魔獸工作室: 和解

尖沙咀警署，午夜。

鴻漸、清秋、凌禁三人站在警署閘外的梯級下，弦思正在旁安慰著幽幽，後者抽泣著，嘴角有一道明顯的瘀青。

凌禁(憤然): 「比女警打到咁？」
 
清秋: 「班友仔真係唔識憐香惜玉…點算？port佢哋？」
 
凌禁: 「冷靜，冇用㗎，成個警界一擔擔。」
 




鴻漸(抱了抱幽幽): 「幽幽，以後遇到自稱係警察嘅人，即刻掉頭走。」

那晚，鴻漸認識到一件事，無論多麼不喜歡這現實社會，躲進虛擬世界解決不到任何問題。遊戲是現實的成功人士做出來的，現實怎樣變，虛擬世界就怎樣變。假如有一日當權者想將蒙昧延伸到虛擬產業，大概連魔獸世界都會變成一個無聊的地方。

夜色中，街頭燈光燦爛。他們沿彌敦道走向旺角，垃圾袋之類的雜物堵塞馬路，周圍都是火頭和催淚彈施放後的白煙，時針指向零時，香港迎來『白煙聖誕』。

■■■■■■

人客稀少的麥當勞裡，鴻漸安頓好幽幽，五人各自點了杯汽水，有些低沉的圍桌而坐。





清秋(吞吐): 「呃，我感覺大家都唔係太關心賭局勝負，但至少畀我循例匯報一下…」
 
鴻漸: 「講啦講啦。」
 
清秋: 「首先，喺受害一方，即係聯盟方面，對屠城當然係毀多於譽。局外人認為我哋能夠將遠在五個地圖外嘅BOSS引入主城，係可恥咁利用咗遊戲嘅漏洞；亦有少數人覺得我哋好高明，發現到呢個其實好平常嘅機制；普遍聯盟小號怨聲載道，喺各大論壇聲討。但結果的確符合凌禁嘅本意，將對『無名』嘅恐懼深印喺新手心中。」
(怪笑，話音一轉): 「但即使喺部落方面，都唔係一面倒咁崇拜，有啲人敬仰我哋，認為貫徹咗部落嗜血嘅精神；相反，有小部分人憂心聯盟會有大舉報復行動，影響佢哋作為休閒玩家嘅安寧。」
(聳肩): 「所以，基本算係平分秋色啦！」
 
鴻漸(苦笑打斷): 「唔係，係凌禁贏咗。」
 




清秋: 「啊？點解？」
 
鴻漸: 「如果唔係Tiger提出今次賭局，我永遠唔會反思如今魔獸喺我心中嘅定位。佢透露嘅前瞻，幫困喺虛擬世界嘅我『打破封印』，適逢幽幽呢次遇到嘅委屈，我更加認同將麥田轉型。」
(露齒而笑): 「對比停滯嘅我，佢計劃嘅嘢，先係真正為咗工作室同我哋著想。將股權交畀Tiger，無論喺我哋餘下喺魔獸運作嘅日子，定係未來轉戰其他線上遊戲，我都會感覺更安心。」
 
凌禁(尷尬搔頭): 「多謝你原諒我嘅『暴走』，點都好，依家你好好陪下幽幽啦。」