只想和你愛一次: 32. 轉變與心魔

回家居住後不久，Elven便找到了一份sales的工作並開始了上班一族的生活。
 
沒了hall之間的便利和聯繫，Elven和Rachel自然亦沒甚麼見面的機會，不過他們還是保持著差不多每天都有MSN和SMS溝通。而基於對Rachel的掛念，Elven不時也有嘗試約Rachel吃飯，只是一來Rachel比較忙碌，二來他自己又不敢約得太頻密害怕這會讓Rachel反感和誤會，所以之後他們一直也是差不多兩個月時間才會有見一次面的機會。
 
Rachel: 「喂~ 返工返成點呀?」
 
Elven:「還好啦，一個字- 累…」
 
Rachel: 「其實你份工係做咩㗎?」
 




Elven:「有無睇過The Pursuit of Happyness? 同主角差唔多啦~」
 
Rachel: 「咁咪同醫生好多交流?」
 
Elven:「都會㗎，有時仲要睇住佢地做手術~」
 
Rachel: 「嘩，有時我都好奇好想睇下係點，但又驚好恐怖喎… 你會唔會騷擾到佢地跟住出醫療事故㗎?」
 
Elven:「會㗎，之後比人拉咗去坐監，咁就可以等政府養一世lu~」
 




Rachel: 「但咁就睇唔到我打champfight 了…」
 
Elven:「到時我逃獄出嚟睇咪得囉~」
 
Rachel: 「低能仔~ 點解你出咗嚟做嘢個人都仲咁低能㗎! 約咗男朋友呀，遲啲再講啦，bye~」
 
 
沒有人會想看見自己喜歡的人和另一個異性在一起，更勿論自己和她還要等很久才有見一次面的機會。隨著Elven越陷越深，和Rachel亦無可避免地比以前變得疏離，他對此的感覺也越發難受。
 
有時他會覺得自己好像回到Ada和Sam初初在一起時的感覺，甚至質疑當日任由自己喜歡上Rachel的決定到底是對還是錯，因為當時的他忽略了一個可能性，就是若果有一天他對Rachel的感情超越了Ada，那麼他就只會變得更難抽身，而所受的痛苦同時亦只會更大。




 
當然，這對於當日的他來說，根本就不存在發生的可能，因為當時的他根本不可能相信會有一個能比Ada讓他更愛的女孩子存在。
 
 
人始終是自私的動物，隨著負面感覺的累積，Elven開始壓抑不住自己的心魔，他渴望有一天自己能和Rachel在一起，成為那個有資格和合適身份可以照顧她一輩子的男人。只是他亦知道除非有一天他們分手了，不然他的機會是微乎其微，所以他唯一能做的就只有等待，等待著那不知會不會出現的一天。
 
有時他又會想，若果自己能在他們一起前認識Rachel，那結果會否能改變? 若果時光能倒流，他一定從少便去她那間教會，比Rachel男朋友更快遇到Rachel，那麼他便有機會能來個逆轉全壘打了。
 
而隨著這想法慢慢萌生，Elven發覺自己已經不再像以前那麼痛恨Sam了。他突然明白所有事情說穿了其實都只是選擇問題，Sam覺得Ada比自己重要，所以他選擇了Ada而放棄自己這段友誼。
 
這是不是能用對與錯去衡量呢? Elven沒有答案，因為感情始終是難以控制，而且若果Ada覺得Sam是比自己更適合她因而最後選擇了Sam，自己又能否說她錯了? 追求幸福並不是罪，自己和她亦只是男女朋友關係而不是有山盟海誓的夫妻。
 
Elven嘗試問自己，若果換轉自己是Sam，Ada是Rachel，自己又是不是一定不會像Sam那樣為愛情而捨棄友情? 他開始不能確定…  既然如此，他又何來有資格去嬲或者憎恨Sam?
 
