只想和你愛一次: 37. 派帖

不久，Susan便約了Elven和其他中同吃晚飯派帖。其實近幾年自從Susan做了空姐又開始拍拖後，Elven和Susan已很少見面和聯絡，在平常的中同聚會裏，Susan亦甚少出現。所以這次Susan主動吹雞，大家反應都十分踴躍，基本上從前一起玩開的同學都有出現。
 
「Paul，你昔日女神結婚喇喎，有無咩感受發表下呀? 」Susan未到Elven便取笑Paul道。
 
「我想哭但是哭不出來，等到思念像海…. 」Paul作勢一邊哭一邊唱。
 
「扮咩呀，人地依家同女主播拍拖不知幾幸福，調返轉應該要多謝Susan無睇中佢呀~」另一中同阿Rex插口。
 
「係呀係呀，前排電視先見到佢報導緊咩尖沙咀上空出現怪異天文現象，勁靚女呀!」中同Jimmy和應。
 




「不要去羨慕 不要去妒忌~ 」Paul又唱。
 
望見現在這樣幸福的Paul，Elven對他總算沒有了當初知道Susan原來以前一直暗戀自己因而間接令她拒絕阿Paul的內疚感。
 
「傾緊咩笑得咁開心呀?」這時Susan到步見大家笑得很開心便問道。
 
Rex: 「無呀，講緊Paul要多謝你當日唔接受佢咋嘛~」
 
「阿Paul 唔駛客氣㗎，想多謝我比多啲人情得㗎喇~」Susan並沒有生氣反而很自然地笑笑口接道。
 




從這便看得出二人因為現在都各自找到幸福，所以兩人之間都完全沒有任何芥蒂。
 
 
整餐晚飯在輕鬆愉快的氣氛進行，散席時因Elven和Susan同路，所以二人便一起走了一段路。
 
「Elven呀，我結婚前講個秘密你知呀~」望了望Elven，Susan突然開口。
 
Elven: 「好呀，請講。」
 
「其實中學嗰陣，我暗戀過你一段好長嘅時間㗎，不過嗰陣你同Ada感情咁好，所以我只可以收係個心入面唔敢同你講…」Susan帶著點懷緬地說。




 
「你隱藏得好好呀，我本身真係一直都唔知㗎，多謝你鍾意過我… 不過咁你都應該好似Paul多謝你咁多謝我喎，唔係你都搵唔到依家哩個未來老公，跟住我實無幸福㗎~」Elven帶著微笑溫柔地說。
 
「咁你又唔好咁講… 我地無緣啫~ 咪住! 本身唔知? 即係之前知道咗? 唔怪得你個樣好似一啲 surprise都無啦!」Susan說到半路發覺好像有點不妥。
 
「係呀…因為之前有人講過我聽囉…」Elven有點不好意思地說。
 
「Rachel?」Susan第一時間便想起她。
 
「係呀…」聽到這名字，Elven神色一黯地答。
 
 「死女包! 係喎，咁你地依家點? 仲有無聯絡?」Susan並沒發現Elven神色上的改變而只是因想起了閨密而不自覺間流露出笑容。
 
「佢嗰陣都係想安慰我比返啲信心我，唔好怪佢啦~  無呀… 五年前開始都無再聯絡喇…」因為尷尬，那件事後Elven都沒有再和Susan談起Rachel，當然，本身Elven和Susan這幾年的聯絡也是少得可憐。
 




「係? 我記得幾年前佢同我講過嬲咗你，之後我地都無咩特別再講起過你lu，就算我間中有提及佢都好似無咩特別反應。」Susan知道Elven曾經喜歡過Rachel，但她沒想過這麼多年後Elven仍沒有把她放低，所以並沒甚麼避忌地說。
 
「嬲咗我? 嬲咩?」但她的說話卻讓Elven感到驚訝於是問道。
 
「好似話嬲你叫佢同男朋友分手，唔太記得了…」Susan:想了想後答。
 
(原來係咁… 睇嚟佢真係好鍾意佢男朋友…)
 
Elven突然明白多了為何之後的Rachel那麼決絕，原來是因為真的嬲了自己。
 
「嚟緊你地都有機會見啦!」Susan見Elven在發呆沒有回應後便道。
 
「係啦，唔知果日會點呢…」Elven像回應Susan又像和自己說。
 
 




很快，Elven苦等已久的日子終於來到。