魔獸工作室: 塵埃落定

12月24日，平安夜，旺角某卡啦OK廳。

在空間寬敞、風格時尚的包廂裡，方鴻漸躺在柔軟的沙發上，手執遙控器，在歌庫中瀏覽著自己熟悉的曲子，屏幕右上角的時鐘顯示，時間已來到晚上的八點半。短促的敲門聲響過，穿著印花的夏威夷恤衫的向清秋推門而進。

清秋(嬉皮笑臉): 「Merry Christmas，乜咁早啊？唔使陪『法包』咩？」
 
鴻漸(揉額頭): 「我有嘢諗，而且幽幽佢話想去海旁行下，感受節日氣氛。」
 
清秋: 「咁凌禁呢？佢向來好守時㗎。」
 




鴻漸: 「同弦思行街啩，你約呢個時間唔係方便我哋呢啲有對象嘅人咩？」
 
 清秋(咬牙切齒): 「估唔到佢哋兩個都修成正果，我單身，我恨啊！」

十五分鐘過去，鴻漸和清秋正吃著飯後小食，凌禁和弦思結伴來了。

凌禁: 「奇怪，點解幽幽仲係唔見人？」
 
鴻漸(苦笑): 「我唔肯陪佢，估計有啲嬲我啩……唔好理先，我哋唱住歌等佢。」
 




凌禁: 「好！」

清秋拿過遙控器，帶頭點起歌來，很快菜單就排滿陳奕迅、張學友的金曲，鴻漸亦貼心的為幽幽點了幾首會唱的國語流行歌。

鴻漸(迫不及待): 「所以，賭局嘅結果呢，清秋？」
 
清秋: 「我落街點支煙，返嚟再講……」
 
弦思(跟在清秋後面): 「我要打個電話畀屋企人報平安，最近局勢唔係幾穩定。」
 




鴻漸(等兩人走後): 「Tiger，我希望知你點解想攞咁多股權。」
 
凌禁(從容一笑): 「我一開始加入麥田只係玩玩下，但做落發覺可能呢份工係我畢生追求嘅事業。唔係佢帶畀我嘅收益有幾豐厚，而係佢象徵住我嘅夢、或者初心。」
(關掉吵耳的音樂): 「我咪好鍾意睇英雄片嘅，其實自從我細細個發現自己有比常人強好多嘅反射神經同動態視力之後，我就好憧憬嗰種『英雄』嘅形象。」

凌禁喝了一口啤酒，臉色黯然落寞地搖了搖頭。

凌禁: 「但係鴻漸，呢個世代唔需要英雄、亦唔需要聖人，所以社會將一啲根本稱唔上英雄嘅群體美化成英雄，好似軍人、消防員咁。但係我發現，係精神上最近似神話入面英雄嘅人，竟然係嗰啲黑道江湖人物。」
 
鴻漸(反駁): 「Tiger，咁你就諗歪咗啦，英雄唔一定要有超人嘅勇武或者係現實入面叱吒風雲，最重要係佢哋做緊啲好有意義嘅嘢。」
 
凌禁: 「呢個係行為嘅性質，只係一種要素。冇錯，英雄唔係一式一樣嘅，亦都唔需要畀人記住佢哋個名，好似『坦克人』咁。」
 
鴻漸(點頭): 「你繼續講。」
 




凌禁: 「真正嘅英雄要有一種傲氣，一種追逐榮譽嘅慾望，咁先可以驅使佢哋不斷做偉大嘅事，而唔係單一次嘅偶然行動。」
(似有恥辱的表情): 「作為一種妥協，我本來想成為一個警察，但係睇到呢一年發生嘅事，我完全失望。」

鴻漸: 「唉……」
 
凌禁: 「無名四十人團代表嘅，係一種藐視反抗者嘅『痞氣』，但唔知點解，係追殺『硬頸花園』嘅過程入面，我竟然搵到一絲英雄嘅滋味。而當我知道魔獸入面有一個專門宣揚抗爭意識嘅香港公會，且有好多台灣同胞用各種方式聲援嘅時候，我好想將我喺虛擬世界得到嘅嘢，回饋返畀個社會……」
 
鴻漸: 「咦？所以？」
 
凌禁(拍了拍胸口): 「我拎到股權之後，想將麥田帶入黃色經濟圈…無論係拒絕內地客、唔喺淘寶之類嘅中資平台掛單，定係排擠『粉紅玩家』，甚至係物質上支持民主運動……我雖然唔知具體點做，但係仍然想踏出呢一步。」
 
鴻漸(展顏一笑): 「凌禁，你果然冇變到……」

兩人欲深談，清秋卻正巧一臉神清氣爽地返回。





清秋: 「啊，舒服……係啦，如果冇疑問嘅話，我要公布呢幾日嘅輿論風向啦……」

這個時候，鴻漸的電話響起，他放到耳畔接聽，內裡傳出幽幽有點含糊的嗓音。

幽幽(哭腔): 「漸，我剛剛逛星光大道的時候，突然有很多人聚集叫口號，有人遞給我一個黑色口罩，我還未戴上，警察就射起催淚彈…我來不及逃，被人抓了，現在在警署，他們說要人擔保我……」

鴻漸抿著嘴唇，臉色數變，隱隱見慍怒之色。

凌禁(關切): 「點樣啊？」
 
鴻漸: 「幽幽畀人拘留，我哋依家去尖沙咀警署。」