只想和你愛一次: 33. 打氣

「唔好氣餒呀，輸咗一場啫，贏晒之後嗰兩場一樣出到線㗎，最緊要知道輸嘅原因係咩然後改善!」知道結果後Elven立即安慰Rachel。
 
Rachel:「大家太遲入局喇...一開始我地射極都唔入，幾次失誤又比人打咗幾球快攻，結果士氣越嚟越差… 下半場雖然開始上力好返啲但都已經太遲追唔返了…」
 
Elven:「第一場比賽有時都真係會咁，大家都未習慣返比賽感覺，同埋打波有時真係好講個勢，勢好就乜都順，唔好就真係乜都唔順... 不過你作為隊長，一定唔可以泄氣，就算當時士氣幾差，你都要keep住自己士氣高昂，再感染同motivate返其他人。如果連你都頹埋，咁就真係玩完㗎喇… 喺哩啲時間，作為隊長或者皇牌球員，就係要打啲士氣波刺激返成隊士氣，所以心理質素好重要㗎。」
 
「我都明，不過有時真係好難…」Rachel仍然泄氣道。
 
「難都要做，已經無時間比你再頹落去㗎喇，下場再輸就直接byebye所以一定要贏。有啲人受壓力下會逼出潛能，超越自己，但有啲就完全唔受得壓力，一有壓力就連平時五成實力都無，你覺得你係邊類人?」Elven開始加重語氣。
 




「唔係覺得自己係邊類… 而係一定要做第一類人呀!」果然Rachel受壓下開始復甦。
 
「態度正確! 知道問題就對症下藥，調整好心態啦!」Elven知道Rachel已經有返火同精神。
 
Rachel:「Yes Sir!」
 
 
 
幫Rachel回復鬥志是Elven暫時唯一可以幫到她的事，至於之後能不能收復失地就真的要看她自己作為隊長的能耐。不過就在Rachel回復生氣數天後的一個晚上，Elven突然又收到Rachel的電話。
 




「我啱啱同男朋友吵大鑊呀…」Rachel略帶聲沙說道。
 
「咩事呀?」自從錯誤表白事件後，Rachel甚少會再向Elven提起關於自己男朋友的事，不過有時從Rachel說話語氣的心情起伏，Elven大概還是能感受到他們甚麼時候可能有過爭執。Rachel這次竟然主動向他提起，Elven猜想這次問題可能真的比較大了。
 
 「佢想約我星期六晚食飯但我要練波，之後佢就開始爆，怨我成日咁忙無時間理佢，理佢都係成日淨係同佢講hall 啲野… 我知我有唔啱，近排成日睇波練波，有時又要煩hall其他嘢真係少咗理佢… 但我真係好緊張個比賽，亦都真係有自己責任要負㗎嘛! 我其實好大壓力…有時辛辛苦苦抽咗時間約佢佢自己有時咪一樣都約咗friend或者有活動唔得閒… 」Rachel越講都開始越激動。
 
Elven:「咁你近排係咪真係reject過佢好多次? 近排見嘅頻密程度係點?」
 
 「之前都盡量一星期見一兩次，不過近哩個零月係一星期都未必有一次嘅…」Rachel底氣不足地說。
 




Elven:「咁咪係囉… 咁你有無解釋下佢聽點解你咁忙? 希望佢體諒你? 」
 
 「梗係有啦…我成日講hall嘅嘢，就係想表達哩樣野對我真係好重要，同埋都希望佢可以理解多啲，同我生活圈子唔好差咁遠支持下我， 但點之反而令佢越嚟越無耐性… 好似上次輸波咁，佢淨係講咗句唔好唔開心，之後就無再點理我安慰我，你氹我嘅時間仲多過佢呀…」Rachel埋怨道。
 
「外人其實係好難理解我地hall啲文化，所以有時佢地真係未必可以明白點解我地成日咁忙咁投入好似賣身比間hall咁，亦可能因為咁而產生左一啲誤會...佢地唔係唔體諒，而係真係唔明，所以我地都要體諒佢地真係唔明呀。
 
同埋調返轉諗，佢嬲你少陪佢某程度上咪即係佢著緊你囉! 佢係唔鍾意你唔緊你嘅，你唔搵佢佢仲開心啦! 所以其實佢咁，都唔一定係壞事黎㗎…  至於我，你唔好搵佢同我比啦，你係我徒弟仔嘛，衣方面我梗係緊張多過佢啦，你輸咗我無面呀!」Elven耐心開解Rachel。
 
 
「哈! 人地好認真呻緊你又引我笑… 不過聽完你咁講我舒服返啲喇， 多謝你呀… 點我都唔諗住喇，專心應付埋後日場比賽先，一定唔可以輸丟師傅仔嘅架㗎嘛!」Rachel終於笑返講。
 
Elven:「係呀，有咩都唔好諗住專心比賽先啦，我相信好似上次咁隔幾日佢冷靜返就會搵返你㗎喇。我明天同公司請定假嚟睇你最後嗰場pool賽，所以你後日果場唔好輸提早出局呀，唔係就逐你出師門!」
 
Rachel: 「知道!」
 




雖然能理解，但心底裏Elven其實仍很不滿Rachel男朋友在這段時間不單不給予Rachel支持，還要為Rachel製造了如此大的負面情緒。只不過為了讓這對Rachel的影響減至最低以免影響她球場上的表現因而輸掉比賽提早出局，Elven只能盡力為他講說話去安撫Rachel的情緒。
 
(其實我深信我著緊你嘅程度，一定遠遠比你男朋友高，只係你永遠都唔會知道同明白…)
 
 
幸好Rachel不負眾望，在第二場比賽中表現出色獲得勝利，只要最後場pool賽獲勝便能晉級四強。