只想和你愛一次: 30. 先知Elven
「Here?」這晚Rachel MSN Elven。
Elven:「Yes ar」
Rachel:「我啱啱同Daniel嘈完大交呀...」
Elven:「發生咗咩事?」
Rachel:「上次其實都想同你講，近排同佢好似越嚟越少嘢講咁，.好多時見面都相對無言，然後要格硬搵啲嘢講...」
Elven:「幾時開始㗎?」
Rachel:「感覺應該係佢上咗大學後無耐開始，初初都係輕微狀況，但近排就好似越嚟越嚴重...」
「可能係大家生活圈子同摸式都唔同咗好多，大家都唔太get in到對方嘅生活，得唔到共鳴結果就越嚟越唔想講?」Elven嘗試找出原因。
Rachel:「可能啦...感覺佢一無mood對我就好冷淡，有時同佢講嘢都無咩反應，慢慢攪到我都無埋嘢講... 前排我同佢傾哩個問題，佢話佢會留意，會努力改善，不過今晚同佢食飯，情況又係咁，可能我唔開心個樣有啲面黑，跟住佢就嬲咗我，我從未見過佢咁嬲㗎...」
Elven:「咁佢有無講嬲啲咩?」
Rachel:「嬲我睇唔到佢嘅努力，嬲我成日唔開心，嬲我為哩啲野黑佢面...佢最後仲話不如大家暫時唔好見住冷靜下先，我好驚呀...」
「唔好驚住先，要冷靜下先其實好平常，男仔同女仔始終有啲唔同，好多時需要自己靜下解決問題，最緊要係你見唔見到佢有努力緊先?」Elven嘗試安慰道。
Rachel:「咁有時都有嘅，但真係一時時好睇佢心情...」
「佢近排會唔會有其他嘢煩緊?」Elven嘗試再思量有沒有其他外在因素影響。
Rachel:「有時見佢心情都唔太好，佢屋企係有啲事煩緊，但又唔太想我involve...」
Elven:「咁咪係囉，比啲時間佢啦，佢冷靜完諗通咗就會搵返你㗎喇~ 」
Rachel:「係咪真㗎?我驚有排都等唔到...」
Elven:「5日，最多5日我肯定佢會搵返你!」
Rachel:「真係? 唔好氹我喎!」
「信我啦，唔好睇少佢對你嘅感情先得格~如果最後佢無嘅我應承你任何一個能力範圍內嘅願望或者請求!」Elven寫下包單。
「哈，好呀，你話㗎!」Elven的定心丸明顯有效，Rachel心情好回不少。
(Daniel我為咗氹你女朋友講到咁大你唔好令我失望呀...) Elven心裏卻暗地在想。
「而且真係唔駛驚喎，上面仲有個大佬睇住你㗎嘛，唔係咩?佢自有佢嘅安排㗎啦~」驚效果不夠Elven再把耶穌拿了出來。
「係係係~ 多謝你呀，同你傾完我心情好返好多喇...」Rachel真心多謝Elven。
Elven:「客咩氣呀，我講過我永遠係你最強後盾㗎嘛~」
「我應該真係要好好感激Susan令我認識到你，雖然識咗你都未夠兩年，但成日感覺好似都係far longer than that...」Elven窩心的說話讓Rachel也變得感性起來。
「成語都有講一見如故嘛~ 人同人之間嘅感情有時真係好奇妙好難解釋... 有啲人明明可能只係認識相處咗一段短時間，但偏偏就一世都忘記唔到...」Elven忽有所感。
「嗯...不過你講緊邊個? 電視劇?」Rachel突然有種同感，但又好奇Elven意指是誰。
「哈哈，唔知呢...亂up啫~」Elven也不知道自己為甚麼突然會說出那句說話。
一日復一日，正當Elven也開始擔心自己拍心口保證的事沒有發生時，幸好Daniel最後亦沒讓Elven失望。
「先知Elven，真係比你講中! 佢啱啱搵返我仲同我係咁say sorry添呀~」在第五日Rachel MSN Elven。
「呵呵~都話無點你㗎啦! 不過都要徹底解決個問題先得㗎，如果你見到佢真係有努力，就算outcome未必係最好，都要比下appreciation佢呀，唔係佢會覺得努力咗都得唔到任何認同會frustrate，然後又無心機繼續努力㗎喇...」Elven放下心頭大石。
Rachel:「知道!」
Elven:「乖喇~」
Rachel:「明天你籃球隊第一場喇喎，預備成點呀?」
「對手唔強，應該無問題嘅~」Elven滿有自信。
Rachel:「Annie已經捉咗我明天陪佢睇喇...」
「你好似好唔願意咁喎...」Elven表示不滿。
「邊係呢~梗係要嚟捧師傅場啦~」Rachel態度立刻180度改變。
第二天的比賽，跟正史一樣在Elven和Jacky努力下C-hall完全展輾壓對手大勝60:28，成為了奪冠大熱，不過當比賽完結後Elven卻發現Annie身邊沒有了Rachel的身影，心裏有微微的失落感。
「你今日好勁呀!」晚上Rachel msg Elven。
「對手唔強嘛... 不過比賽完唔見咗你嘅?」Elven襯機問道。
Rachel:「因為約咗Daniel所以睇完第三節我就走咗lu...」
「果然係有異性無人性呀下~」雖然裝作不介意但其實Elven有微微的失望。
Rachel:「見你地領先咁多都實無問題啦~」
「咁同佢食飯開唔開心呀?」Elven關心回Rachel。
Rachel:「開心~大家都主動講返多咗嘢~」
Elven:「咁就好~ 之後大家一齊努力入決賽啦!」
Rachel:「好!」
接下來L-hall和C-hall都越打越好，首先進入決賽的是Rachel的L-hall。而當C-hall準決賽的前一個晚上，Rachel卻突然主動找了Elven出來。
「依家得唔得閒落一落嚟樓下?」
Elven:「得呀，做咩?」
Rachel:「有嘢想比你呀，五分鐘後見~」
碰面後Rachel拿了一個紙袋給Elven。Elven打開一看是一個新買的足踝護踠。
「護踠?」Elven驚奇問道。
「係呀，你明天比賽戴住佢啦!」Rachel用半命令的語氣。
「但我都無帶一段時間喇喎...」Elven有點猶豫。
「戴啦，唔知點解我有啲唔太好嘅預感，你當係上次應承我會滿足我一個請求啦。」Rachel用半氹半求的語氣。
「但上次係我贏咗喎...」Elven抗議加澄清。
「我唔理呀! 你乖乖地戴啦，好無?」Rachel索性不講道理。
「好好好...多個保護都好嘅~ 多謝!」感受到Rachel一番心意Elven也不再拒絕。
「乖喇!」
「咁除咗哩個仲有無其他鼓勵?」Elven又口花花調笑道。
Rachel:「哈，你仲想要咩鼓勵?」
Elven:「唔知呀，可以刺激下我士氣嘅嘢囉~」
Rachel:「鼓勵留返你拎冠軍先比你啦~」
Elven:「又好~」