只想和你愛一次: 14. 改變開始
英國
Ada回到大學後功課便越來越忙碌，這天當Ada仍在為功課忙得焦頭爛額的時候，卻突然收到Sam的message。
「我喺London喇，could have dinner tonight?」
這時Ada才想起上星期Sam有說過這星期會過來London。
「ok ar，不過喺我大學campus食ok?仲趕緊份功課呀…」
Sam:「當然無問題啦~」
當Ada到餐廳的時候，已是約定時間的半個鐘後。
Ada:「Sorry呀，做做下無留意時間遲咗…」
Sam:「唔緊要，我都係啱啱到咋嘛， 我多謝你百忙中抽空嚟同我食飯先啱~」
Ada:「講哩啲… 過門都係客嘛 ，哈哈~」
「你睇你個黑眼圈，真係捱殘晒喎…」Sam認真地望了望Ada後說。
「無計啦， 有時都真係好辛苦，一陣仲要返去繼續砌個model…」Ada無奈苦笑著說。
Sam:「你咁忙咁Elven點算?」
「佢都好忙呀…不過大家都會體諒大家嘅，邊個有時間咪邊個做多步囉~」
雖然Ada和Elven的溝通的確比以前少了，但因為之前發生的事和潛意式的影響讓他們在這世界的溝通比同期在原本的世界多回一點，亦因而讓Ada有了另一個答法。
Sam:「咁睇嚟你地完全無問題啦~」
Ada:「你又點呀? 前排散咗幾時搵返個新㗎? 需要介紹出聲喎，我有啲同學都ok㗎~」
Sam:「隨緣啦…哩啲嘢急唔嚟嘅~」
晚餐繼續在輕鬆愉快的氣氛下進行，不過當Sam提議幫Ada 一齊做功課的時候，腦海突然出現的一把聲音讓Ada拒絕了。
「唔駛啦，我攪得掂㗎喇，你快唧啲返去搵friend啦~」
「真係? 我真係無嘢做可以幫手㗎喎~」Sam帶點失望仍想堅持。
「唔駛喇，你咁生手，唔好阻住我快啲走添呀~」Ada用說笑的語氣繼續拒絕。
「咁好啦…」說到這份上Sam亦只好放棄。
當然Ada的代價是接著三天都沒覺好瞓，完成時簡直累得像隻狗… 不過她在睡前還是打了個電話給Elven。
「Honey，Sorry呀，幾日無搵過你… 我終於做完份assignment喇! 三日無瞓過咁濟… 好掛住你呀! 如果你依家可以比我攬住你瞓就好喇…」Ada撒嬌道。
「辛苦你喇… 做還做唔好捱壞晒身體呀… 暑假我過嚟英國嗰陣就可以日日攬住一齊瞓喇~」Elven充滿憐惜說道。
Ada:「希望暑假快啲到啦…好期待呀! 咁你近排點呀?」
Elven:「都幾好呀，又係忙緊project同hall 啲嘢囉… 不過前排抽空同Daniel以及啲教友踢咗日波，原來Daniel踢波都幾勁下~」
「咁開心? 咁佢同Rachel點呀?」這是Ada比較有興趣的話題，亦事關他們的賭注。
「應該幾好呀~嗰日佢都有嚟睇Daniel踢波呀，仲睇得好入神，睇嚟你輸嘅機會好大喇!」Elven滿有信心地笑道。
(你又知人地係睇Daniel唔係睇你?) Ada心想。
「咁如果佢地真係一齊，我輸都開心嘅~」不過嘴裏卻說。
「我贏我都會好開心㗎~」Elven的聲音突然變得有點淫邪。
Ada:「死變態佬! 淨係掛住諗衰嘢…」
「咁人地真係好掛住你嘛~」Elven的聲線亦變成了撒嬌。
Ada:「救命呀!好恐怖… 好啦，唔講住喇，我要去昏迷下先… Miss you!」
Elven:「Miss you too! 好好休息啦，byebye~」
睡夢中，Ada發了一個夢，夢見自己和Elven本來很甜蜜，但突然間卻為將來的問題而吵起架來，始終總有一天他們要解決異地的問題，最後在大家都沒有讓步下，他們一時意氣下便分手了，而當她之後再想和Elven詳談的時候，發現Elven已經和Rachel手拖手在一起了。
(唔好呀!)
這時Rachel從睡夢中驚醒。
(哩個問題始終要解決，而Elven似乎都無可能過嚟英國同我生活… 所以決定權， 其實係喺我手上， 或者我真係要作取捨下決定了…)
同一時間，Elven在做功課途中收到了Rachel的message。
「同你講個好消息呀~」
「Daniel表白咗喇!?」Elven第一個念頭。
「…唔係呀…」Rachel無奈應道。
Elven:「咁係咩好消息?」
Rachel:「港大收咗我喇，下年我就係你師妹lu~」
Elven:「恭喜恭喜! 第一志願?」
Rachel:「係呀，同埋我表妹都一樣入咗港大呀~」
Elven:「Annie? 平時教會見佢好似都唔同你地哩班玩嘅，不過你地個家族真係好勁，個個都拔尖~」
Rachel:「好彩啫… 係呀，佢同開另一班教友玩多，anyway，嚟緊多多指教喇~」
Elven:「等你入埋L-hall就好玩咯，師妹~」
Rachel:「到時靠你好好睇住小妹呀~」
Elven:「一定一定~」