[愛情] 心連心 (粵語): 4. 第六日

朝早瞓醒，就已經感覺到下半身開始無力。 

我先去個廁所，已經見到啲尿係有少少紅色，我心諗，嚟啦！ 

我順勢慢慢將支棉條攞出，血紅嘅畫面即時出現，好彩我有備支新嘅，第一時間換咗佢。 

跟住個肚（子宮？）開始傳嚟少少痛楚，有啲似肚痛嘅胶痛，又唔係完全係同一種感覺。 

我雙腳開始冇咩力，我快步走返間房，瞓返落張床度，身體好自然咁攣咗起嚟。 





呢個時候，痛楚越嚟越大，嗰種痛法有啲似俾人撕開，係喺個肚裡面嘅撕裂感，好似係分裂抽離嘅感覺，越嚟越大，又一時大一時細，但係大痛到可以令我出冷汗。 全身嘅感覺俾哩樣抽痛衝擊住，我合埋咗雙眼，超唔舒服。 

阿媽入咗我間房：「女，又嚟經痛呀，妳等一陣，我開個暖袋俾妳。」 

我無晒力：「唔該阿媽。」 

由起咗身開始，已經有成個鐘，我完全喺張床度冇郁過。 

直到阿媽俾咗個暖袋我敷住個肚一陣，個感覺終於冇咁大。 





但係我已經成頭汗，個頭仲有啲重重哋。 

阿媽再入咗嚟：「女，哩度有杯熱薑茶，妳飲咗佢會舒服啲㗎。」 

我慢慢起身：「唔該阿媽。」 

啲痛係喺你估唔到嘅時候突然間嚟，可以係持續五分鐘，但係又可以長到至超過一個鐘。

好攞命，好痛，好辛苦，我終於清楚明白到，所以有M痛女性嘅辛苦係有幾苦。 





仲要今日先第一日，聽講第二日有可能仲激。 

我有再瞓咗少少，但係又俾個痛整醒咗。 

直到晏晝，我終於可以坐起身，一坐起身，身個腰同背脊超酸，根本M痛係一種折磨。 

我慢慢咁走到廚房，想搵嘢落肚。 

哩個時候，屋企得番我一個，阿媽啱啱出咗去買嘢，我就打開廚櫃攞咗盒餅坐咗喺梳化，攤咗喺度食。 

食咗唔夠兩塊，個痛楚又嚟，一陣一陣嘅衝擊，我瞓咗喺梳化度，成個人攣住咗。 

我個腦不停咁俾啲痛楚連續衝擊，連諗嘢都諗唔到。 

跟住我又痛到好攰，瞓著咗。 





阿媽返咗嚟嗌醒我，叫我返房唞。 

食個晏都完全唔多想食，但係阿媽話要食多啲先有體力。 

過咗半日，隔個鐘仲要換棉條，我身心都超攰。 

直到下晝，我受到子恩嘅短訊，佢問我今日感覺點。 

我同佢講：「係死去活來，活來又死去。」 

子恩話佢好想上嚟我度，幫我舒緩痛楚喎，但係又唔係咁好，因為佢係男仔，又未係我男朋友，唔係咁方便。 

我話：「多謝妳嘅好意，有機會我可以介紹番妳俾我屋企人識，咁妳就可以明正言順咁見得番妳屋企人啦。」 





佢回：「係喎，咁幾時？」 

我回：「至少等我過咗哩幾日嚟完M之後啦。」 

佢回：「係嘅，你加油啦，話晒我差唔多經歷咗M痛成十年，就一個月幾日啫。」 

我回：「今日第一日已然好攞命。」 

佢回：「見你咁，我唱首歌俾你加油啦。」 

佢真係唱咗一段仔歌俾我聽，係「心淡」。 

其實佢真係對我唔差，又冇咩唔好嘢感覺，佢係一個有住女性心思嘅男性，仲要係男仔身體嘅我。 

我喺哩一刻係有少少心動，但係我暫時唔想俾哩種感覺帶住，所以我都係忍住我個心意。 





夜晚，阿爸阿哥返到屋企之後，佢哋知道我嚟M，都叫我早啲休息。 

阿哥佢買咗碗黑木耳紅棗甜品俾我，叫我食咗飯食埋佢喎。 

等到夜晚沖涼，我真係為咗速戰速決，好快咁搞掂返上床休息，順便㩒手機。 

順便同佢講，我終於捱過第一日。