只想和你愛一次: 15. 轉捩點 (一)

光陰似箭，日月如梭，轉眼間已接近sem尾，這天教會後Elven故意找了Daniel一起午餐，因為暑假就快到了，Elven覺得自己需要鞭策一下Daniel。
 
「你近排同Rachel點呀? 去海洋公園都幾個月前㗎喇喎，有無進展?」閒話家常完，Elven很快直接進入主題。
 
「無呀，自從我主動約返佢多咗後，大家依家就好似無晒嘢咁返返去以前咁friend囉，我其實間中都有講下少少過界嘢，但佢又好似無咩反應咁…」Daniel有點尷尬自己沒有盡力，又有點無奈Rachel沒甚麼反應。
 
「唉， 因為佢一直先入為主以為你唔會鍾意佢，所以咪咁嘅反應囉…」為了推他們一把，Elven終於把Rachel之前聽到他和教友的說話這事實告訴Daniel。
 
「原來係咁… 所以佢之前避開我都係因為咁? 即係佢對我應該都…有意思?」Daniel恍然大悟。
 




「哩個問題我代唔到佢答你， 你自己find out啦~」Elven一臉高深莫測地說。
 
Daniel:「嗯… 我會努力…」
 
「我可唔可以八掛問下，其實你係幾時開始鍾意Rachel?」Elven想了一想後突然問。
 
「嗯… 同佢friend咗咁耐，其實一直對佢都有好感，習慣咗佢喺我身邊…不過真係意識到鍾意，應該係會考之後，嗰陣我老豆過咗身，我一直扮無嘢直至有晚深夜我喺教會終於忍唔住爆咗… 然後出嚟嗰陣我就見到Rachel扮啱啱經過撞到我... 嗰陣咁夜正常人其實點會仲未走呀，所以我知佢係擔心我一直喺出面等緊我，但又驚我怕瘀所以好細心咁扮經過撞到我唔知我啱啱喊完… 嗰一刻我覺得哩個女仔好細心體甜又好溫柔，自此就越嚟越鍾意佢喇...」Daniel一邊回憶一邊說道，臉上還露出一個淺淺的笑容。
 
「咁Rachel都真係一個好好嘅女仔嚟嘅~所以咪話我唔提你呀，嚟緊佢入大學實有好多狗公埋身，你再係咁拖下拖下一陣佢比第二個追咗你就後悔莫及喇~」 Elven知道引子已經差不多便再下最後一道藥。
 




「你講得好啱，我都真係係時候要做啲嘢喇…」Danie突然如夢初醒。
 
「加油! 嗱，我講咗咁多野你聽，哩餐你嘅~」Elven拍了一拍Daniel膊頭說道。
 
不得不說，Elven要無恥起上來其實都真的可以很無恥。
 
 
當晚回到hall，Elven收到Ada的message。
 
「Honey，Sorry呀，你嚟英國嗰陣我同唔到你一齊返香港喇， 我有啲要攪要遲啲先返到去呀…」




 
「下? 點解呀…」Elven十分失望。
 
「問你一個問題先呀，你愛唔愛我?」話風一轉，Ada突然問道。
 
「傻女，梗係愛啦!」這是Elven完全不用思索的答案。
 
Ada:「有幾愛?」
 
Elven:「好愛好愛囉!」
 
Ada:「我都好愛你… 所以為咗你我其實落咗一個決定…」
 
Elven:「咩決定? 你唔好嚇我呀…」
 




Ada:「我…決定下年返黎香港讀書!」
 
「!!! 你講真唔係氹我?」Elven不太敢相信自己所見的message。
 
「其實哩個問題我諗咗好耐㗎喇… 一直我都想喺外國繼續生活，但我知對你嚟講要你去外國係好難好難… 只但係哩個問題唔解決，我地總有一日都係要面對現實分開。 復活假後返嚟後我一直諗應該點做，我真係好唔捨得你唔想同你分開… 所以為咗你我決定咗要返黎香港!
 
前排我一直send信搵香港啲大學，而琴日Poly肯比offer我仲比我直接讀year2添~  不過美中不足係HKU唔收我無得同你讀同一間大學lu… 所以我要攪掂埋哩邊啲手尾先走得唔可以咁早同你返香港呀…」Ada解釋。
 
收到這訊息，Elven感覺很矛盾。一方面他很開心不用再和Ada 分隔異地，但另一方面他亦很內疚Ada為自己作出如此大的犧牲，就好像為了自己因而完全放棄掉自己原本的理想生活，他很心痛亦覺得自己並不配Ada如此待他。
 
不想再用文字溝通他撥了長途電話給Ada。
 
「點呀honey，太感動所以要打比我?」聽得出Ada的語氣是很開心。
 
Elven:「真係好感動… 但點解唔同我商量下先呀?」




 
Ada:「因為我想比個驚喜你嘛! 同埋都驚到時如果無大學收我你會失望… 而且我知同你傾你實唔贊成…」
 
Elven:「你真係諗清楚? 我知你唔鍾意香港嘅生活，我唔想你將來後悔呀…」
 
Ada:「放心啦，我諗咗好耐諗得好清楚㗎喇，比起外國生活，我更加想要你喺我身邊嘅生活…」
 
「多謝你…」聽到Ada這剖白Elven知道若還糾纏下去，那只是代表自己不了解Ada。
 
Ada:「想報答我就用你嘅一生好好愛我啦~」
 
「一定會!」Elven強而有力答道。
 
 
 




“今日我收到人生最好嘅禮物~”
 
Rachel在睡前拿著手機碌facebook時看見了Elven的新post，於是好奇send了個message問他
 
「收到咩禮物咁開心呀?」
 
Elven:「你覺得有咩禮物可以令我咁講?」
 
「好難估喎…同Ada有關?」也許Rachel最想知的不是禮物本身，而只是這禮物與Ada有沒有關係。
 
Elven:「係呀~」
 
「你地結婚嗱!?」Rachel當然知道這不太可能，不過這會讓聽到其他答案時相對變得容易接受。
 
Elven:「哈哈，痴線㗎咩你… 唔係呀，啱啱Ada同我講佢決定咗下年返嚟香港讀書呀~」




 
「嘩…咁大個決定肯定係為咗你啦! 果然係最好嘅禮物喎~」明明心裏並不舒服，Rachel還是要強裝開心。
 
Elven:「應該係~ 不過我其實好內疚，好似自己誤咗佢嘅人生咁…」
 
Rachel:「咁每個人都有自己選擇嘅，或者佢覺得你比一切重要囉~」
 
Elven:「佢都係咁講… 所以唯有對佢好啲用一生去補償哩一切啦。」
 
「咁你記住以後當你地遇到有咩難關你都要成日咁提住自己呀!」雖然Elven的話給了Rachel一下重擊，但她還是盡了朋友本份去提醒Elven。
 
「多謝你呀Rachel!放心啦，我會報答你㗎~」因為心情大好，Elven不覺意透露了口風。
 
Rachel:「報答? 咩報答呀?」
 
Elven:「你應該好快會知㗎喇~」