魔獸工作室: 第一次會議

10月初，葵興工廈某單位。

「吧嗒、吧嗒」，皮鞋叩擊水泥地板的聲音迴蕩在工業大廈的走廊間。

穿著加大碼襯衫、西裝外套，一副商家佬模樣的向清秋摸到一個單位前，按了按門鐘。半晌，方鴻漸開門，大廳裡空蕩蕩，一副剛入租的樣子，唯一的一套辦公桌前，坐著正在操作筆記型電腦的凌禁。

清秋: 「個地方唔錯喎，就係門廊迂迴成個迷宮咁，我轉咗幾圈先搵到嚟呢度。」
(指了指凌禁): 「佢搵㗎？」
 
鴻漸: 「係，你要嘅合伙人，牌照之類嘅法律事宜由佢負責…另外，呢度雖然『劏』過，但係啱啱翻新，月租兩千幾算係咁。」





清秋走近辦公桌，見凌禁手指翻飛、技術嫻熟的操控一個名字叫「Free Tiger」的亡靈盜賊，在薄霧瀰漫、暗無天日的林地獵殺著感染了瘟疫的野獸。

清秋(搭訕): 「你手提電腦嘅硬件唔錯，運行呢款3D遊戲竟然一啲都冇過熱嘅跡象。」

凌禁(瞄了清秋一眼，開始登出): 「我係freelancer，呢部laptop係我平日幫client寫網頁用嘅，如果分分鐘死機嘅話，background運行緊嘅進度就冇啦。」
 
鴻漸: 「佢對遊戲工作室低勞動量、高回報嘅模式好有興趣，最近惡補緊魔獸嘅相關知識。」
 
凌禁(聳肩): 「我認為home office效率比唔上自己有個辦公環境，所以都係順便。講明先，做工作室只會係我嘅副業，值班以外嘅時間我都會忙自己嘢。」




 
清秋(伸出手): 「冇問題，自我介紹一下，我叫向清秋，阿方嘅高中同學，以前做過傳銷、地產，平時有玩下投資咁。」
 
凌禁(握了握他的手): 「我叫凌禁，係鴻漸嘅大專Groupmate，愛好係漫威嘅超級英雄片。」
 
鴻漸(將一張A3白紙鋪平在桌上): 「好，唔嘥大家時間啦，即刻入正題，討論下我哋公司嘅前景同發展規劃……」

三人張嘴合嘴，熱烈的交流意見，不時拿馬克筆在白紙上寫寫畫畫。窗外天時變換，單位漸漸染上黃昏的橘紅色。

凌禁(望向清秋): 「聽你咁講，即係倒賣殺怪掉落嘅金幣會係公司嘅主要營收來源？」




 
清秋: 「冇錯，我哋會創建一批『打金』角色，用外掛控制佢哋自動刷怪，值班嘅人只需要監控住個Mon，喺故障嘅時候出手調整就得。」
 
鴻漸: 「參考國內嘅例子，我哋仲可以進一步擴大作業規模，每部主機同步驅動四、五個遊戲程式，然後外接相應數量嘅螢幕……橫掂睇一個Mon係睇，睇五個Mon都係睇。」
 
清秋(滿意，猥瑣笑): 「你講中Point啦，至於另外兩項主攻業務…代練等級因為要向客戶負責，一定要手動，呢項可以值班嘅同時，一邊監場一邊做，但係我哋呢度得三個人，接唔到幾多單；而標價出賣稀有裝備，只會係打金嘅副產品，收益係三項中最少嘅。」
 
鴻漸: 「清秋，你有冇查過家陣遊戲幣同港幣嘅兌率？」
 
清秋: 「我有做功課㗎，係一比二點五。」
 
凌禁(撥開手機的計算功能): 「好，我哋計下收支，每個打金帳號一個鐘平均產出十五個金幣，每部主機可以同時運作五個角色…扣去電費、租金……」
(停下手指，點頭): 「有諗頭！」
 
清秋: 「咁我哋工作室叫咩名好？」




 
鴻漸: 「我哋係新時代嘅『網絡農夫』，就叫麥田啦！麥田工作室！」