只想和你愛一次: 8. 姊妹情深
時光飛逝，假期過後轉眼間Ada又要回到英國，不過在回英國前，Elven還是信守承諾帶Ada返了一次教會。Ada和教友們相處愉快有講有笑，完了崇拜後還和Susan 、Peter、 Daniel和 Rachel一起吃了個午飯。
飯後當Elven和Ada繼續在街閒逛時
「你覺得Rachel真係鍾意Daniel?」Ada突然問道。
Elven:「唔只我覺得啦， 佢自己都認咗~」
「但頭先我觀察咗陣又無咩嗰種感覺… 反而Daniel同Peter對佢就真係有啲嘢嘅，特別Peter係非常明顯…」Ada有點懷疑。
「你咁講開，近排佢望Daniel種眼神係有啲唔同咗，可能上次Daniel真係hurt親佢掛… 不過唔驚嘅，Daniel依家諗通咗後應該救得返嘅。」Elven想了想後說，接著把海洋公園發生的事告訴了Ada。
「揹人? 好型啦你，又英雄救美，一陣你攪到人移情別戀你就死!」聽完後Ada生氣地扭著Elven的耳仔說道。
「痛痛痛…咁唔係點喎，由得Rachel比Peter揹? 你見唔到佢當時想喊嗰個樣咋… 同埋我之後都話醒返Daniel啦!」Elven痛苦地解釋道。
「總知咪話我唔提你，一個Susan一個Rachel你自己小心啲啦…」Ada知也不能怪Elven便放了手說。
「傻㗎咩你， 邊有可能呀...反而係你呀，記住嗰晚應承過我啲咩，唔好係嗰邊比鬼仔溝咗呀~」Elven邊搓著自己的耳朵邊反擊。
「哼! 咁就要睇你表現喇，你再越嚟越少搵我就好難講㗎喇~」Ada搓著腰裝著生氣說。
「搵搵搵，每日都會搵你好無?」Elven見狀便把Ada抱入懷內說。
「算你啦~」而Ada亦回抱Elven。
同一時間
Susan和Rachel與Daniel Peter分別後也一起在girls shopping。
「Rachel，我覺得我個心好似穿咗個窿… 你頭先睇唔睇到佢地有幾恩愛呀! Elven真係錫Ada錫到燶呀… 點解世間上可以有本身咁好又咁錫女朋友嘅男仔㗎!」Susan忍不住向Rachel呻。
「睇到… 其實不如你接受現實放棄啦，大學咁多男仔，何必攪到自己咁呢…」Rachel作為Susan真正朋友亦勸她直接放棄。
「我開始有啲後悔叫咗佢返教會喇…近排見多咗反而產生咗好多唔應該有嘅想法同感覺…」Susan仍然灰心地說。
「可惜哩個世界無後悔藥… 不過我有個諗法可能幫到你~」Rachel突然靈機一觸的樣子。
「咩?」Susan一臉期待。
「不如你考慮下Peter? 又幫到你，又幫到我~」Rachel調皮地說。
「你想死呀! 係我都諗Daniel啦，哼!」Susan裝作生氣回應。
「好呀，anyone but Elven就得㗎喇~」但Rachel則像完全沒所謂。
聽到後Susan一臉吃驚地望著Rachel。
「你係咪仲嬲緊Daniel?」
「無呀，不過真係寧願你迷Daniel都好過繼續沉Elven船咋嘛，而且機會都大啲啦…」Rachel像沒事說道。
Susan:「咁你點?」
Rachel:「關我咩事?」
Susan:「你唔鍾意Daniel喇?」
「唔係… 不過自從去完海洋公園後，感覺好似係有啲唔同咗…」Rachel換回認真的樣子說。
Susan:「如果比Daniel知道，唔知佢會有幾後悔呢…」
「唔知呢… 不過比起Daniel我都係覺得Peter更啱你~」回復認真不夠幾秒鐘Rachel說完便立即向前逃跑。
「陳天欣! 我要打死你!」Susan立刻追著Rachel作勢要打她。
二人就這樣像小朋友般在街上追逐。
過了不知多久，當雙方都再沒氣力跑下去時，他們便一起倚在欄桿邊回氣休息。
「不過你都講得啱嘅，我係應該要抽身，其實我知就算Elven有日真係同Ada散咗，佢應該都唔會鍾意我…」感受著海風的吹拂，Susan望著海中心對Rachel說。
「咁又未必嘅…」明明是自己勸對方死心，但看見Susan一副死心的樣子﹐Rachel下意識竟然又想安慰她。
「其實識咗咁耐，係有火花一早就有啦… 所以與其糾纏喺一個我愛嘅人，倒不如試下搵一個愛我嘅人，然後再睇下自己有無辦法愛上佢啦...」不過Susan出奇地理性沒受她影響。
