魔獸工作室: 內鬥(上)

單位內的佈置與以往大相逕庭，大廳的中央被清空出一個區域，擺放著一張U型的會議桌，平日工作的電腦桌反倒移到四邊。清秋、凌禁、弦思分別在桌子的各側就坐，離門最遠的主席位，還有末席的位子都預留著。「叮鈴」聲響過，鴻漸和幽幽相繼進門。

鴻漸: 「咩事啊？氣氛咁嚴肅嘅？」
(定睛在會議桌): 「咦，間房執過嚟？」
 
凌禁: 「嗯，新到嘅conference table。」
(向主席位攤手): 「坐吖。」

鴻漸有些不自在的坐上主席位，幽幽亦隨之在末席落座。





鴻漸: 「今日呢個會議，係咪關於冬幕節活動開鑼？」
 
凌禁: 「一方面的確係咁……」
 
弦思(舉手): 「可唔可以科普下…冬幕節係乜？」
 
清秋: 「冬幕節係魔獸世界裡面嘅節日，對應現實嘅聖誕節，由每年今日，即係12月16號起，舉行兩週左右嘅慶典。」
(望凌禁): 「凌禁度咗個針對節慶任務嘅賺錢方案。」
 
凌禁: 「詳細等我講…個Plan嘅中心係一樣叫『小蛋』嘅素材，烹飪技能可以將佢加工成『小薑餅』，用嚟交付NPC『冬天爺爺』嘅重複任務。任務獎賞嘅禮物包有機會開出堪稱小極品嘅裝備設計圖同藥劑配方，所以喺短期內小蛋嘅價值會上漲10倍以上。」




 
弦思(托眼鏡): 「喔？莫非你上星期叫我揼嗰段code就係專門採收小蛋嘅？」
 
凌禁: 「係，聯盟地盤『黑海岸』啲梟獸有好高爆率，因為都係低級怪，一兩下就打死，我叫弦思加咗個搜索梟獸嘅功能。仲有……」

凌禁頓了頓，十指交握於下巴，眼中閃爍精光。

凌禁: 「你近排掛住拍拖，可能連自己個帳號都冇登入。我哋遇到啲狀況……」
 
清秋(插口): 「其實係咁，你應該知道，工作室嘅業務除左喺論壇開帖打廣告外，遊戲內嘅世界頻道都係主要宣傳渠道。我哋一向創設免費嘅體驗帳號喺頻道喊話推廣，但係最近呢啲小號因同一原因不斷流失。」




 
鴻漸(皺眉): 「又有人檢舉？」
 
凌禁: 「嗯，而且性質唔單純。有人通過蛛絲馬跡將『麥田』同無名四十人團聯繫起嚟…因為之前獵殺硬頸花園嘅時候牽連到其他聯盟公會，佢哋似乎有連結一齊打壓我哋嘅跡象。」

清秋: 「我收到風，22號星期日，各大公會會長會喺暴風城王座所在，『暴風要塞』召開會議，討論點對付我哋。」
 
鴻漸: 「吓？咁會唔會影響我哋發展？」
 
凌禁(岔開話題): 「鴻漸，你有冇聽過『末日領主卡扎克』？」
 
鴻漸: 「喔，係詛咒之地嘅世界BOSS，會爆唔少紫裝。點解咁問？」
 
凌禁: 「魔獸有一個機制，就係當你持續承受一隻怪物嘅傷害，並係一定時間內進行反擊，佢就會一直跟住你個人物……」
 




鴻漸(困惑): 「點解突然提起呢樣嘢？」
 
凌禁(冷笑): 「呢個距離可以係無限，例如由詛咒之地跨越悲傷沼澤、再穿過逆風小徑……一直到艾爾文森林北部嘅暴風城。而對象，可以係世界BOSS。」
 
鴻漸(屏息，眼睛瞬間瞪大): 「Tiger，你癲咗？」
 
弦思(在幽幽耳邊低聲問): 「幽幽，點解班男人突然間咁激動？」

幽幽(普通話): 「宋姐，我也不太清楚，但記得卡札克這個BOSS有個群體攻擊的暗影箭技能，而他每殺死一個單位，就會回復七萬點血量。暴風城的低級玩家很多，引進城的話，會是壓倒性的屠殺吧。」
(手指點著下唇): 「但要做到這一點，至少要三個配合有素的遠程角色吧？」
 
弦思(嘀咕): 「原來係咁，唔怪得之Tiger一個禮拜前就叫我入Game創角色，而且職業仲要係獵人……」
 
鴻漸(微怒): 「……好好玩遊戲唔得咩？就算要喺虛擬世界入面賺錢，都唔駛咁樣破壞人哋體驗嘛？」
 




凌禁(傲然): 「我唔容許有人挑機我哋呢間工作室，我要『麥田』名揚魔獸，而所有玩家都對我哋又敬又怕。」
(一手搭上鴻漸肩膀): 「呢個計劃事在必行，就算你唔肯配合，我都會搵其他聯盟角色引怪。」