只想和你愛一次: 35.安撫

望著Rachel由一臉呆滯到到痛哭的表情，Elven想起了一年前的自己… 這相同的經歷難道真的是命運的作弄?
 
Elven為Rachel感到心痛，他很想衝出去抱著Rachel安慰她，讓她盡情哭在自己的肩膊上，分擔她的痛苦，但他知道自己不能夠這樣做，他能做的就只是默默企在附近，等Rachel需要他的時候才出現…
 
「我今晚會全晚係hall附近㗎，你有需要隨時搵我啦，我通宵standby…」比賽雖然完結，但波還是要醫，而且Elven不知道Rachel這刻想不想見自己，所以他send了一個message給Rachel後便先行離開回C-hall 休息，他已預先找定一間房這晚在hall”屈蛇”。
 
「對唔住，令你失望… 我無事呀，唔駛擔心，今晚應該仲有排忙，你唔駛等我喇…」過了兩個鐘後Elven收到Rachel回覆。
 
Elven:「唔緊要呀，我今晚點都會喺hall瞓，你有需要就搵我啦，唔想嘅都無所謂㗎。」
 




因為擔心會miss掉 Rachel信息，Elven一直不敢睡覺。時間慢慢過去，正當Elven就快支撐不住的時候，電話終於震動，是Rachel的SMS。
 
Rachel:「瞓咗未?」
 
Elven:「未呀，你點呀?」
 
Rachel:「咁依家出嚟?」
 
Elven:「好呀，我隨時ok」
 




Rachel:「樓下見。」
 
 
這是Elven第一次看見Rachel帶眼鏡，應該是剛沖完涼除了con，身穿普通T-shirt短運動褲再配上人字拖。 Rachel的眼略帶浮腫和紅筋，明顯是剛哭過的樣子，這讓Elven心裏感到一陣難過…
 
「本身諗住瞓，不過瞓唔著諗起你都喺hall，所以就睇下你瞓咗未…」Rachel見到Elven後勉強撐起笑容咁講。
 
Elven:「我本身都差唔多，見你無覆我估你都唔會搵我，不過我真係好擔心你，所以都瞓唔著…」
 
「傻佬…駛咩擔心呀? 我係好唔開心，但唔通因為咁做傻事咩…」Rachel沒好氣說道。




 
Elven:「咁我唔想你唔開心嘛…」
 
Rachel:「你都係過來人，你應該都明白邊有可能會無唔開心呀… 我係咪好無用? 成功咁由冠軍隊變成out pool隊… 」
 
「我知你唔想，不過有時人生就係咁… 唔好講你呀，職業球隊有時都會啦，車仔拎完歐冠下一年咪又係分組賽出局，比賽有時真係時也命也好難講㗎…」Elven也不知該怎樣安慰Rachel只好說道。
 
「我依家腦入面仲係不斷咁浮現出最後嗰球嘅畫面…本身我諗住效法你，自己主動要擔當最後一擊，點知… 我覺得好對唔住大家呀…」Rachel望住前方眼神略帶空洞地說。
 
Elven:「我點會唔明呀，就正如我不時仲會諗起當日嗰兩球罰球... 不過嗰個時間又邊有人可以肯定自己射得入呀? 職業球員都唔得啦... 你主動take up哩個責任已經係有擔當嘅表現，我肯定無隊友會怪你... 而且你最後嗰兩個假動作已經做得好好，唔係波都射唔到呀! 至於入唔入，哩啲時間本身就係睇個天點決定…」
 
「你做咩讚自己呀…我嗰招明顯係喺你身上學㗎喎…」Rachel笑了一笑咁講。
 
Elven:「比你發現咗添! 最弊你連射唔入都學埋我呢… 真係唔認你做徒弟都唔得啦…」
 




「係喎! 原來罪魁禍首都係你， 最衰都係你呀!」Rachel說完便突然轉向Elven並用拳頭不斷搥他心口。
 
Elven感受到Rachel需要一個發泄口，所以任由她一搥一搥打在自己身上，然後當她看見Rachel又開始忍不住流眼淚的時候，他終於忍不住伸出雙手把Rachel抱向自己懷內…
 
「係我衰係我唔好比咗個錯誤示範你… 明知輸嗰種感覺有幾難受，我竟然仲會比你感受到哩種感覺… 對唔住呀…」Elven抱著Rachel說道。
 
「點解我咁努力最後都係得到哩個結果，點解無啦啦對方會有個exchange student，點解最尾唔可以比我射入呀…點解... 我真係好唔甘心…好唔甘心呀嗚…」Rachel沒有再打Elven而是伏在他懷內邊哭邊抱怨。
 
「人生就係咁，有時付出同收成可以好唔成正比… 喊啦，盡情喊晒出嚟，喊完就會舒服啲㗎喇…」聽著Rachel的哭聲，Elven心裏同樣感到痛楚。
 
就這樣，Rachel伏在Elven肩上再一次痛哭起來，而Elven則只能用手輕輕拍打著Rachel的背部安撫著她…
 
 
「我好返好多喇… 多謝你呀。」過了一會，也許注意到自己失態，Rachel一個閃身從Elven懷內走了出來，略帶羞澀說道。
 




「傻瓜，我同你之間唔駛講哩啲啦…」Elven回應說。
 
Rachel: 「咁我地行多陣?」
 
Elven:「好呀」
 
Elven把話題帶離了籃球，然後他們慢慢走著走著又走到了海傍附近坐了下來。也許是因為哭得太累，也許是心情終於得到釋放，坐下不久Rachel又不自覺挨著Elven睡著了，而Elven則不敢再動，一直讓Rachel這樣睡著。
 
過了很久，淡淡的金黃開始由本身漆黑一片的夜空中努力綻放出來。Elven望向Rachel，望著這個帶給自己很多歡笑，讓自己人生重拾盼望，但同時間亦讓自己萬分痛苦難受的女孩，他肯定自己已經深深喜歡上她，而喜歡的程度甚至比當年的Ada更過之而無不及。
 
無限的愛意湧現，他忍不住又把嘴唇慢慢貼近了Rachel的臉龐，然後輕輕印了一印。這時他並沒發現遠處原來有一個鏡頭正對著他們，而這亦讓Elven付出了沉痛一生的代價。