只想和你愛一次: 7. 被遺忘的故事 (七)
“到到你走嗰日，好多同學都有嚟送你機，不過就得我有幸可以以幫你拎行李為由同你一齊由屋企出發去機場。因為知道一出門口就再無機會，我地喺你房入面攬咗好耐，然後你隻傻豬又喺度喊，好彩無比你父母發覺咋~ 之後去到機場，我就只可以默默咁望著你離開… 嗰刻，我好唔捨得亦好不安，我好驚你喺嗰邊適應唔到唔開心，好驚你比人恰，好驚你以後都會離我而去…”
轉眼間到了離開香港那天，為了可以見你耐一點，我和屋企人說有個男同學主動想過來幫我拿行李，因為我知若不是這樣，我們在機場就只可以扮是普通的同學，甚麼也不能做… 那天你一來到和我父母打過招呼後我便把你捉入了自己的房間。
「送比你㗎~ 以後哩隻公仔就代替我係嗰邊陪住你，你掛住我嗰陣就攬住佢啦~」一入房你立刻從袋裏那出了一隻公仔送給我。
「好得意呀! 多謝~ 不過一掛住你就攬佢我驚佢好快就比我攬爛喎…」
同時，因望到父母這刻不在房間附近，我便立刻撲向你和公仔把你們一起攬實，然後又開始不爭氣地哭起來…
「傻妹… 唔好喊啦，我會盡量寫多啲信同打下電話比你㗎喇，而且好快到聖誕節你到時都會返嚟啦~」你一邊抱著我，一邊拍著我的背脊安慰我。
「記住你講過嘅嘢呀!」我一邊喊一邊說。
「你都要呀!」
然後我們就這樣靜靜地抱著大家，直至聽見了我父母行近的腳步聲我們才急急鬆手扮執拾東西。
因行李和人數比較多，父親預先call了一架貨Van接我們到機場。在去機場的路上，我和你一起坐在前坐，然後整段車程我們的手就一直背著他們十指緊扣，有點像偷情的感覺，但只有拖著你我的不安才能稍為得到舒緩…
其實事後回想，我估我的父母應該一早已經猜得到你的真正身份，只是當時沒有揭破罷了。
到到真的要入閘登機，雖然我面向所有同學和屋企人，但我的視線，其實從來都只有你…
上到飛機，我又開始哭起來， 我很害怕，害怕一個人去一個完全陌生的環境生活，害怕和你維繫不了有天要分手，害怕很多很多的東西…
“不過或者真係無咗就會特別珍惜，你去咗英國後我地都比以前更珍惜對方。雖然成日掛住你有時真係好難捱，但正因為機會難得，令我地都更珍惜每次透過書信、ICQ、email以及電話和對方溝通的機會，每次我地都能確切感受到對方對自己嘅著緊。隨著大家慢慢適應了這相處模式，那種不安的感覺亦漸漸開始減退。之後到了聖誕，分隔了四個月後我地終於可以再次見面…”
到英國落機出了境，我很快便看見來接我的人，然後跟他回到我寄住的apartment。收留我的屋主是兩夫婦，他們還有個很可愛的女兒。見到她我不期然會諗，如果將來和你旳BB有她那樣得意那我便心滿意足了…
兩夫婦人很好，知我人生路不熟和我傾了很多的偈又會帶我周圍去遊覽，而因為太痛苦太需要人傾訴，很快我就把我們的故事告訴了他們，他們聽畢後誇獎讚我們很sweet還叫我們要努力加油~ 至於學校方面幸好有幾個同學都是香港人，所以我未至於是完全孤單一個…
這個鄉鎮跟香港很不同，那時internet在這裏還沒普及，我要間中才有機會在學校的電腦上網回覆你的email。當時長途電話費又很貴，所以我都只可以好間中才能打給你和你談一會電話，再加上時差所限，我們要有像ICQ那樣即時的溝通亦真的十分不容易…
很掛念你的時候，我真的只可以攬著你送給我那隻公仔喊以及盡量把想和你說的話用email或是寫信說給你聽…
那時候你的信件和email真的是我賴以為生的精神食糧，每次收到我都會很開心，足以讓我那一整天都能帶著微笑… 捱下捱下，我開始慢慢適應，而到到聖誕節我終於可以回來香港見你…