當然理解不代表他能把Sam重新再當作朋友，因為傷害確實已經造成，而自己亦根本不可能對他再有信任，只是他開始能理解他當日的決定，不再憎恨他罷了。




 
理性上是這樣分析，但感性上或許這想法上的改變其實亦只是單純地因為Elven真的慢慢放下了Ada，所以也順帶放下了這段仇恨。
 
既已不再在乎，又何需再要介懷?
 
 
日子一天一天過去，轉眼間又踏入了新一年。這天下午Elven正在office上班，電話突然響起，是Rachel打來。Rachel找Elven通常都是MSN或者SMS，很少會主動打電話給他，所以這電話讓Elven有點意外，不過更多是開心。
 
Rachel:「喂? 你得唔得閒呀? 阻唔阻你返工?」
 
Elven:「ok呀， 做咩?」
 
Rachel: 「師傅我好緊張呀… 一陣第一次開pre-match meeting，好驚講錯嘢或者啲隊員唔服，又驚自己諗得唔夠多喎… 點算呀! 我未試過咁緊張㗎…」
 
(賽都比過唔緊張反而開個pre-match meeting 咁緊張? 果然好可愛呀下…) 聽完Rachel的擔憂後Elven都覺得有點意外，不過嘴裏還是要給Rachel一點信心。




 
Elven:「傻瓜，咁都好緊張? Pre-match meeting嘅重點其實都係講解下明天對手嘅特性同埋自已隊嘅戰術，無咩好緊張喎，都係照功課UP咋嘛~ 啲隊員日日練波你都熟晒啦又唔係陌生人，有咩好驚呢? 比賽你都打過咁多場，講幾句野濕濕碎啦~ 比啲信心自己!」
 
「我其實都唔知自己緊張啲咩…可能係第一次掛?同埋有時佢地都唔聽話…」但Rachel卻仍處於害怕狀態。
 
「你當只係同條team普通傾下偈啦，或者真正令你緊張嘅其實係明天個比賽… 好啦，為咗令你無咁緊張，我講樣我今日發生嘅低B嘢你聽呀~
 
話說我今日傷風係咁流鼻水，晏晝就諗住食啲辣野等個人熱啲應該會好啲，於是就叫咗個地獄拉麵，點知一食真係辣過核爆，結果啲鼻水無停不突止，連眼淚都一齊流埋結果仲辛苦… 所以你要記住食辣嘢醫傷風感冒係唔work㗎…」為了讓Rachel不再緊張，Elven突然靈機一觸便和她分享了自己今日的一件瘀事。
 
「哈哈哈! 你真係好白痴呀! 點解可以咁白痴㗎? 你之前未食過辣嘢唔知食辣嘢會刺激鼻水同眼淚㗎咩? 笑死我喇~」Rachel聽完後完全制止不住自己的笑聲。
 
「咩喎… 食辣野暖身我以為真係會work嘛…」而Elven則仍為自己的行為而努力解釋。
 
Rachel:「低能仔! 不過聽完你個kai故仔我真係唔緊張喇，多謝你呀~咁我去開會喇，今晚有機會再搵你啦，拜拜~」
 




「Good Luck! Byebye~」Elven依依不捨地收線。
 
 
「嘩，識你咁耐都未聽過你把聲咁溫柔，女朋友嚟㗎?」一位坐附近的同事見Elven收事後便突然問他。
 
「朋友啫...咪咁八卦啦你!」Elven帶點尷尬回應同事。
 
(我都好想佢喺我女朋友呀...) 同時心裏暗暗想道。
 
剛剛的拉麵事件，當然是Elven故意說笑好讓Rachel能放鬆心情。認識了這麼久，Elven對Rachel的性格和心理狀態可以說是瞭如指掌，總能找到方法讓她能調節好容易緊張和自信心不足的問題。
 
這通電話後，Elven整天餘下的時間都在愉快的心情下渡過，不過可惜的是Rachel在第二天的比賽中卻意外落敗了。