只想和你愛一次: 51. 神牛助攻
這晚，Elven和Rachel在零晨時分乘的士到達了東壩。 他們比日出時間早到了兩小時，於是便打算找個地方坐下一邊聊天一邊等待著日出的來臨。
「我知你係專登約我出嚟等我可以散下心，多謝你呀。」坐在東壩的路邊上，Rachel首先說道。
Elven: 「你諗多咗喇，我純粹自己想睇日出所以搵你陪我咋喎~」
「車，對唔住係我自作多情囉~」Rachel當然知這不是事實。
「信我啦，所有嘢都會過去的，可能好快你就會搵到個更加好㗎呢~」說完笑Elven便開始進入安慰mode。
「但我到依家其實都仲未接受到真係分咗手哩個事實…」Rachel傷感地說。
「咁話晒都一齊咗咁多年，點會咁快接受到呀... 不過時間會幫到你，你睇下我嗰陣傷得咁重依家都無晒事啦~」Elven繼續安慰道。
「係喎，你係咪真係完全無晒事喇? 仲會唔會諗起你個ex?」很久沒和Elven提起過Ada Rachel好奇問道。
「咁間中都實會仍然諗起佢嘅，始終佢曾經喺我生命中真係佔有一個好重要嘅位置，同佢嘅經歷亦太多太難忘，係佢構成咗依家嘅我... 不過雖然係遺憾大家唔可以一齊去到終點，但我都真係已經放低晒lu，就算對嗰個男仔，我都再無半分恨意。」Elven釋懷地說道。
「真係?咁你真係好犀利好大方喎...」Rachel有點懷疑。
Elven: 「依家諗通咗，其實由佢去外國讀書嗰一刻開始，哩個結局就早已經註定咗，就算無個男仔，遲早都會有另一個出現又或者有其他問題發生，分手係無可避免... 當然，唔再嬲個男仔唔代表可以同佢做返朋友，因為我對佢已經無可能再有信任，只係叫可以理解佢當時嘅決定同行為咁解啫...
其實個男仔無耐前都突然message返我同我講sorry，佢同我講佢同Ada前排都分咗手lu，為當日傷害咗我而道歉，不過佢強調佢無後悔過當日嘅決定，亦唔覺得自己嘅行為係錯，道歉只係因為佢知佢傷害咗我。」
「嗯…咁老老實實，聽到佢地分手你有無少少心涼先? 有無諗過試下搵返Ada?」Rachel又八卦問道。
「哈，咁又真係無喎~ 嗰刻第一個感覺係，攪咁多嘢原來最後都係分手，感覺就好似所有嘢其實都係一個既定循環，然後又慨嘆變幻真係原是永恆，你永遠唔知將來會發生咩事... 上天有時拎走咗你啲野，總會比返另一樣嘢你，只不過無耐可能又會再次拎走返咁解啫…」Elven帶點感觸說道。
「你講嘢咁黎明㗎~ 不過聽到你話放低晒我都好替你開心，我其實一直都好期待你之後個女朋友會係咩人嚟㗎~」Rachel笑道。
「失戀係大部份人都必會經過嘅成長經歷，只有失過戀你先會發現，原來無失過戀嘅唔可以叫做人生~ 因為佢真係會帶咗好多獨有嘅experience比你...」Elven感慨說道。
「咁我依家係咪可以同人講自己係經歷過真正嘅人生喇…」不過就觸動到Rachel。
Elven: 「係呀，恭喜你呀~ 不過嚴格嚟講，你地都算和平分手，所以可能有啲唔同嘅... 」
「唉... 但和平分手我都已經好唔開心喇，都唔知你嗰陣點捱得過...」Rachel扁著嘴說。
「捱捱下慢慢唔知點樣就會捱過㗎喇~ 喂，距離日出仲有啲時間，有無興趣落去下面望下呀?」Elven不再糾纏這話題望著堤壩下提議。
「好呀。」Rachel沒所謂應道。
之後他們邊走邊聊走到下面的水塘，然後又觀賞了屬於世界百大地質遺產的六角柱石群，見時間差不多才開始走回上原位。
沿斜路就快回到壩上時， Elven突然說道: 「你可唔可以匿埋眼一陣?」
「做咩?」Rachel不明所意。
「唔好問，聽話啦~」Elven說。
不虞有詐，Rachel聽話地合上了眼睛。
「未叫你唔好打開眼住呀~」Elven一邊對Rachel說一邊走前拿出了一個打火機，原來襯著他們剛剛走到下面時有人立刻來到這裏放了一堆蠟燭。
「你可以打開眼喇~」隔了一會Elven終於說道。
Rachel 一打開眼，發現滿地蠟燭砌成了三個字-
