不如我們分開一年，好嗎？: 第十五章

我今年的生日是在星期五，詠琳一早便約了我吃晚飯。

「老豆，我今年生日約咗人。」我跟爸爸說。

「男仔定女仔呀？」他問。

「女仔，上次上嚟練琴嗰個。」

「哦……係咁你地玩得開心啲啦！」





我告訴詠琳已成功取得外出許可證。

「嗰日你記住著得好睇啲喎！」詠琳叮囑我。

「點解嘅？」我不解地問。

「因為我嗰日要同你影相！同埋我哋要去高級餐廳食飯！」

「我無錢呀……其實隨便食就得，真係無乜所謂。」





「我請你食啦！」

「唔好啦，又要你破費。」

「我話請就請，你唔好理咁多！」

其實詠琳刁蠻起來還挺可愛的。

「但係都唔好食咁貴啦……」





「對唔住喎陳生，由於嗰日係潘小姐出錢，所以去邊度食飯係由我話事，唔係你話事。」

「好囉……」還未吃我已經預料到那餐一定不會便宜，我的虧欠感又彈出來了。

「你鍾意食啲咩？」

「食乜都得，無乜所謂。」

「好啦，係咁我會諗到啲好地方架喇！」

上了車，詠琳忽然開了自拍鏡頭說要跟我拍照。我還未來得及反應，就給她拍下了。

「你快啲裝snapchat啦！好多花生食㗎！」詠琳游說我。

「唔喇……冇乜朋友，況且我都唔鍾意將自己嘅生活公開。」





「乜唔可以為咗我裝咩？」她把頭移近我說。

五分鐘後，我安裝了，但是看見那個介面我便覺得煩惱，好像很複雜似的，幸好詠琳即時教了我怎用。

「呢度就係睇下有邊個add你嘅。見唔見到我喺度呀？係咁你就乖乖地accept咗我就得架喇。呢度有得block人，如果你add咗人但係又唔想人哋睇到你啲嘢，你就可以block咗佢。係咁佢食唔到你花生但係你照樣可以食到佢花生……」

她說了一大堆話，終於讓我明白snapchat是怎樣運作的了。

「如果連續同人snap，係咁你地就會有火。如果大家互相係best friend，喺個名隔離會有個心心㗎！」

「個心心有乜用……」我仍不明白這個東西作用是什麼。

「唔使知咁多㗎，不過你記住要成日snap俾我喎！我要做到你best friend架！」





那麼我相信這個任務並不難，因為我根本就沒有新增其他朋友……

詠琳基本上每隔一小時，就會傳一幅自拍照給我。本來我也是上課不用手機的乖學生，但現在我為了要看她的可愛自拍照，也打破了這個習慣。

「做咩成日send自拍俾我嘅？」我問她。

「咁你咪好似可以成日都見到我囉！」她笑說。

「你到底一次過send俾幾多人架……」

「唔話畀你知！」

她硬是要給我一個讓我胡思亂想的答覆。

「又呷醋……」她見我面色突然一沉，扁扁嘴說。





「都無得我控制啦……」我很無奈地說。看來表白這個念頭，還是要打消。可能她由始至終只是把我當成一隻士兵。

然後，她的右手捉著我的左手，十指緊扣著。我感覺到我的臉迅速轉紅。

「你……做咩？」

她拿出手機拍下，然後沒為圖片加上描述，就放在「我的故事」中。

「唔好再呷醋喇，傻瓜！」