[愛情] 心連心 (粵語): 1. 開始

我同朋友約咗食晚飯，食咗飯之後我就自己一個走咗。 

跟住我自己一個人走咗去睇戲，雖然套戲好一般，娛樂性都算合格嘅。

睇完戲我走嗰陣時比較急，我竟然留低咗件衫喺戲院裏面。 

當我發現嗰陣時我即刻返入戲院裏面，我問工作人員件衫喺邊。 

佢哋同我講件衫仲喺度，我即刻攞番件衫就走。 





我著返件衫上身之後我第一時間摷下件衫仲有啲咩，有冇唔見嘢。 

我發件衫裏面啲嘢同我本身有嘅嘢唔同，雖然都係有手機銀包鎖匙，但係唔係我嘅。 

當我攞張睇身份證出嚟睇嘅時候，個身份證上面嘅相係一個女仔。 

呢個時候我即刻望一望自己，唔係呀話我幾時變咗個女仔㗎？ 

我膽粗粗咁即刻入咗女洗手間。 





真係唔係講笑，我個樣係好似用咗變性app咁變咗女仔，頭髮冇變長、高度冇變，比起普通嘅男性嘅壯大身軀，反而就變咗女性嘅苗條身軀。 

我發覺啲衫褲鞋襪仲啱著，但係就鬆身咗少少。 

我一直唔敢開聲，因為我唔知道我把聲有冇變度。 

但係我諗咗兩諗，我終於開聲試下。 

呢把聲係我唔熟悉嘅聲，至少係唔屬於粗獷，俾較似陽光類型嗰種，正常女仔聲。 





然後我又諗咗一諗，咁究竟身份証係上面嘅係我？ 

我即刻打開個銀包攞咗個身份證出嚟睇，竟然個名係同我一樣，王子恩。 

咁又係嘅，我個名可男可女。 

睇睇吓，其實佢就連個樣都同我有七八成似樣，一樣短頭髮嘅。 

我再諗一諗，咁本身嘅我去咗邊呀？ 我覺得唔係我變咗女仔，應該係同佢調轉咗身體。 

我即刻出咗戲院，周圍四處咁搵一個同我差唔多樣嘅人。 搵咗我大概幾分鐘，終於見到自己。