[愛情] 心連心 (粵語): 2. 第一日
我行埋佢度，發覺我係同佢一樣咁高，我跟住拍佢膊頭。
當佢擰轉面同我對望嘅時候，佢個樣話俾我聽佢好意外。
我問佢：「你個名係咪叫王子恩？」
佢話：「係呀。」
我即刻同佢講：「我都係叫王子恩。」
同一時間我喺度諗，咁即係話有兩個我？
因為我覺得我變咗女仔，自然有人會變咗我做男仔。
哩個方式諗比較合理，比較有邏輯。
咁樣，哩一刻嘅我又係邊個呢？
喺我仲未諗完嘅時候，佢話：「我知道晒你身上所發生嘅事。」
點解佢都咁講？我都開始發現，我係慢慢知道我身上嘅女性身體嘅事。
佢話：「我都唔知點解會發生交換身體哩樣嘢，我哋都係要一齊諗吓究竟係咩一回事。」
佢都好冷靜，唔似係有種人，會一直話：點算？點算呀？
我同意佢咁講，好彩我哋都好冷靜。
另外，我好似佢咁講，對哩個新身體嘅嘢慢慢會知道，冇任何唔知道嘅事，如果當我想知道某一樣嘢嘅時候，喺係同一時間，資訊就喺腦海出現。
所有嘢係好自動，直接了當。
我哋亦都有一齊返戲院，試吓有冇方法換返身體番嚟，但係結果都係冇用。
時間一分一秒咁過，佢突然話：「咁我哋先攞咗大家嘅聯絡方式先，返屋企再睇吓，如果再有啲咩事發生嘅話就第一時間通知對方。」
我心諗，暫時都冇辦法㗎喇，唯有見步行步啦。
我哋攞出手機，大家都係智能手機，有咩唔方便吖，我哋互相交換咗whatsapp。
跟住我哋同一時間問對方：「妳/你係咪知道點返屋企？」
我哋同時笑咗笑，好似身體調轉咗唔係一件咩大事咁。
跟住我哋又點一點頭，佢又問：「駛唔駛我送妳返去？」
我話：「唔駛，我都想知係咪所有事情都係自己操控到，我想試吓一個人。」
佢冇意見。 我哋跟住各自返屋企。 當我開始想諗返屋企嘅方法嘅同時，我係第一時間知到要點。
唔駛load機，直接行去地鐵站。
由上車、落車、之後要行嘅方向，我完全覺得好自然，係屬於自己嘅，亦都唔需要記。
我入到𨋢嗰陣，就算㩒樓層都係好自動波，34樓。
一出電梯，好自然走到B室，攞出鎖匙打開門。
一入屋雖然第一眼就知道未見過，但係就好自然咁走入去，成問屋嘅資訊即時有晒。
仲要係，竟然俾到我有屋企嘅感覺。
跟住一把女聲由廚房轉出：「女，依家先返嘅，肚唔肚餓呀？」
阿媽由廚房行出嚟，佢話：「唔駛講啦，妳去沖涼先，我煮少少嘢俾妳食。」
我好自然咁攬住佢：「咁該阿媽。」
佢笑一笑：「妳將啲衫記得放好佢呀，次次將啲內衣放到同啲普通衫一齊。」
我伸一伸脷：「係嘅係嘅。」
我直入我間房，順眼見到阿爸喺房：「阿爸我返咗嚟啦。」佢點一點頭。
我一打開衣櫃，啲衫褲style好簡單，主要係短褲短裙為主。
梗係啦，同我一樣有175咁高嘅女仔，一定會show盡對長腿。
仲有一張化妝枱仔，上面其實都係一啲女仔常用嘅嘢，保養品化妝品咁。
其實同我家姐用嘅一樣。
係喎，咁哩個女仔係有一個阿哥，咁咪同我屋企啱啱相反囉？
我伸手去攞衫嗰陣，我停咗一下。
係喎，我已經係女仔，內衣嘅話...