為了能早點看見你，我跟父母說不用來接我機，而當我一踏入入境大堂找到了你的位置，我立刻就拋下了所有行李然後用我人生最快的速度撲向你懷抱... 幸好你運動底子好夠力才沒有被我整個撲倒~ 像樹熊般熊抱著你，我尋著你的嘴唇然後直接就吻了下去…
「o靚妹，睇嚟你喺嗰邊好食好住喎，重咗咁多嘅~我就嚟抱唔起你喇…」過了一會被我吻到略帶喘氣的你笑笑口對我說道。
「仲好講，最衰都係你呀! 喺嗰邊我一掛住你就不斷搵嘢食，想唔重都幾難啦...第日我變咗肥婆你要負責任呀!」我一掌拍落你心口然後說道。
「係係係，係我衰，辛苦你喇~放心啦，就算你變成肥姐咁我都唔會唔要你~」你把嘴巴貼近我耳邊說道。
「算你啦~」
重新站回地上，我走回我的行李處，然後拿出了一條頸巾幫你纜上。
「冬天喇，哩條頸巾係我喺嗰邊專登織比你㗎，希望可以代替我比到溫暖你…」
「無你嘅冬天我永遠都唔會暖㗎… 所以無論幾忙都好，每年嘅聖誔都你要返黎陪我呀~」你又抱著我說道。
「傻瓜…」
「你快啲應承我先啦~」
「好我應承你~」
“本身其實我係完全唔纜頸巾，但因為你我改變咗哩個習慣。 不過今年，睇嚟我只可以回復返以前嘅習慣，然後將條頸巾收埋喺衣櫃… 而你曾經應承過我每個聖誕都會返嚟陪我，今個聖誔亦都會係第一個例外…
每次你返嚟嗰一兩個星期，我地都過得好甜蜜好幸福，因為我地都知道要用哩兩星期將能量儲滿，然後我地先可以捱過之後無得見嘅日子，我地要加倍努力將失去嘅時光都追返返嚟… 我知你係嗰邊有時其實會好忙，但為咗我你都會盡力提早完成所有功課同埋活動，然後除咗中七我要考AL 嗰年嘅復活節外，你真係每年聖誕，復活節同暑假都會返嚟陪我，我地亦都創造咗好多美好嘅回憶… 班會宿營，日落之夜，山頂之夜，波衫事件等等…
唔知你仲記唔記得?你送波衫比我嗰次，雖然送錯咗攪到我成日笑你，但其實我收到哩份禮物嗰陣真係好感動㗎… 我知你為咗佢要節衣縮食好耐先買得起，你哩份心思，我真係確切感受得到，所以就算我可能永遠都唔會著佢出街，但我都一定會將佢保留一世…”
在你中六那年的生日，我為了你的生日禮物苦惱了很久，然後靈機一觸突然想起你鍾意車路士這支足球隊，特別是隊中其中一名球員，好像叫甚麼莊臣，於是我就想不如買件有他名字的波衫給你。
一上車路士的官網看看，發現印名字和那些徽章加起來要一千多元… 不過為了你開心，節衣宿食幾個月我都要啦~ 為了避免出錯，我還偷偷問了你那些兄弟中跟自己比較熟的中同Rex。
「Rex，你記唔記得Elven係鍾意車仔邊個球員? 好似叫咩Johnson㗎...」
「我唔睇波㗎喎...不過哩啲上網好易搵啫~ Johnson? 搵到喇，應該係2號Glen Johnson呀~」
「唔該晒你呀!」
於是我在官網很快便找到Glen Johnson這個名字然後下了order，再經Rex打算在你生日正日那天由他代替我把波衫交到你手中。
你生日當天，我就收到你電話
你:「多謝你份禮物呀! 不過下次唔好買咁貴嘅嘢喇，傻㗎咩…」
「最緊要你鍾意啫，我最多咪當順便減肥囉~ 咁鍾唔鍾意呀?」
你:「鍾意… 不過… 點解你會印Johnson哩個名嘅?」
「唔係你好鍾意嗰個球員嚟㗎咩? 我問咗Rex㗎喎…」我有點意外問道。
你:「Rex? 佢完全唔睇波唔識啲人㗎喎… 你點解會揀佢嚟問嘅?」
「我唔知呀… 諗住有哩個名應該實無錯…」我心知不妙。
「你記住喇，我鍾意嗰個係22號的古莊臣(Gudjohnsen) ， 唔係2號的格連莊臣呀~」你笑著想盡量淡化地說。
「攪錯呀Rex! 老點我! Sorry呀… 唔知有無得換呢…」而我卻完全笑不出。
「唔緊要啦，只要係你送嘅我都鍾意~」
事後我再問人，知道了原來這個格連莊臣是踢後衞，而且的確是比較少人喜歡，這令我在之後三個月都無再理睬過阿Rex…