只想和你愛一次: 29. 賽季開始

這天是Interhall-Aquatics Meet，由於要一班業餘軍游贏U-Team是不可能的任務，所以Elven的C-Hall只能像原本世界一樣屈居第三，幸好在最後的接力賽亦一樣仍能保持奪得一面銅牌。
 
而有一點和上世不同的是Ada今天坐上了C-hall的觀眾席。看著Elven 在水裏的英姿，Ada不期然想起中學時的水運會，那時的Elven差不多橫掃學校的所有獎項，風頭一時無兩，因此不知俘虜了多少女同學的心，但那時的他卻唯獨看上了自己，想到這處Ada的嘴角亦不自覺微微向上揚。不過那麼多年前的事，感覺已經有點遙遠， 而今天的Elven只能在八強位置苦戰，他的心情亦明顯不是太好…
 
「唔緊要啦，你都盡咗力咯... 比賽總係有輸有贏㗎啦~」Ada一場來到，比賽後Elven雖然累和心情欠佳但仍然和她在西環一起吃晚飯。
 
「雖然係預咗，不過始終花咗年幾心機喺入面，見到好多隊友最後都係拎唔到standard，點都有啲失落同埋替佢地難過…」Elven苦笑著說道。
 
「我相信佢地點都有佢地嘅得著嘅~就算無standard，至少佢地游水應該都比以前快咗好多!」Ada繼續鼓勵Elven。
 




「都係嘅，多謝你今日專程嚟睇呀~」看著Ada一臉關心，Elven還是打起精神和Ada說話。
 
這晚Ada本身想留低過夜陪伴Elven ，不過Elven以太累和想自己靜靜為由勸服Ada回家。回到hall躺在床上，Elven又想起今日一幕又一幕的畫面，內心充滿著惋惜和不甘心，想著想著，電話突然震了一震，是Rachel的SMS。
 
「知你今晚實唔開心… 不過你自己都講過練一兩年水係無咩可能游得過人地練咗十幾年嘅U-team，所以你今日做嘅achievement已經係好犀利!唔好忘記今日宣佈你地拎第三嗰陣全場嘅掌聲，我相信佢地係真心欣賞同敬佩你地嗰種精神~
 
另外我想講你聽你今日游水真係好型呀! 雖然你未必係最快果個，但我感受到你係真係作為隊長咁帶住一條team，而其他隊只係個別選手組成嘅一個團體... 唔開心埋今晚好喇，嚟緊仲有兩條teams等你帶領㗎!」
 
「哈哈，多謝你! 放心啦，我其實都係為啲隊友唔開心多過為自己…始終好多努力咗咁耐最後standard都拎唔到好似白廢晒之前啲血汗咁， 不過比賽從來都係咁現實嘅…」Elven回覆。
 




「我相信佢地失望最主要係因為覺得辜負咗你嘅努力同期望， 佢地自己最清楚你到底花咗幾多時間同精神喺佢地身上… 如果你唔駛理佢地淨係理你自己，個人項目你可能都可以拎到三甲啦! 所以佢地都係同你一樣唔係為自己而係為對方唔開心。唔好咁執著啦，問下自己如果早知結果係咁你初初會唔會就唔去做? 仲會嘅話咁咪即係代表你都覺得唔係完全無得著囉~除咗結果，仲有好多嘅嘢值得去treasure，例如你同隊友嘅感情，共同經歷等等…」Rachel繼續安慰Elven。
 
 
「嘩… 你突然間咁識安慰人嘅? 聽完你講我真係無晒事咁喎!」確實Rachel的安慰對Elven起到了作用，這刻彷佛自己和Rachel好像調轉了大家慣常的角色。
 
「哈哈! 係你成日睇少我咋嘛~」其實Rachel也不知道自己為甚麼突然這樣識講道理，有點感覺是另一個意識透過自己的嘴巴把想說的話說出來。
 
「真係以後都唔可以再睇少你呀下~anyway，多謝! 就快到你喇，你都要加油呀!」Elven變回正面Elven。
 
「我其實有啲緊張…  因為本身year 3個PG會去exchange，所以我好大打機會係正選…」說起自己Rachel也變回原本的自己。




 
「打正選咪好囉! 唔通想打後備咩? 唔駛緊張喎，比啲信心自己! 而且就算你對自己無信心都應該對我有信心啦，話晒比我秘密訓練咗你都差唔多一年!」Elven完全回復了自己的本色。
 
