只想和你愛一次: 5. 海洋公園 (下)

找回Peter後，五人接著來到一間鬼屋前，Susan二話不說又直接拉著Elven走了進去，其餘三人見狀只好跟著。整間鬼屋對三位男性來說並不恐怖，但對兩個女仔來說還是能有點效果，不過就在走到尾聲一個突如其來的驚嚇嚇了Rachel一跳的時候，同一時間一個小孩突然從後拔足狂奔衝前撞向了Rachel，一不留神下Rachel想閃避時意外拗柴扭傷了足踝。
 
「哎吔…」
 
三位男仕聽到Rachel的叫聲便走到Rachel旁看看發生甚麼事，接著一起把她扶離了鬼屋並找了個地方坐下，解開鞋子後發現Rachel的腳踠已經腫得很厲害。
 
「睇嚟暫時未必適宜再行住…」Elven檢查完一輪後說道。
 
「哩度距離出口都唔算太遠，一係搵人揹住Rachel去出口再搵人幫手?」Susan提議。
 


「我可以呀!」Peter立刻自告奮勇想展示自己可靠的一面。
 
不過Rachel明顯不想與Peter有身體接觸並立刻向Daniel投以一個求助的眼神，Daniel看見後出現了掙扎的表情，可惜最後還是選擇裝作看不見，這讓Rachel感到絕望，眼淚亦開始在眼框積聚。
 
把一切看在眼內的Elven終於忍不住主動走到Rachel面前蹲了下來。
 
「我做開運動體能好啲呀，Rachel你唔介意就等我揹你啦…」
 
「咁…麻煩你喇」說完Rachel便把身體靠在Elven的背上讓Elven揹起自己。
 


 
「啱啱多謝你救咗我呀…」Elven慢慢走著的時候，Rachel在他耳邊用一個僅有他二人聽到的聲線說道。
 
「唔好咁講啦， 我講對唔住就真… 唔係我做咗咁多多餘嘢你今日都唔駛受咗咁多委屈…」Elven帶點內疚說道。
 
 
(在場可能得你一個留意到發生咗咩事，你真係好細心…)
 
Rachel沒有把所想的說出口，只是輕輕把頭枕在Elven的膊頭上，這一刻她覺得自己真的受傷了。不過突然她發覺Elven的背部很廣闊很舒服，挨在上面讓她覺得很安心很溫暖，甚至讓她有種不捨得離開的感覺…
 


而同一時間他們身後的三人卻各自充斥著不同的情緒。
 
Susan用羨慕的眼光望著Rachel。
Peter用幽怨的眼光望著Elven。
Daniel則只是低著頭望著地面不敢向前看。
 
走到出口和工作人員溝通完後，Elven幫Rachel作了簡單的冰敷，然後便捉了Daniel陪他去截的士打算先把Rachel送回家再看看那邊附近有沒有跌打看。
 
「Daniel，你知唔知喺鍾意嘅人面前，自尊其實係幾咁唔值錢?」Elven想提點Daniel。
 
「我唔明你講咩...」Daniel呆了一呆回應道。
 
「我知你明，信我啦，放低你嗰啲無謂嘅自尊同面子，唔係最終受傷害嘅只會係對方同你自己。」Elven語重心長地說。
 
沉寂了一會，Daniel突然像想明了甚麼，其實頭先他跟在後面時已一直在後悔，再加上現在Elven的說話終於讓他想通了。


 
「我…明白喇」
 
「咁之後我地將Rachel交返比你，你唔好再傷害佢，ok?」看見Daniel眼神的轉變，Elven知道他應該已經想通了。
 
「無問題。」Daniel肯定答道。
 
「有的士喇，咁你扶佢過嚟啦。」Elven笑了笑看見有的士便和Daniel說。
 
於是Daniel過去和Susan一起把Rachel接了過來，而Peter則繼續自己一個跟在後面。
 
「Rachel， Daniel會送你返去，你地睇下如果屋企附近仲有醫生或者跌打就睇咗先，無就明天再去啦，記住今晚瞓覺要墊高隻腳呀，咁明天隻腳會無咁腫。」Elven打開的士門對Rachel說。
 
