不如我們分開一年，好嗎？: 第二十八章

終於到了復活節。過去的幾個星期，我都被一大堆測驗纏繞著。沒辦法了，中五的生活果然不能說笑。

「救命呀！點解可以咁多嘢做架？」詠琳今天跟我抱怨。也是的，我光是讀書已經覺得很辛苦；詠琳除了讀書，還有這麼大堆課外活動，我還挺佩服她為何這樣也不會分身不暇。

「其實點解你可以應付到咁多課外活動嘅？」

「其實應付唔到……所以最近有個joint school活動我都無報名做搞手，淨係做參加者就算。」

「咩活動嚟㗎？」





「復活節會入camp囉！好似你地學校都有份架。」

我在學校基本上除了讀書，對任何事都是不聞不問的，因此我沒有聽過有這個宿營。

但我比較在意的，都是這個宿營有男有女……詠琳會在這個營發生什麼事？

「入到營要小心啲，唔好俾啲男仔有機可乘。」我慎重地叮囑。

「好似你咁？」





「我幾時有對你有機可乘……」

「你放心啦，唔會有事嘅，普通一個camp咋嘛！」

「總之真係要小心啲啦。」

「係喇長氣袋，有老師睇住㗎！」

心裏怎麼也有一些不開心的了，但除了無奈接受，我又可以做什麼呢？





＊＊＊

因為詠琳入了營，整個復活節假期我都只可留在家中。

詠琳以前很喜歡隔一陣子就whatsapp我，跟我有的沒的地說；可是自從她入營之後，她一個訊息也沒有給我。

我不願猜想為什麼，但我內心的焦慮和煩躁正漸漸擴大。

有人說過，愛一個人就要完全相信她、接納她。我愛詠琳嗎？

我想我只是喜歡詠琳罷了。

好不容易才等到復活節結束。跟詠琳闊別了十天後，終於能重遇她。

「早晨！」活潑的聲線一如以往為我打開了今天。





「早晨。」

在巴士上，詠琳滔滔不絕地跟我分享她在宿營的經歷。

「個camp真係好好好好玩！雖然每一日都要好早起身，但係真係好正！我地每晚都會做埋同一間房裏面，玩好多集體遊戲，有扑傻瓜啦、白痴仔啦，好多好多遊戲，晚晚都玩到三點幾四點先瞓！」

「玩得開心就好喇。」我說。男孩和女孩每晚都在同一間房……

有沒有想過你玩得很開心的同時，我很難過？

幸好詠琳似乎沒有發覺到我的不妥，繼續一如以往地跟我聊天和餵我吃朱古力。

「過埋復活節就真係要修心養性，開始溫書喇……」我說，同時希望她不要再參加這麼多課外活動。





「你放心喎，嚟緊應該冇乜嘢要搞。」

不過我還是在facebook看到詠琳跟大夥兒的合照，心裏始終五味雜陳。

「睇緊咩呀？」文謙走了過來。

「唉……我都喺度諗緊係咪自己太小器，見到佢同男仔影相又頹一餐。」

「睇開啲啦，識朋友唔係男仔就係女仔，如果佢只係純粹去玩camp影下相，你真係唔使咁介懷喎！」

「試下啦……」

我本來以為只要嘗試接受，就不會介意……

我始終是接受不了。