只想和你愛一次: 40. 確認

由於女hall對男生進入有嚴謹規訂，避免麻煩Elven就只是在hall樓下等待Rachel和她的宿友把一箱又一箱的物品搬出來。看見已經搬得七七八八Elven便幫手call了雞記，然後再幫手把所有物品搬上車尾。
 
「你一個女仔都幾多嘢搬㗎喎...」車上Elven調戲Rachel。
 
「咁女仔梗係多嘢啦，而且唔經唔覺都住咗三年，越儲越多嘢好正常啫！」Rachel拒絕承認。
 
Elven:「係嘅係嘅...點呀，有無好唔捨得呀?」
 
「咁梗係有啦，你都經歷過㗎喎，之後就無得咁自由喇...」Rachel充滿不捨望著窗邊。
 




「咁我都真係好明白... 幾時返工?」Elven改變話題。
 
「下星期就返喇...」不知是因為Daniel的事還是籃球順利奪冠少了留戀，又抑或是其他原因，這世Rachel沒有選擇續讀一年碩士。
 
二人閒聊著很快貨Van便到了Rachel家門口。
 
「估唔到因為咁有機會上你屋企~」Elven略帶期待地說。
 
Rachel:「哈，其實我哩幾年都唔太多返嚟啦…」
 




「你屋企有無人?」若會看見細伯伯母Elven也需要有點心理準備。
 
Rachel:「無呀，我爸媽都要返工，哩幾年唔駛理我好似大家都慣咗更加夜返添呀…」
 
Elven:「可能今晚知你返黎早啲返嚟陪你呢~」
 
「唔會囉!啱啱阿媽先message我叫我今晚自己攪掂...」Rachel微微扁嘴。
 
「原來你咁可憐係喺缺乏父母愛護同家庭溫柔下嘅環境成長…」Elven說笑拍著Rachel的頭安慰道。
 




「無錯… 所以我要變壞做個壞女孩!」Rachel淘氣說道。
 
說笑期間Elven幫Rachel把一箱又一箱東西搬入屋內， Rachel的屋企很簡潔，雜物不多，設計帶北歐風格，一看便知是小康之家。
 
「哩幾箱你幫我直接搬入我房呀唔該~」Rachel指揮道。
 
「你唔駛執下間房先?」Elven禮貌上問了一問。
 
「唔駛!我一向已經好整齊~」Rachel略帶自豪說道。
 
「收到收到~」
 
放好了物品，Elven開始仔細打量Rachel的房間，不過就在四處審察時，他在一個飾物櫃裏看見了之前自己之前整的銀包。
 
「之前驚喺hall會唔見，所以咪拎咗返嚟擺囉...」Rachel的聲音從後發出。




 
「但你專登放哩度仲搵個架托住佢都真係好比面喎!」看見Rachel對這銀包珍而重之地保管，Elven有點感動，走到她背後從後抱著她。
 
「因為佢對我好有意義... 你記唔記得因為佢嗰晚我地爭啲一齊比車撞死? 嗰陣就算我地唔係識咗好耐你已經好傻咁即刻用自己身體保護住我...」Rachel合上眼倚傍著Elven身上，回憶著當時發生的一切。
 
「當然記得，嗰陣我無諗咁多，淨係有個感覺自己有事都唔可以比你有事...」Elven同樣進入回憶畫面。
 
「或者由嗰陣開始，我對你已經唔係純友情咁簡單...」Rachel深情地說出。
 
「原來你嗰陣已經比我感動到~」Elven有點沾沾。
 
「當然之後仲發生咗好多事啦...不過依家諗返，如果所有嘢係喺我同咗Daniel一齊後先發生，我又未必會中招…. 所以都唔知係咪你一開始已經立心不良~」Rachel微笑著說。
 
「如果我同你講我由教會第一日見到你開始，我對你已經有種好特別好親切嘅感覺，好似我地一早已經識咗好耐咁，你信唔信?」Elven突然入了認真mode。
 




「信呀，因為我都係一樣...」Rachel輕描淡寫地答道。
 
Elven:「所以我信有啲嘢係命中注定，甚至嗰次無啦啦突然會心血來潮應承Susan返教會，都係天意安排... 哩個所謂一年考驗，由day1其實我就知唔會有任何作用，不過我需要一個証明同說服自己嘅理由...」
 
「Elven...」Rachel感動。
 
「比啲時間我，我會處理好Ada嘅事…」Elven沉聲說道。
 
「你肯定要咁做?」雖然高興，但Rachel亦不想Elven貿易決定然後後悔。
 
「嗯… 哩一年我真係認清咗答案喇… 但我真係好對唔住佢，佢為我放棄同付出咗太多…」Elven 充滿內疚和自責地說。
 
「我都好對佢唔住…」Rachel完全理解亦深有同感。
 
「咁… 你可唔可以都對我坦白?」Elven又柔聲說道。




 
「嗯… 其實喺琴晚決定見你之前，我已經同Daniel講咗分手，不過唔想好似比壓力你咁，所以無同你講…」Rachel緩緩說道。
 
「竟然? 咁佢有無嘢?」對此Elven有點意外。
 
「佢話都係要啲時間但又好似早有準備咁… 咦?你本身唔係講哩樣嘢?」Rachel也有點意外Elven意外。
 
Elven:「唔係呀…本身想講我知我發燒嗰日係你一直喺房陪住我…」
 
「你…點知㗎?」想起當日發生的事Rachel有點難為情。
 
「Jacky今日唔小心講咗我聽，而且我仲知嗰日我地應該係發生咗啲咩… 點解你要暪住我?」Elven問道。
 
「嗰次係一次意外，我唔想你因為咁有負擔… 而且知又點? 只會令我地三個人尷尬同傷心，你又實會背負住內疚唔知點算，我唔想因為咁影響到你啲咩呀… 與其知道後大家難受咁不如當係一場夢咩都無發生過咁仲好啦…」Rachel解釋。
 




「但咁對你好唔公平…」知道後Elven確實感到內疚。
 
「唔通咁對Ada又好公平? 我已經好對佢唔住… 唯一係真係便宜咗你哩個咸濕仔!」Rachel最後故意笑罵道，希望能減輕Elven的內疚。
 
「我根本就完全無印象…唔係果個紅印我其實都唔會估到…」Elven苦笑想開脫。
 
「我已經盡力洗㗎喇! 又無可能換咗成張床單佢…」Rachel抓狂。
 
「傻瓜… 」Elven抱緊Rachel憐借地說。
 
「哼!」Rachel裝作生氣。
 
「不過其實我接受唔到我地嘅第一次係喺我完全無印象嘅情況下發生…」Elven把頭靠緊Rachel耳邊說道，語氣突然帶點淫邪。
 
「咁你想點…」察覺到Elven的不對勁，Rachel想從他懷內逃走，不過Elven自然不充許，用力把她緊緊抱著。
 
「我想同你… 重溫舊夢~ 今次我要好清醒咁記住嚟緊發生嘅事…」說完便吻了下去。
 
Rachel想掙扎，但伴隨著這吻，想起這一年的痛苦，她開始軟化，雙手慢慢由想推開對方變成抱緊對方，然後沒人再能阻止之後發生的事…
 
而過了不知多久，隨著二人亳無保留的親密接觸，封印的記憶再一次在二人腦海中綻放。