我唔算係未接觸過女仔，但係哩次變咗係自己用嘅，有啲怪怪哋嘅感覺。
我走入浴室，打開花洒，開始沖涼。
先洗頭啦！ 我望到有唔少沖涼洗頭用品，其實一望都知我係用邊隻。
直到有人喺門口嗌：「妹，我要去厠所呀，妳可唔可以快少少㗎？」
我快手沖埋個涼，著咗衫一打開門，阿哥就衝咗入去。
喺房，我撥一撥啲頭髮，心諗：短髮真係好，可以唔駛吹，就算係女仔嘅我，其實都好好睇啫。
我跟住做埋面部保養之後，行出廳坐底咗喺梳化度。
阿媽佢嗌我：「女，碗麵喺飯枱，妳食啦。」
係喎，可以食嘢嚕。
我三扒兩撥食咗個麵之後，阿哥先由廁所出嚟。
我終於見到佢個樣：基本上係個普通男仔，斯斯文文，仲高過我，都有米八咁高。
佢見到我啱啱食咗嘢：「妹，妳咁晏仲食，唔驚肥呀？」
佢把聲係勁似某個男歌手！
我笑住話：「最多咪做多少少運動。」
我將碗筷洗埋之後，坐返喺梳化。
哩個時候，阿哥返咗房，阿爸阿媽都係房度，我就可以清楚啲望一望間屋。
睇起上嚟其實個女仔家庭背景都唔差，三房一廰，九百呎咁上下，都算係有錢人嗰種。
起碼我間房係可以有個細衣櫃同埋放得落張個枱，都係咁㗎喇。
我望一望個時間，都係返房睇吓個女仔生活係點先，唔知有冇男朋友，同埋朋友多唔多。
其實哩啲答案都可以喺手機度知道，頭先返屋企嗰程我應該睇吓手機，但係我完全冇睇，淨係掛住睇外面。
係喺哩個時候睇就最啱㗎喇。
返自己房，順便睇吓間房會有啲咩。
頭先掛住睇衣櫃，其實都冇咩留意其他嘢。
我返房坐喺張床，先知道原來同普通女仔一樣。
張床有幾個公仔，間房基本色系係以黃色為主，係好柔和嗰種黃。
個枱仔下面有一個放置箱，我一打開，裡面有唔少雜物。
有手錶、飾品、電子產品，跟住我見到有三四封信放喺邊邊位。
我打開咗其中一封，都仲未開始睇，我個身體反應係第一時間喊咗出嚟。
個女仔啲資料第一時間湧入我腦裡面。
原來係一個前男友俾佢嘅信， 一封離別前嘅信。
我知道個女仔同佢感情好好，但係個男仔唔專一，最後佢係辜負咗個女仔嘅所有感情。
我係一邊喊一邊睇，個心情好沈重，好唔開心。
我放埋封信，冇再睇其他嘅信，唔想個心情唔好。
我喺個自動資料系統知道咗個女仔拍過兩次拖，依家冇男朋友。
最好朋友嘅有三個，都係女仔，其中一個女仔係去到閨蜜嗰種。
哩頭講，手機就有訊息到：「紙巾，妳話過聽日去買衫，我可唔可以join埋呀？」
紙巾係我個中學花名（之後用自己嘅嚟講仲好，好過係咁講話個女仔），除咗哩個Jill謝伊莉（啫喱）好朋友咁嗌我之外，仲有就係Selene陳櫻雪（小櫻）。
我哋三個係喺中六開始識嘅好朋友，到依家我哋都係讀緊同一間大學，今年係senior。
係喎，我係有同啫喱提過聽日去買衫，佢可以同我一齊去就求之不得啦。
我回：「ok呀，咁妳想唔想一齊食埋個晏？」
佢秒回：「好呀，要唔要嗌埋小櫻呀？」
我回：「都好喎，我喺group度講啦。」
