魔獸工作室: 內鬥(下)

升降機門打開，清秋、幽幽等人前後腳步入地階大堂，鴻漸走在最尾，臉色陰沉，驀地叫住凌禁。

鴻漸: 「Tiger，等一下！」

凌禁停下步伐，回頭望向鴻漸，清秋向幽幽使了個眼色，後者拉了拉弦思手肘。

幽幽: 「宋姐，我們先走。」

隨著兩女離開，大堂裡的空氣似欲凝固，鴻漸、凌禁木然對視，清秋站在中間，臉色尷尬。





鴻漸: 「你係咪打機打上腦？遊戲工作室不嬲係規則邊緣撈錢，我哋喺世界頻道打廣告，本身就係違規，畀人Ban咪再開個免費號囉。」
 
凌禁: 「上腦？哼，的確有啲，但我覺得你似乎搞唔清楚一啲嘢，思想仲停留喺當初私底下玩遊戲娛樂嗰種心態。你知唔知道，弦思為咗幫我哋定製外掛程式同管帳，連寫手機Apps份正職都Quit咗。」
(面色一正): 「依家我哋聚埋一齊，都係因為相信工作室可以帶畀我哋優渥嘅生活。」
 
清秋(歎息): 「阿方…魔獸懷舊服所帶嚟嘅畢竟只係消費情懷嘅短暫熱潮。萬一熱潮過咗呢？唔通大家集體失業？線上遊戲形形式式，我哋差唔多係時候諗下公司接落嚟嘅出路。」
 
鴻漸(臉紅耳熱): 「唔通關乎事業就要放棄我哋一啲原則？清秋，我哋以前都係普通嘅魔獸玩家嚟㗎！」
 
清秋(別過臉，聲音虛虛的): 「阿方，遊戲只係遊戲，我哋現實中亦唔再係學生，係社會人。」




 
凌禁: 「喔，我明白啦，你之所以無法認可呢次行動，主要係因為難以放棄作為魔獸迷嘅『素質』同考慮到一般玩家嘅情緒啫。」
(輕笑): 「不如我哋趁呢個機會打個賭啦。」
 
鴻漸: 「點賭法？」
 
凌禁: 「我哋麥田雖然唔會上市，但都係時候分配下股權。兩個女仔係後來加入，每人算一成；而我哋三個付出差唔多……既然你咁Care其他玩家嘅感受，我哋就以事後兩個陣營玩家嘅輿論決定你同我嘅持股量。」
 
鴻漸: 「嗯？以股份作為賭注？」
 




凌禁: 「冇錯，清秋係公證人，佔兩成，如果輿論傾向我哋就算我贏，你一我五；反之就算我輸，我一你五。」
 
鴻漸(冷笑): 「好，橫掂我唔覺得你會贏。」
 
清秋(乾咳): 「咳，兩位，輿論嘅風向好快就會定斷，我哋就以24號為界，檢視聯盟、部落嘅總合論調。為咗公平起見，請你哋喺行動之後唔好登入遊戲。平安夜嗰晚我哋約埋去唱卡啦OK，無論結果係點都和氣收場，好冇？」

「好！」鴻漸、凌禁齊聲說道，右手握在一起。