Rachel:「又好似係喎…哈哈…」
 
Elven:「比心機啦，嗰日想唔想我嚟睇你呀?」
 
Rachel:「梗係想啦!」
 
Elven:「不過我都要睇下得唔得閒先…」
 
Rachel:「...」
 
 
很多時候，信心和實力是互相掛勾，當你實力越高，信心自然越大。在原本的世界，雖然對手不強，但因為緊張的關係L-hall在比賽一開始是處於劣勢，直至Elven出現Rachel打回水準才刺激了全隊士氣最後反勝。




 
不過在今世，由於Rachel的實力得到大幅度提升，所以L-hall在一開始雖然仍有點緊張，但隨著一球又一球的得分，很快大家都投入了比賽並打出應有水準。Elven到場的時候，L-hall已經領先15-5，而當Rachel偶爾看見Elven出現在觀眾席時，臉上對他展露了一個甜甜的微笑，然後表現得更加落力和投入，彷佛要告訴Elven他這年的努力並沒有白廢。最後L-hall輕取對手60-25贏下第一仗，Rachel的表現絕對令人眼前一亮。
 
「今日勁喎! 越嚟越有大將之風喇你~」這晚Elven MSN Rachel。
 
「因為有你哩個師傅嘛~」Rachel很快回覆。
 
「睇得出背後最重要個原因，你資質果然唔錯，為師好開心~」Elven繼續Elven style。
 
Rachel:「哈哈，你真係好低能呀~」
 
「咁講返正經啦，你依家實力其實無咩問題㗎喇，我都無咩可以再教你，只係擔心你精神同心理質素上嘅層面啫，假設打緊逆境波又或者面對係類似最後一射嘅壓力等等，你覺得自己可唔可以發揮返正常水準?」Elven突然轉回認真mode。
 
Rachel:「我覺得唔得...咁精神層面上可以點練? 係咪好似漫畫咁搵啲比賽專登落後好多然後比壓力自己要追返?」
 




Elven:「你睇得漫畫太多喇...雖然我覺得咁係有用，問題係係咪真係要搵咁重要嘅比賽嚟較飛?最後追唔返就真係無㗎喇喎... 所以哩個方法係有用但同時都好risky。 哩樣嘢其實我覺得係睇天生同經驗, 有啲人真係天生大賽球員，但有啲又真係好易緊張影響表現。不過隨住比賽經驗越多，影響應該會越細嘅，始終中間實有啲比賽係逆境或者要面對壓力，每過一次都會升一個lv咁，所以哩方面會隨著經驗成長，當然自信心都好重要啦~」
 
Rachel:「所以我仲有好多嘢要跟你學㗎，唔好唔要我呀...」
 
Elven:「首先我自己都唔係特別叻，其次我都未諗到點幫你...」
 
Rachel:「我唔理! 你點都要幫我呀師傅大人....」
 
「咁無論點我都唔會唔理你嘅....」Elven由心而發。
 
Rachel:「所以話你對我係最好㗎!」
 
Elven:「咁大頂高帽呀... 論對你好我實唔及Daniel啦~」
 
Rachel:「其實本身都想同你講，近排我地都有啲問題... 不過今日唔想掃興喇，遲啲有機會先講你聽啦~」




 
「哦... 好啦，你好好enjoy開心下先啦咁~」雖然Elven很想知發生甚麼事，但亦確實不想破壞Rachel原本美好的心情，所以並沒有追問。
 
 
不過要發生的問題終會發生，一星期後的一晚...