只想和你愛一次: 13. Rachel的自白(一)

「表妹，明天得唔得閒呀? 喺日本買咗你最鍾意嘅芝士蛋糕比你呀~」剛下機的Rachel在回家途中whatsapp了Annie。
 
Annie:「Yeah~ 多謝! 渡完蜜月喇? 好唔好玩呀? 你就開心啦，又歐洲又日本，玩足三星期先返捨得返嚟~」
 
Rachel:「Ok la~ 啱啱落機就即刻搵你喇 ，你睇你幾有面呀~」
 
Annie:「咁你明天方唔方便過嚟我同Jacky度? 咁啱我地都有啲嘢想比你… 」
 
Rachel:「都可以呀 ，你地一齊住後我都未去過你地新居~ 咩嚟㗎?」
 




Annie:「嗯… 明天你就知㗎喇… 你會一個上嚟定同埋Daniel?」
 
Rachel:「得我一個咋，佢明天就要返工喇…」
 
Annie:「哦好，咁明天見啦~」
 
 
第二天
 
“叮噹”




 
「Hi 朱太， 隨便入嚟坐啦~」Annie看見Rachel一臉高興。
 
「打擾晒喇~ 個蛋糕你快啲放入雪櫃先啦。」Rachel說完便把手上拿著的蛋糕交給Annie。
 
Annie:「多謝表姐~」
 
「你哩度都幾靚喎，廳又夠大，幾好幾好~」Rachel入到屋簡單巡視了一會便說。
 
Annie:「好彩咋，嗰陣咁啱有哩個靚盤放租，我同Jacky一睇就即刻扑搥了~」




 
「証明你地同哩度有緣囉~ 係喎，Jacky呢?」Rachel笑說道。
 
「佢有啲嘢仲喺房忙緊，佢近排心情有啲差...」Annie的臉色突然變得有點暗淡。
 
「哦… 無嘢嘛?」Rachel察覺到Annie神色有異便問。
 
「你等我一陣，我同佢講聲睇下佢攪成點先…」Annie沒有直答說完便轉身入房。
 
Rachel:「好呀…」
 
過了一會，Annie和Jacky一起從房裏走了出來，而Jacky手中拿著了一本類似書冊的物體。
 
察覺到Jacky臉上的凝重，Rachel心裏有一種不好的預感。
 




沉默了一會，Jacky深呼吸了一口氣然後說道:「Rachel，Elven死咗喇…」
 
「下?」Rachel下意識應了一聲。
 
「…Elven佢死咗喇…」Jacky痛苦地重覆了一次。
 
「你...講笑咋? 」不敢相信自己的耳朵，縱使再得到一次確認Rachel的腦袋仍不能想像自己聽到的事情。
 
Jacky:「… 我唔係講笑， 喺你結婚後第二日佢自殺死咗…」
 
「自殺? 你意思係因為我結婚所以佢自殺?佢點自殺㗎?」Rachel更加震驚地問。
 
Jacky:「無人知佢點解自殺… 但從時間上嚟睇，係有哩個可能… 嗰日有人見到佢喺尖咀海傍跳咗落海...」
 
「點會咁㗎… 我同佢都無聯絡好耐啦…」Rachel不能相信。




 
Jacky:「佢有幾鍾意你，我地哩班close friend個個都心知肚明… 哩幾年其實佢成日都總喺帶住種鬱鬱寡歡嘅感覺，一直都好後悔最後自己同你攪成咁…」
 
「係我衰...一直對佢其實我都存在住一份愧疚感，但我真係無諗過會變成咁㗎...」Rachel痛苦地說。
 
Jacky:「係咪真係因為你無人知，而且都無人會估到，所以唔好自責… 我地唔講你聽住都係廢事破壞你去渡蜜月嘅心情，不過之前執拾Elven遺物嗰陣伯母喺佢床下底搵到哩本嘢，佢叫我交返比你...」說完Jacky把手上的書冊遞給Rachel。 (關於這本畫冊詳見第一部36章尾)
 
「哩本係?」Rachel伸手一邊接過一邊問道。
 
Jacky:「你打開睇下就知㗎喇...」
 
Rachel把書冊打開，很快便知是甚麼一回事，書冊內很精美地用文字和圖畫記錄著Elven和自己相識的故事。
 
「可唔可以比我一個人靜靜咁睇完佢?」Rachel把書冊關上後說。
 




「好，咁我地返房先，你睇完ok就叫我地啦…」說完Jacky和Annie便走回房間留下Rachel自己一個。
 
 
看見Jacky和Annie回到自己房間，Rachel深呼吸了一口氣然後鼓起勇氣再一次打開了書冊。隨著一頁又一頁的內容呈現眼前，一幕又一幕的往事亦在她心底裏被勾起- 第一次的見面，campus獻花，海旁談天，joint-hall ball，1 on 1籃球賽，inter-hall後的晚上等等...  Rachel突然發覺原來那短短兩年不到的時間，她和Elven以朋友來說確實有著不成比例的經歷。
 
而讓Rachel吃驚的是Elven連很多細微位或是大家當時的對白都記得清清楚楚，若不是被這書冊勾起，很多情節和對話Rachel自問自己根本不可能會記得。霎時間她能感受到這男孩到底有多喜歡和在意自己，但自己待他卻像用完即棄的膠袋，這讓Rachel感到加倍的內疚...
 