所有嘢，係好自然，哩個女仔嘅所有嘢，我係完全係繼承咗過嚟。
我喺group度講：「聽日十二點觀塘站等，你哋預埋食晚飯啦。」
佢地秒回：「收到！咁聽日見。」
我打開度門：「阿媽，我聽日約咗啫喱同小櫻行街，唔返嚟食啦。」
阿媽即回：「知啦，唔好咁晏返呀。」
我話：「知啦。」
我返番張床坐喺度，呆咗一下，我發咗個訊息俾另一個自己：「我已經見晒屋企人，聽日同啫喱小櫻去街。」
等咗一陣，佢回：「我都係呀，好多嘢好自動咁知道咗，唔似係陌生，好自然，只係有啲唔慣個身體啫。」
其實都係嘅，點會第一時間可以適應到。
佢又回：「係呢，我個身體，你應該冇做啲咩㗎呵？」
我回：「要沖涼㗎嘛，點都會掂到嘅，你都有沖涼啫？」
佢回：「咁又係，我都唔係冇經驗，我其實沖涼嗰陣有試過，個感覺好奇怪。」
我回：「其實妳有冇諗過睇吓有冇方法換返個身體？」
佢冇即刻回：「完全冇idea，上網睇都係講話睇吓我哋交換嘅地方有咩特別，可以由哩個出發點試吓咁囉。」
係嘅，哩啲超自然嘅嘢，邊有人真係可以解決到，拍戲嘅就話簡單，現實又係咪真係咁簡單呢。
我回：「咁我哋有時間就約出嚟啦，傾吓可以點做。」
佢回：「咁好啦，嚟緊後日阿爸生日，你聽日出去，咁大後日見？」
係喎，阿爸生日囉喎，但係我依家嘅身份，真係冇計。
我突然間好想換返個身體，因為我做唔到我本身可以做嘅嘢。
佢唔見我回：「你冇事吖嘛？」
我回：「冇，始終妳係過緊我嘅生活，我覺得好似對於本身自己嘅事咩都做唔到啫。」
佢隔咗一下先回：「係嘅，我都好掛住我本身個屋企，但係依家冇辦法，唯有大家過住對方嘅生活先啦。」
其實我都好想同我家姐傾，因為佢對我真係好了解，同埋佢分折能力好強。
我問：「我屋企人冇嘢嘛？」
佢回：「好好，尤其係你家姐，對我好好。」
我笑：「梗係啦，我家姐真係一個好家姐，我哋嘅關係唔差㗎。」
佢回：「完全理解同感受到，係哩，我屋企嗰邊點，有冇咩特別？」
我回：「冇咩特別，一樣完全好自然，根本係自己嘅屋企人感覺，我依家開始覺得哩個係我嘅新生活。」
佢回：「我都好明你哩個感覺，因為我一返到嚟，係冇任可唔妥，唔陌生，我係過緊你嘅生活，但係又係屬於我嘅。」
我回：「完全明白，怎至我依家諗緊，就算如果我哋換唔返嚟，其實唔會對任可人事物都有影響。」
佢回：「係呀，我都有同一樣嘅感覺。」
我哋同時間冇再講任何嘢，停咗一段時間。
之後佢回：「如果，真係返唔到，不如，我哋試吓一齊？咁樣，我哋都仲可以同自己屋企人見面。」
我俾佢個如果嚇親，因為我完全冇喺哩個方面諗過。
係嘅，雖然我係唔可以再生活返喺我本身嘅屋企，如果我哋一齊，佢咪可以帶我返去囉？又可嘗唔係一件好事。
但係，我同佢之間，真係可以一齊咩？
我回：「見面再講啦，我都唔知，而妳個建議唔係唔好，但係我又唔知我哋夾唔夾。」
佢回：「咁好啦，見面再講。」 我心諗，如果係咁，我咪係同自己拍拖？好奇怪嘅諗法。