只想和你愛一次: 33. 比賽落幕

時間繼續一日一日地過去，那晚後，Rachel在醒來後果然完全記不起最後發生過甚麼事，而Elven亦沒主動提起，只是笑Rachel易醉飲幾口啤酒便醉到不醒人事。二人之後雖然像沒事一樣仍保持著友好的關係，不過Rache卻l總是有種感覺二人之間好像多了一層隔膜，解釋不出原因，就只是覺得Elven對自己好像有點不同了... 是疏遠了? 又或者說是他身上彷彿多了一層保護罩?Rachel不能確定。
 
足球隊最後跟原本世界一樣，憑著Elven的戰術加上些少運氣奇蹟打敗了W-hall奪冠，自此Elven Wong這名字在inter-hall運動界成為了近乎傳奇的名字，只要是玩運動，提起這名字沒有人不寫個服字。而Elven在完成所有目標後亦終於得到休息的時間，開始投入回學業和花多了時間陪伴Ada。
 
「以後我可以多啲時間陪你喇，多謝你哩兩年一直以嚟對我嘅包容同埋耐性，係咁縱容我呀…」這晚和Ada晚飯完後，Elven和她來到尖沙嘴海邊散步，突然有感而發。
 
「每個人都係得一個大學時間，係最後可以全心全意玩樂嘅日子，出嚟做嘢後就唔會再過到哩啲生活㗎喇，所以我唔想你第日後悔或者遺憾… 至於陪我，我地仲有一世嘅時間㗎嘛，係咪?」Ada善解人意地說道。
 
「得妻如此，夫後何求?」Elven情不自禁把Ada抱進懷內。
 




「邉個係你個妻呀，無人話嫁比你喎!」Ada話雖然這樣說，但臉上燦爛的笑容足夠代表她心裏是千萬個願意。
 
「你啱啱先話我地仲有一世時間喎，唔嫁比我仲有邊個?」Elven笑著揭破。
 
「衰人!一世就要嫁比你㗎喇咩?」Ada拍了Elven心口一下然後繼續狡辯。
 
Elven沒有再回答Ada直至封上了她的嘴唇。
 
 
良久，二人就這樣靜靜地望著香港的夜景。




 
「不過我地大學生活好快就完喇，跟住就要出嚟做嘢面對哩個殘酷嘅世界…」Ada突然說道。
 
「係啦…好唔捨得大學同宿舍生活…」Elven深有同感。
 
「我都係，想像唔到要搬返屋企住嘅日子係點... 不過我睇你最唔捨得係Rachel咋掛…」Ada突然展開醋意攻擊。
 
「點會呢…」Elven帶點心虛。
 
「話時話…知唔知佢同Daniel依家點?」Ada帶點試探口吻問道。




 
「之前好似係有啲問題，但依家應該無咩嘢掛? 近排都無咩聽佢提起。你喺大學有無見到Daniel?」Elven答道。
 
「間中撞過幾次啦… 算啦，都係唔好講佢地 ，我地去食糖水啦~」Ada眼神突然有點閃爍，然後轉掉了話題。
 
「好呀，我突然都想食心太軟~」Elven很順攤地同意。
 
 
隨著final exams 和FYP的落幕，Elven和Ada的大學生活亦正式踏入倒數階段，這時Rachel已正式接手籃球隊成為新一任隊長，而Elven亦沒有食言在足球比賽完結後不時還會和她落街場練波。
 
這晚練習完後兩人拿著水坐在場邊休息。
 
「少打咗真係就嚟唔夠你打喇…」Elven還帶點氣喘說道。
 
「係你哩排太少運動狀態差啫~」Rachel笑笑口回應。




 
Elven:「嗯… 唔知仲可以咁同你打多幾多次波呢? 希望我走前你可以真正咁贏到我一次啦~」
 
「突然講啲咁傷感嘅嘢㗎， 我會唔捨得㗎嘛…」Rachel聽到後扁嘴。
 
「傻瓜，唔好扮cute喎~」對此Elven恥笑道。
 
「邊有扮啫，人地真係唔開心嘛!」Rachel抗議。
 
「係呢，你近排同Daniel點呀? 好似好耐無聽過你update喎。」想起上次Ada的問題，Elven便問道。
 
「都無乜點呀，時好時壞囉~ 我都慣咗好嗰陣就好，唔好嗰陣就等佢自己冷靜完變返好…」Rachel平靜中又帶點落寞答道。
 
「嗯…搵到大家相處舒服嘅pattern就得啦~」雖然Elven覺得這有點消極，不過心虛的他覺得自己不適合評論甚麼。
 




「咁你同Ada呢? 近排多返時間得閒兩個感情應該更好啦~」Rachel乘機反問道。
 
「係見返多咗呀，不過一齊咗咁耐都無再話咩感情更唔更加好啦~」Elven潛意式不太想告訴Rachel自己和Ada的感情狀況。
 
「因為不嬲都咁好~」Rachel心底實質卻有點酸。
 
「轉眼間Ada返咗黎都就快兩年，你同Daniel又一齊咗兩年，時間過得真係好快…」Elven又突然慨嘆。
 
Rachel:「開心嘅時光總係過得特別快嘛~」
 
「所以你哩兩年過得好開心?」Elven問。
 
「嗯!」Rachel望著Elven強而有力地回答。
 
「咁就好~」




 
 
開心的時光確實過得特別快，只是沒人會想到兩星期後所有的事情都產生了急劇的轉變。