(你真係好傻...其實我有乜咁好值得你付出咁嘅感情?)
 
看畢冷靜過後Rachel便和Jacky以及 Annie告辭，她需要自己沉澱一下。
 
 
「有件事希望你唔好介意，base on哩個故事，我幫Elven寫埋後續部份，希望可以喺另一個世界幫佢完成心願，大概講佢時光倒流返咗過去，然後終於成功追到你，同你幸福快樂咁生活...  之後我張本書連埋啲遺物一齊燒咗比佢，未經你同意就咁做， sorry...」臨離開前Jacky對Rachel說。
 
「唔緊要啦，人都唔喺度咯...如果人有下一世或者真係有平行時空，我都好希望佢可以開開心心咁過...」Rachel傷感地說。




 
離開後，Rachel並不想回家，只是在街上漫無目的地溜漣，然後她來到了尖沙咀的海傍，Elven自殺的地方。
 
其實憑Rachel對Elven的認識，她並不覺得Elven是會因這些事而選擇輕生的人，不過事實如此，又不容她不相信。
 
(到底係咪我害咗你呢... 如果嗰陣我對你好啲，你會唔會就有唔同嘅選擇?)
 
(抑或從一開始我就唔應該同你傾計同你熟?)
 
(點解過咗咁多年，你都仲放唔低咁傻呀?)
 
 
「小姐你發咗呆好耐喇喎，無乜事嘛?」就在Rachel望著維港發了很久呆的時候，一個阿婆突然出現在她旁邊問道。
 
「我...無事呀，諗緊嘢啫...」Rachel禮貌性回答道。
 
「無事就好，唔好諗唔開又做傻事呀...」阿婆聽完回應道。
 
「又?」
 
「係呀，幾個星期前有個後生仔又係好似你咁企咗喺度發呆發咗好耐，之後我仲同佢傾咗陣偈，點知我走咗無耐一回頭就見佢突然跳咗落海，咁我咪即刻報警，但蛙人好似搵咗好耐都搵唔到佢條屍，淨係喺海底搵返佢個銀包，不過睇怕都凶多吉少喇...」阿婆一邊回憶一邊說道。
 
「個後生仔係咪二三十歲，高高大大幾靚仔㗎?」聽完阿婆的描述Rachel緊張追問道。
 
「係呀，幾靚仔㗎，不過個樣就好似好憂鬱咁囉…」阿婆回答道。
 
「係咪咁嘅樣?」Rachel用手機在facebook找了Elven的一張相問道。
 
「係呀，你識佢㗎?」阿婆略帶驚訝。
 
Rachel:「佢係我朋友嚟… 咁佢死之前同你講咗啲咩?」
 
「佢同我分享咗佢啲故仔囉，之後就講佢哩一生最愛嘅女仔啱啱同第二個結咗婚， 都唔知佢係咪為咗哩件事而跳海呢...」阿婆邊回憶邊答。
 
「我都想知...」Rachel對阿婆說，又彷似和自己說。
 
「你唔會就係佢講嗰個咩米醋呀?」看了看Rachel阿婆疑惑問道。
 
「係... 我就係佢口中嗰個米醋...」得到証實，Rachel不知是因為內疚還是心痛，眼淚終於緩緩流下。
 
「果然好靚女呀，唔怪得可以令佢咁念念不忘啦... 唉，不過阿婆都唔知安慰你定責備你好喇... 感情哩家嘢，好就可以讓人好幸福，衰嘅就真係可以毀咗人嘅一生...」阿婆唏噓說道。
 
「我真係無諗過會變成咁㗎...」聽到了阿婆的說話Rachel再也忍不住開始掩面痛哭。
 
「其實都唔怪得你嘅，怪只可以怪老天爺鍾意作弄人啦，佢嘅命中注定偏偏又唔係佢嘅命中注定... 不過阿婆都係八掛下，你覺得佢唔好咩? 有個對你咁好咁愛你嘅人，點解唔考慮下要咁對佢呀?」阿婆問。
 
「我都知佢好好，只可惜我嘅心無位置比佢呢...」Rachel繼續掩面痛苦答道。
 
「你個老公對你好好?你好愛佢?」阿婆鑿而不捨追問。
 
「我唔知點講...」
 
「好似有啲難言之忍喎...見到後生仔同你都算有緣呀，不如你都同阿婆講下你個故事?」
 
也許是因為被Elven的死訊亂了心神，也許是因為阿婆也聽過Elven的故事倍有親切感，也許是因為Rachel現在真的很需要一個傾訴對象，結果Rachel竟然真的和阿婆開始分享了她鮮為人知的故事。