: 3.7
James放下香檳，然後打開門。
「好耐冇見喇，Katherine。」James說道。
「好耐冇見，I really miss you guys.」Katherine一如既往的一口純正英國腔，急不及待熱情的打招呼。
Katherine先跟站在門口的James擁抱，再走過來跟我和Ken擁抱。
她一如既往不失格調的打扮。
簡單一件米色毛衣配上貼身牛仔褲，肩膀上掛住一個黑色名牌單肩皮手袋。臉上薄薄的粉底配上桃紅色的胭脂，顯得白裡透紅。縱使Katherine淡妝輕抹，但仍然不失質感，她總是完美演繹低調地高貴。
她小心翼翼的脫下鞋子，然後進來。
「wow，呢度個海景不得了！」Katherine也是被這個景觀所吸引，然後野不自覺的坐在窗台。
「你嗰邊唔係都係對住個海咩？望唔到呢個景咩？」James疑惑的問道。
「唔同嫁，你呢度高好多，視野廣闊好多，你呢度望曬對面岸；我嗰度淨係望到中間，西九都見唔到。」Katherine羨慕的說道。
我和Ken無奈的對視了一下，我想，這是富裕人家討論的話題吧，這就是貧富差距。
「不如食野先啦，大家都肚餓喇。」James說，然後，走到廚房。
James把食物放到窗台旁的餐桌上，我們三個也圍到餐桌前坐下。
「大家食飯。」James首先說。
「食飯。」我們和應。
「我地都真係好耐冇見。」Ken說。
「好似畢業之後都冇約過出黎食飯。」我說。
「大家都忙啊嘛，好正常。」Katherine說。
「同埋，你地三個都返工啦，得翻我仲起補習社。邊似以前個個禮拜六日都起補習社返工。你地返工點樣啊？」James說。
「我起學校教書，其實教書都幾悶，又要跟住學校啲教程黎教，以前起補習社有趣好多。」Ken搖頭說著。
「我起社區中心翻緊工，主要幫手搞下啲行政野。」我說。
「你地記唔記得邊個Jodie。」Katherine說。
「嗰個呢，好單純嗰個乖乖女，帶住眼鏡成個學霸咁嘅樣。」Ken說。
「佢宜家搞緊自己ig生意。早兩日嚇死我，佢ig走去跳pole dance，日日都好多船p相。」
「記唔記得大我地一年嗰個Benjamin啊？最鐘意著拖鞋翻工，擺對波鞋起office嗰個？」
「哦，我師兄啊。」我說。
「有一次唔記得帶鞋，得對拖鞋，差啲激死老闆。周圍問人借，最後落波鞋街買鞋嗰個傻仔啊嘛。」Ken說。
「話說呢，佢宜家起我公司樓上開左間物流公司。」Katherine說。
「乜佢咁犀利嘅咩？」
「咁人地屋企都幾有錢。」
「記唔記得邊個啊Ron？同我地一齊入黎，早我地一年畢業嗰個排骨仔呢。」James說。
「哦，嗰個，我成日以為佢營養不良嗰個。」Ken說。
「佢依家做左健身KOL，好誇張啵。」
「吓，唔係掛？」
「我開佢個ig比你地睇下。嗱，你睇下喇。」
「哇，咁大隻嘅。」看到Ron的臉孔配上結實的肌肉有種違和感，但我忍不住說。
「我地啲人好似變左好多。」Ken說。
「點解Ken同Joyce你地好似冇變過？」James問。
「係咩？」我說。
「你地都冇乜點變啦。」Ken說。
「係啵，Katherine，你都未講你之後去邊度。」James問。
「我屋企啲生意會搬去新加坡嗰邊，我過去會再讀書。」
「哦，新加坡都好近啫，你要翻幾時都可以翻黎。」Ken說。
「點都唔同嘅，講係話可以隨時翻黎都好近，但係唔係嗰回事。」
「過去新開始咪幾好，可能到時候你又唔係咁諗呢，到時就開心到唔想翻黎。」我笑著說道，想著外國那種悠閒的生活節奏。
「睇你都鬼妹仔性格，應該都容易適應嘅，英文又唔洗擔心。」James拍拍Katherine的肩膀。
「我都係咁諗嘅。以前都係讀international school，啲同學畢業都係各散東西，大部分都去左唔同國家，去到邊都有叫朋友照應下。」
「咁咪幾好，相識滿天下喇。」James說。
「唉，我都唔知。」Katherine低下頭。
「最近覺得，每一日嘅生活同呢個地方製造左太多嘅回憶。每一日行嘅路，起呢度認識嘅人，呢二十幾年都係起度生活。」
「嗰邊係紅磡，嗰堆磚紅色嘅建築物，係我讀左四年大學嘅地方。」Katherine看著落地大玻璃，黑色的眼珠裡承載著維港的五光十色。
「維多利亞港嘅對岸係尖沙咀，再入面啲係旺角。我會記得同你地一齊起補習社做野，一齊傾野、仲有睇住你地兩個成日嘈交嘅日子。」
「好多地方嘅人都係周圍走做，做野、讀書，唔會留起自己出生地。離開去一個新嘅地方係好common嘅事。」James安慰著說道。
Katherine回過頭來，低頭想了一想。
「的確，係去到邊度都可以生存到。我都以為自己由細到大習慣左身邊嘅人來來去去。
「只係呢一刻，我發現，我冇想像中咁習慣講再見呢件事。」Katherine輕輕聳了一下肩。
「我明啊，呢個世界冇話冇左邊個唔得，但係到真係要講byebye都係唔捨得。」我說。
人所講的「再見」，許多時候都不知道是否可以「再見」。可能這一句「再見」以後，「再見」已經是下一輩子。
「唉，我都唔知，我真係唔鍾意講再見。」Katherine一臉傷感。
「再見」這兩個字，我們從小就學會，可是，有些時候總是難以啟齒。
「但係幾唔鍾意，呢句再見都係要講。」
氣氛突然寂靜下來，大家不知道該說什麼安慰Katherine。
「呃，難得食個飯，都係唔好搞到大家咁sad。」Katherine勉強擠出笑臉說。
「係囉， wish you all the best。」James說道，然後舉起酒杯。
眾人碰杯，也許只有酒精可以讓我們暫時放鬆。
Ken坐在窗台，靠著玻璃，以維港景色作為背景。
「其實命運就像大廈如都市幻化 凌亂如燈火中的密碼......」
手機的播放清單剛剛播到這一首歌，Ken也輕輕的跟著吟唱。
「做咩突然咁感慨？」James問。
「冇啊，我都好鍾意呢度。」Ken輕輕搖頭。
「臨走去個廁所先。」他站起來，走到洗手間。
James悄悄問：「Joyce，你同Ken一齊住點樣？」
「都係咁樣，冇乜野特別。」
「姐係點？講左等於冇講。你地同居都冇咩事發生？」
「咪又係食飯，起屋企睇電視、打下機囉。」
「你地冇一齊？」
「唔......繼續係普通朋友，只不過變左一齊住嘅普通朋友。」
「我仲以為你地會一齊。」
「我都以為會。」我心裡浮現這句話，可是沒有說出口。
「唔係啦，我地只係咁啱要搵地方住。」我最後選擇這樣回應。