不如我們分開一年，好嗎？: 第十三章

到了第二天，我和詠琳又在巴士站相見了。

「早晨！」

「早晨。」

我應該問她那條問題嗎？這麼唐突好像有點奇怪……

「都係同你一齊返學開心啲，起碼有個人陪我傾下計。」詠琳跟我說。





「我都係，同埋可以令我一朝早就醒神。」你看，我多麼努力把自己的答覆拉長。

「我幫你再醒神啲吖！」

她又打算做什麼……？

接着她從口袋拿出一盒麥提莎。「擘大口！」

她餵了我一粒麥提莎。這肯定是我吃過最甜的朱古力。





「我好鍾意食朱古力架！食朱古力可以補充能量，所以我成日都會帶定一盒返學上堂食！」

「得唔得架……」

「無所謂啦，啲老師又唔發覺。」

「係咁多謝你犧牲咗一粒麥提莎俾我喎！」

「你睇下你幾重要吖！」





「有幾重要先？」

「重要到我請你食麥提莎囉！」

「上車啦。」

然後我才發現，她很巧妙地迴避了我的問題。

「我好想瞓覺……但係我又想同你傾計，我應該點做好？」詠琳問我。

「休息吓囉……反正我都唔多講嘢。」

「咁樣唔得架喎，我放棄每日專車接送我返學都要同你一齊搭巴士，你咁樣對我……好慘啫。」

雖然詠琳明顯地是在說笑，但其實我也覺得有點不好意思。不過最大的問題是，我根本不知可以說什麼呢……





「不如咁啦，我地雖然識咗咁耐，但係都好似唔係太了解對方咁。我地就好好利用呢個時間互相認識下啦！」她接着提議。

「好……你想點樣認識？」

「呃……嗱，我地每日問對方一條問題，咁樣好冇？」

「好呀。」天助我也，居然這樣有機會問她有沒有男朋友。

「係咁我要問你先！你有無女朋友㗎？」

我沒料到她一來就這樣單刀直入。

「無。」我斬釘截鐵地回答。





我見她面上閃過一絲笑容，但很快又消失了。「係咁唔通你有男朋友？」

「咪傻啦。」

「講下笑啫！點解唔去識下女仔呀？」

我心想: 我現在不是嘗試認識你嗎……？

「去邊度識先得架……」

「去參加多啲活動囉！嗱你去學作文識到我，你真係好應該慶幸你有參加到個作文班！」她邊說邊流露出一個不可一世的笑容，令我很想反擊，但無奈她又真的說得很對。我真的很慶幸有參加那個作文班，令我可以遇上妳。

「中五要讀下書，唔參加啲咩喇。」

「咁樣都好，係咁你唔使周圍都識到女仔，淨係識得我一個！好啦，到你問我喇。」





「係咁你又有無男朋友？」

她沒有直接回答我，反而反問我:「呢條問題我嘅答案對於你嚟講好重要？」

是不是很重要呢……？

她見我沒有回答，便慌忙繼續說:「無，不過見你第一條問題就咁樣問，我有啲好奇啫。」

「你自己咪又係第一條就問我……」我不解地回應。

「不過呢……」她忽然進入認真模式。「你問得呢條問題，心裏面一定有個答案。我個答案係乜，其實唔重要，你覺得係乜先係最重要。」