「我愛嘅人同愛我嘅人?」Rachel聽到這句子，突然醒起自己好像忘記了甚麼。
「係呀，所以不如你都考慮下Peter?」見Rachel發呆Susan又襯機想作弄一下她。
「原來你講咁多野最後都係想講哩句…」明白到Susan的用意，Rachel原本的思路便被這說話終斷了。
「不過Rachel，我同你由細玩到大，我相信我地都係大家嘅best friend唔應該有秘密，你可唔可以老實答我一個問題?」Susan對Rachel笑了笑後突然很認真地對她l說。
Rachel:「突然咁認真? 問啦~」
Susan:「你覺得Elven點?」
「下?」Rachel對這問題有點意外。
Susan:「你答我先啦~」
「嗯… 咁佢係真係好好嘅，外型好，性格好，對女朋友好，仲好溫柔同細心，暫時好似都搵唔到佢有咩缺點。」想了一想後Rachel如實把自己的想法說了出來。
Susan:「咁你對佢有無特別感覺?」
猶豫了一會，Rachel決定坦白，因為她不想對Susan說謊，亦相信自己和Rachel的友誼是經得起考驗。
「我講完你可唔可以唔好嬲?」
Susan:「問得你梗係唔會嬲啦~」
Rachel:「其實唔知係咪因為聽你講得佢太多呢，由第一眼見佢開始，我就有種好熟悉好親切嘅感覺，好似已經識咗佢好耐咁，到到真正同佢接觸多咗，哩種感覺就更加強烈。我會鍾意同佢傾偈，而且唔知點解喺佢面前，我好願意同可以好安心咁顯示自己真實同軟弱嘅一面，我之前未試過咁快對一個人咁㗎… 而且自從識咗佢後，我對Daniel嘅感覺好似真係有少少唔同咗，特別係嗰次去完海洋公園之後…」
「哈，終於肯講出口喇咩死女包!」Susan聽到後反而有種如釋重負的感覺。
「你一早feel到?」Rachel帶點驚訝和心虛問道。
「因為我太熟悉你，亦太留意佢喇，有時夾起你地中間，我會feel到你地之間嗰種獨特嘅氣場，自己反而好似係多餘咁...唔好以為我見唔到你彈琴嗰陣間中會偷望下佢，然後我又發覺佢其實間中都會偷望返下你… 所以如果我無感受錯，佢對你應該都係一樣有種好特別嘅感覺，你地嗰種connection，絕對唔係單一而係雙向。
而且雖然只係好間中一兩次，但我見過佢有時望你嗰種眼神，係比佢望Ada嗰陣仲要溫柔… 所以我先意識到就算有日佢同Ada分手，佢都唔會鍾意我，但就肯定會鍾意你… 而你哩個傻女，一定會因為我而選擇放棄，咁倒不如我及早離場等哩日發生嗰陣你地唔會顧累我可以順利發展~」Susan望著海邊一口氣說道。
「喂喂…你會唔會傻咗諗得太遠呀… 我本身講嗰啲同你講嗰啲完全係兩回事嚟㗎喎…」Rachel見Susan離題萬丈便想糾正她。
「我知我知，你有Daniel嘛~ 不過你知我有幾迷戀Elven啦，而如果有日佢真係同Ada分開，我覺得世界上唯一可以襯得起佢嘅就只有我嘅好姊妹你~ 係我自己多幻想啫，你唔駛理我㗎，千奇唔好因為我而影響咗你自己嘅決定!」Susan笑著解釋自己的真實想法。
「我都無你咁好氣費事睬你… 不過你諗通唔好再沉船落去我都替你高興嘅~」而Susan的想像力讓Rachel有點汗顏。
Susan:「總知無論將來點都好，我地嘅友誼永遠都唔會變~ 除非…」
Rachel:「除非咩?」
Susan:「你做咗啲嘢傷害我個男神囉~」
「車! 仲話咩友誼永固，根本係有異性無人性，男神仲重要過我!」聽到這Rachel裝作生氣地說。
「nonono，如果有日佢傷害咗你，我一樣會嬲爆佢唔再封佢做我男神!」Susan再解釋。
「你真係太多幻想喇，不如直接去做編劇啦你~」Rachel沒好氣道。
「有時說話唔好講得咁滿呀，因為你永遠唔知聽日會發生咩事㗎~」Susan則仍對自己猜測滿有信心覺得這並非不可能。
「不過講開又講，我有個直覺覺得如果Elven同Ada繼續long D，總有一日會發生問題...」想了想，Rachel突然又說。
Susan:「無錯，到時就係你出場嘅時候喇~」
「!*(#&#)(@)」對著這個Susan Rachel只能反白眼不再理她。