I ❤️ U
「你唔好講嘢住，希望你可以比機會聽我講晒先... 」見Rachel看見後欲言又止，Elven先一步阻止了她說任何話，然後見Rachel再沒意圖說話，Elven便深呼吸了一口氣再開始講道:
「其實早喺四年前，嗰次又係同你玩蠟燭嗰晚我已經想將哩三隻字送比你，不過我知我唔合適，我好驚我一表白會連同你做朋友嘅機會都無埋，所以咁多年嚟我只可以將哩份心意收埋喺心入面，默默守喺你身邊做你嘅李大仁。
你知唔知我真係好感激自己喺大學最後一年可以遇見你? 當我因為Ada嘅事被擊至肢離破碎，好似無咗靈魂行屍走肉咁生活嗰陣，係你令我變返似一個人，修補返好我本身已經千瘡百孔嗰個心。
同你傾偈真係好開心好舒服，而且我地亦真係好夾大家諗嘅嘢都好似。同Ada分手後，我從沒諗過我會可以再鍾意另一個女仔，但你嘅出現，令我明白我錯了。
我唔單只遇到一個可以令我再次動情嘅人，而且佢仲係一個同我更加夾令我更加鍾意嘅女仔，我好肯定你就係我心目中最完美嘅另一半。不過好可惜嘅係，由我識你嗰刻開始你已經有男朋友…
每次聽見你講你同佢一齊 ，我個心其實都好掙扎好辛苦，好多次我都有諗過放棄想抽身離開，但我真係唔捨得… 所以我決定一直等，或者有一日你地會分手然後你會考慮我呢? 估唔到一等就等咗咁多年，然後今日我終於等到哩個機會，等到你難得回復單身嘅一刻…
我知哩個時間未必係一個good timing，甚至可以話太快有啲唔適合，但我真係好驚失去咗哩次機會後，我以後都再唔會有機會… 我好驚你好快會同咗第二個一齊，又或者好快同返男朋友復合，所以我決定無論結果係點我今日都要鼓起勇氣向你表白。
你可以唔駛比任何答案我住㗎，只係無論結果係點，我都好想你比你知道我嘅真正心意。」
聽完Elven愛的宣言後Rachel沉默了一會，然後彷彿整理完自己要說的話後，她開始說道:
「Elven 多謝你…不過依刻我…」但當Rachel還沒說完她和Elven便發現一隻野牛不知是不是受火光吸引還是刺激正以高速衝向他們，由於他們正身處一個轉彎位附近，所以發現野牛的時候牠已經十分接近他們的位置。
Elven潛意式立即把Rachel拉近自己身前然後抱著她一個轉身閃開避開野牛的撞擊再用自己的背部向著野牛的方向以作保護Rachel的護盾，幸好野牛一擊不中後見到近處蠟燭傳來的火光後便轉身跑走了。
逃過一劫後Elven慢慢把Rachel從懷裏放回出來，看到她一臉驚嚇的樣子，加上剛剛才死裏逃生壯大了他的膽子，Elven忍不住把臉移前吻上了Rachel的小嘴。
突然的襲擊讓Rachel從驚呆中醒來想推開Elven，但唇上傳來的觸感加上感受到自己仍心有餘悸傳來的急速心跳聲，她發現自己有心動的感覺而且正逐漸迷失於其中，很快她就不再想推開Elven甚至已經不由自主地主動回應著Elven的吻。
感受著Rachel柔軟的小嘴，再品嚐到Rachel的香舌，Elven突然覺得這兩世總共接近十年的等待一切都是值得的。只要Rachel願意，他一定會用盡自己的餘生去愛護眼前這個女子。
過了不知多久，唇分。
「我係咪可以當哩個kiss係你嘅答覆?」望著害羞得滿臉通紅的Rachel，Elven仍雙手抱著Rachel問道。
「嗯…」Rachel低下頭以微不可察的聲線回應道。
始終自己才剛分手不久，原本Rachel是打算拒絕Elven的，不過剛剛的吻加上回想起這幾年和Elven經歷的一切，讓她的感性戰勝了理性- 她不想拒絕眼前這個男人。
這幾年，是他一直陪伴著自己，帶給自己無數的歡樂，支持和關懷。Rachel感受到這一刻所有他們的回億和經歷都因這一吻被轉化成甜甜的愛意，滋潤著自己的心窩。
聽到Rachel的答覆，Elven忍不住再度吻了下去，這時天邊開始出現了這天的第一片曙光，地上出現了兩個幸福的倒影。
遠處山上，一隻體型魁梧的野牛正望著遠處正在擁吻的二人，然後嘴角竟也以一個微不可察的角度慢慢向上升起。