只想和你愛一次: 52. 結局

三年後，Elven和Rachel正身處馬爾代夫享受著他們與陽光與海灘為伴的蜜月旅行。
 
 
「有個問題我一直想問好耐，其實你以前係咪一早就知我鍾意你?」坐在水清沙幼，風光如畫的沙灘上，Elven從後抱著Rachel突然問道。
 
Rachel笑笑口，然後拿出手機給Elven看了一段短片，是Rachel輸了比賽後，他們到了海旁傾偈當晚Rachel睡著後的片段。片中Elven看見自己把外套蓋在Rachel上，默默望著Rachel然後開始流淚。
 
「初初睇我以為你係因為我輸咗替我傷心所以喊，但睇多幾次後，我就感受到你望住我嗰陣係帶有一種好深刻嘅感情，而我亦感受到嗰種哀傷係我帶比你… 雖然唔知點解你會咁亦覺得你唔應該會咁，但嗰刻我就已經感受到你對我似乎唔只係朋友咁簡單，仲有一種好深刻好真摰嘅感情，真摰到係我連從Daniel身上都從未感受過…
 
 當然之前某啲時刻我都曾經有過懷疑，但就始終唔肯定，特別係有時你好似又會對我好冷淡咁…」Rachel一邊回憶一邊甜甜笑著說道。


 
(原來嗰晚一樣比人偷影咗…)
 
「原來係咁...你竟然暪咗我咁耐! 咁點解之後你又無避開我?」知道了真相後Elven又問道。
 
「唔捨得嘛… 同埋你又無講過出口，咁梗係繼續扮唔知啦~  嗰陣其實都好掙扎，一方面知道自己回應唔到你嘅感情，一方面又想繼續留你喺自己身邊，然後唔經唔覺就咁多年… 」Rachel有點不好意思地答道。
 
「咁好彩你肯繼續收我做兵啫!」Elven說完便親了一親Rachel的臉再繼續把她抱緊。
 
「唔好講到收兵咁難聽啦… 我嗰陣真心當你係我一個好重要嘅好朋友!」Rachel糾正Elven道。


 
「咁其實嗰幾年，你有無啲 moment都曾經對我心動過?」想了想Elven又問。
 
「都有嘅~」Rachel帶點靦腆笑著說。
 
「幾時?」Elven好奇。
 
Rachel: 「你估下~」
 
「我為你做過咁多嘢，好難估㗎喎…」Elven稍為想了想但都沒有答案。


 
「曾經有個moment，我都有衝動想偷偷錫你塊面一下，不過嗰陣因為未肯定你對我係點，所以最後都係唔敢… 到到第二日瞓醒後諗返就好慶幸好彩自己當時無錫到喇。」Rachel有點懷緬笑著說。
 
這刻Elven恍然大悟，終於明白當時那個吻為何在穿越後會消失了!
 
「點解呀? 如果嗰陣錫咗我，之後我可能就唔駛等咁耐喇…」
 
「唔會啦，嗰刻真係只係突然有個衝動，就算錫咗都肯定唔會同你一齊~」Rachel笑著搖頭說。
 
「所以我係點都註定要受苦㗎喇…」Elven無奈說道。
 
「唔受苦我又點會知你有咁愛我呢? 同埋太易得到嘅嘢人就唔會珍惜㗎喇~」說完Rachel把自己的臉貼緊Elven的臉以示安慰。
 
Elven: 「咁你咁講都啱… 不過9年未免真係太痛苦…」
 


Rachel沒有回應，只是扭轉了臉，笑著輕輕地吻了Elven的臉龐一下，然後又繼續倚傍在Elven的臂彎內。
 
「不如我地返房咯~」見Rachel沒有發現自己的口誤Elven鬆了口氣提議道。
 
Rachel: 「咁早返房?」
 
「返房等我好好珍惜你嘛~」Elven笑得很衰地說道。
 
感受到Elven不懷好意的笑容，Rachel臉紅地說了句「咸濕佬!」然後便拔腿逃走了。
 
Elven自然不會放過Rachel，立刻追了上去，兩人就這樣一直打鬧追逐回到了房中…
 
 
過了很久，Elven在床上從後抱著Rachel用還帶著喘息的聲音問道:
 


「所以其實你都一早知道我地係唔會証明到男女間都可以有純友誼嘅存在?」
 
Rachel把自己的頭倚靠在Elven的膊頭上合上眼然後以帶點氣憤的語氣說道: 「仲好講! 我一直都好努力做到㗎，係直至你嗰晚突然無啦啦錫我咋嘛…」
 
「所以我最應該多謝呢，其實係嗰晚東壩上面嗰隻牛呀~」想回當晚的畫面Elven突然說。
 
「點解咁講?」Rachel不明白。
 
Elven:「你有無聽過吊橋效應?」
 
「無呀，咩嚟㗎?」Rachel還是懶洋洋地問。
 
Elven笑了笑沒有回答，心裏面真心多謝了那隻牛數十篇，然後就這樣抱著Rachel進入了夢鄉。