只想和你愛一次: 2. 認識
當晚Susan打了電話給Rachel。
Rachel: 「點呀Susan姐，今日好開心啦~」
Susan:「唔好笑我啦，雖然我都真係好開心~」
Rachel:「你睇你春心蕩樣個發姣樣呀… 到底你今次用咗咩魔法可以邀請到你個男神返我地教會呀?」
Susan:「我都唔知呀… 其實大家上咗大學後我地都好少見，係幾日前咁岩中同聚會見到咪又問下佢，本身都預咗佢會推，點知佢今次突然應承喎~」
Rachel:「莫非佢終於比你嘅誠意感動到?」
Susan:「可能係! 咁你覺得佢點呀? 係咪同我描述嘅一樣呢?」
Rachel:「都真係幾靚仔幾nice呀，唔怪得俘虜咗你個少女心咁多年，連之前明明有個阿Paul最後都決定唔要啦~ 不過都要提提你，人地有女朋友㗎，唔好沉船呀…」
Susan:「咁我都知… 可以見佢到多啲我都已經好滿足㗎喇，將來係點就隨緣啦，反正都單戀咗咁耐咯~不過佢地long D都keep到咁耐真係勁，証明佢都係一個長情嘅人~」
Rachel:「我真係無你乎，佢做咩你應該都覺得係優點嚟㗎喇… 咁你有無問佢以後仲會唔會返我地教會呀?」
Susan:「有呀，佢話以後得閒嘅話都可以返下喎~」
Rachel:「咁你以後加油喇~」
Susan:「當然! 咁你又點呀? 今日同Daniel一齊返嘅? 你唔避佢喇?」
Rachel:「咁啱巴士站撞到咋， 我仲邊敢再約佢呀…」
Susan:「都唔明佢諗乜㗎，你咁好點會唔鍾意你㗎… 你又係，人地講一句你就縮晒沙咁，比啲熱情同誠意追佢返嚟嘛!」
Rachel:「唉， 我都唔知呀，學你話齋，隨緣啦…」
Susan:「幸福係要自己爭取㗎! 你睇我幾努力~」
Rachel:「但我就係做唔到你咁型咁勇嘛…」
Susan:「唉，無用，我先無你乎呀... 唔講哩啲住喇，大學啲嘢諗成點呀?」
Rachel:「仲諗緊呀… 不過應該都係港大Social Science或者BBA機會大㗎喇。」
Susan:「Elven讀HKU㗎喎，你如果有嘢想問都可以問下佢呀。」
Rachel:「係喎，不過等真係有嘢想問先麻煩佢啦~」
Susan:「一陣我share個contact比你有需要你自己add 佢MSN或者打比佢啦~」
Rachel:「唔該晒~」
過了兩星期，Rachel便加了Elven的MSN
「Hi Elven，我係Rachel呀。」
Elven:「Hello Rahcel，近排比較忙所以無返教會呀，得閒啲我會返下㗎喇…」
Rachel:「哈哈，我搵你唔係逼你返教會呀…」
Elven:「係? 因為Susan係咁問我，潛意式以為你都係… 哈哈Sorry~」
Rachel:「放心啦，我唔逼人返教會㗎~ 搵你係想問下你HKU啲嘢㗎，因為我嚟緊要揀科喇。」
Elven:「咁快手? 你想讀港大?」
Rachel:「係呀，啱啱好彩夠分拔尖… 諗緊如果想讀Social Science港大好似係最好。」
Elven:「原來你係高材生! 好犀利呀~ Social Science我唔太熟，等我問一問人先，你成績咁好點解唔讀醫科呀?」
Rachel:「我讀文科入唔到醫科呀， 同埋自己都真係無咩興趣…」
Elven:「icic~ 啱啱問咗個hallmate，佢話Soc Sci應該HKU同CU最好，但就睇你想主修咩嘢。 例如journalism、geography、 econ 就CU好啲，但psychology、social work、 politics等等就HKU好啲，名氣同排名上HKU都應該係好啲啲嘅。」
Rachel:「好快手! Thanks ar~港大啲 hall係咪玩得好犀利㗎? 你覺得間大學點?」
Elven:「港大好多hall同埋啲 hall嘅文化同其他大學係好唔同 ，哩度好講你要投入hall嘅生活同文化，所以好睇你自己鍾唔鍾意，鍾意就好開心，唔鍾意就會覺得好chur。我入咗間新hall相對無咁chur，但其實大家都好想喺度建立返多啲嘢等佢都可以變成傳統hall咁，唔係就好無特色，所以變相變咗另類嘅chur，但又無其他舊hall威逼性咁強。
至於大學都幾好呀，香港最高學府喎，環境靚又近西環。我自己個人認為啦，港大啲人係smart 啲醒啲，但就世界仔啲，而中大就與世隔絕啲，啲人係乖啲純啲。」
Rachel:「我都有聽聞過~ 會考讀書讀夠喇，入到大學我都想explore多啲唔同嘅文化同生活，咁你係邊間hall?」
Elven:「你唔駛考AL已經好好多啦，考完你真係會覺得會考其實已經好輕鬆… 我入咗C-hall呀，一間新男hall。」
Rachel:「咁你一定好鍾意同成班男仔玩喇!」
Elven:「哈，ok la，為咗女朋友只好犧牲下…」
Rachel:「Wooo，好偉大呀~」 (Susan睇嚟你都真係幾難有機會喇…)
Elven:「係喎，下星期港大i- day (information day)，你得閒都可以嚟參觀下呀，大把人同你介紹~」
Rachel:「我會嚟呀~ 到時睇下有無機會搵下你呀。」
Elven:「好呀，我多數會係hall個showroom。」
Rachel:「咁到時見，唔該晒你呀~」