「你唔陪埋我地?」Rachel問道。
 


「我一陣仲有其他嘢做陪唔到喇，放心，Daniel應承咗我地會睇住你㗎喇~」Elven一邊對Rachel答道一邊眨眼。
 
「哦…」Rachel看見後當然明白Elven意思。
 
Daniel:「放心交比我啦，唔駛擔心，咁我地行先喇，拜拜~」
 
的士開走，Rachel拎轉頭從後窗望去越變越細的Elven，心裏不知為何多了一種莫明的失落。
 
 
當晚，Elven主動關心Rachel
 
「你隻腳點呀? 睇唔睇到跌打?」
 
Rachel:「最後搵到仲有間未關門，依家敷咗藥紥住咗，好似無咁痛了。」
 


Elven:「明天起身一落床你就知喇… 哩幾日係屋企抖下盡量行少啲啦，仲要戒口鴨鵝蛋牛海鮮鼓油都唔好食喇。」
 
Rachel:「知道… 你好似好有經驗咁喎?」
 
Elven:「咁我打開波，拗柴哩啲成日都發生㗎喇，隻腳都已經拗到好似變變地形咁…」
 
Rachel:「有無咁誇張呀!」
 
Elven:「有呀… 變晒慣性喇… 算啦，唔講哩啲，咁Daniel之後有無好好照顧你?」
 
Rachel:「佢好似係有啲唔同咗… 會主動聊多返我講嘢，仲話我受咗傷哩段時間會同返我一齊返教會同返屋企喎。」
 
Elven:「咁咪好囉~」
 
Rachel:「你係咪同佢講過啲咩嚟?」


 
Elven:「我只係叫佢諗下到底你重要定面子同其他人點諗重要咋嘛。」
 
Rachel:「!!!」
 
Elven:「咁明顯佢個答案無令大家失望呀~」
 
Rachel:「哼!我先無咁快嬲完佢呀!」
 
Elven:「睇下點~ 我睇死你口硬心軟!」
 
Rachel:「咁其實我都知…」
 
Elven:「總知記住唔好為咗面子而違背自己嘅真心啦，好好把握哩段時間!」
 
Rachel:「知道喇情聖!」
 
 
不久，Rachel又收到Susan的電話
 
「點呀你，有無事呀?」
 
Rachel:「睇咗跌打敷咗藥喇…」
 
Susan:「咁同Daniel有無後續?」
 
Rachel:「佢咪陪我睇跌打同埋送我返屋企囉…」
 
Susan:「咁有無成功破冰呀?」
 
Rachel:「係見佢好似著緊我多咗嘅…」
 
Susan:「咁都算因禍得福喎~  不過你最好彩係有得比Elven揹你! 我識咗佢咁耐都無試過同佢咁close呀!」
 
Rachel:「你咁羨慕下次咪專登喺佢面前拗柴囉~」
 
Susan:「好喎! 係咪真係好痛?」
 
「你真係無得救…」Rachel又反了反白眼。
 
Susan:「講笑啫~話時話，點解佢會知你同Daniel 啲嘢?」
 
「上次去港大佢有問過我我咪講咗比佢聽囉…」Rachel如實答道。
 
Susan:「証明係人都睇得出你鍾意Daniel呀~」
 
Rachel:「我覺得哩家係係人都睇得出你鍾意Elven囉…」
 
Susan:「真係? 咁睇嚟我都要稍為收斂下先得… 其實佢女朋友成日唔係香港好易有錯覺覺得佢無女朋友…」
 
Rachel:「你知就最好啦，我以為你真係完全唔記得咗囉…」
 
Susan:「不過轉眼都就快到聖誕，可能之後都有段時間見唔到佢㗎喇…」
 
Rachel:「點解?」
 
Susan:「因為聖誕節就係佢地嘅七夕囉...」