《你信唔信，真係有前世今生》: 1.11

「唉，其實佢地兩個相處一直都有啲問題。Simon成日都想有自己空間，但係May好想跟住Simon。你明啦，當一個人體貼到極端就係癡身。Simon冇講咩，但係May總係感覺到Simon一齊嘅時候心不在焉。」

「咁點解兩個人唔好好地傾下？」我問。

「唉.....佢地就係好好傾下，就搞到咁。」

「話說，個晚你走左之後，啊May都係忍唔住問Cassandra關於佢同Simon嘅關係。

『其中一世Simon係May嘅老豆，佢係一個單親爸爸，一開始老豆幾愛呢個女，要咩都比咩佢；但係後尾佢覺得個女係佢嘅包袱，限制左佢事業上、愛情上發展。不知不覺起心入面會怪責個女，但係冇講出口。





個女都感覺到爸爸無緣無故嘅怪責佢，但係一直唔敢同爸爸講，因為覺得勉強都可以忍受嘅。個女一直心入面有條刺，到長大成人就同爸爸慢慢疏遠。』

真係比佢講中曬。然後，啊May一路聽，一路眼濕濕咁。

May話：『人拍拖我拍拖，點解人地開開心心兩個人周圍去，Simon就成日都唔花啲時間陪我，好似好委屈佢咁，你睇今晚佢又走左喇。唉，我都真係忍左好耐。』

咁我咪話：『唔夾咪分手囉，搵過另一個夾嫁啦，無謂難為自己。』

佢喊住咁講：『但係我又唔想分手，我唔想好似故事入面咁疏遠，我仲好愛佢。』」





說完這一句，Suki也忍不住停了一下，然後喝了一口水。這個故事真有點長，時候也不早了，快要凌晨三點，我邊聽邊打了幾個呵欠。

「Cassandra準得咁恐怖嘅。原來佢地之間一早已經咁多問題，最衰我嗰晚早走左，錯過左添。」

「你唔好食花生咁啦，仲有下半part。」

「你繼續。」

「呢個時候Cassandra安慰佢就話：『前世發生嘅事唔代表今世都會一樣咁發生。你有冇野想問？』





May一路喊一路話：『我想知道我應該點做先可以繼續同佢一齊？』

Cassandra合埋眼，跟住話：『唉，你地之間出現左問題。呢啲問題唔係個別事件，係好多因素加埋一齊。爸爸覺得個女係包袱，基本上係佢嘅想法，好難改變，錯不在任何一方。』

『係大家性格同價值觀唔一樣，都係好容易產生摩擦。如果個女肯主動打開爸爸嘅心結，或者仲有小小機會可以解決嘅。』

跟住，May繼續喊，野都講唔到。」

「唉，諗起個晚，我諗佢地分手呢件事，我都有啲責任。」Suki內疚的說。

「人地分手冇啦啦又關你事？」

「咁嗰陣我諗住安慰佢，就同佢講：『你搵日好好同佢傾下，睇下有冇機會解決個問題，可能你地傾完搵到個大家舒服嘅相處模式呢。』」

「早兩日佢搵Simon傾，好似好地地。佢仲好開心走黎同我講話咩前世嘅宿命終於比佢打破左。跟住，今日Simon就同佢講分手啦。





諗諗下我叫佢去傾可能害左佢，如果唔傾，就唔會分手。」Suki托著頭扁起嘴巴。

我感慨的說：「如果唔搵Simon傾，可能今日唔會分手，但係聽日、後日，都係同樣下場，根本都唔關事。」

「都係嘅......如果個晚佢冇問到Cassandra，或者佢相信命運，由得感情慢慢變淡，就唔會好似今日咁傷。」

「Cassandra嘅出現可能係命運嘅安排，可能佢呢個決定已經同上一世唔同，只係結局都係一樣分手收場，長痛不如短痛。」

最可悲的不是悲劇一次又一次上演。

而是，當一個人知道自己的前世，想避免在這一世再次發生，用盡所有力氣以為可以改變結局。最後才發現，事情的癥結在於人本身，結局早成定局。

就像著名的希臘悲劇伊底帕斯王，千方百計為了逃避弒父娶母的命運，可是最終還是避免不過。





這一世May和Simon分手收場，下一世會再遇這個人嗎？換個身份，結局會不一樣嗎？

聽完May的故事，我重新想起那關於我的前世的故事

「直到有一日，佢問：『你會唔會跟我走？我打算離開呢度。』」

如果前世會在這一世應驗，這一世，那一天到來之時，我還是會狠狠的拒絕他嗎？