只想和你愛一次: 30. Joint-Hall Ball

「終於返到hall喇...套戲最後點呀?」當晚Rachel MSN Elven。
 
Elven:「話明喜劇最後男主角梗係成功用計氹返女主角大團圓結局啦~ 你男朋友呢? 佢點呀? 無事嘛?」
 
Rachel: 「遲啲等我上網睇返後半部先~ 佢照過骨好彩無事呀，係拗柴要抖返兩個星期囉，男人一打波都係咁搏命唔錫身…」
 
Elven:「無咩事就好啦~ 咁比賽梗係要訓身啲㗎啦 ，你自己幻想下你下年interhall會唔會好錫身咁打?」
 
Rachel: 「係係係 ，你啱你啱~ 咁你最後食咗咩呀?」
 




Elven:「無呀，得自己一個咪返咗hall食杯麵囉...」
 
Rachel: 「呀…咁慘!? sorry呀... 下次請你食飯補返數呀!」
 
Elven:「咁你都唔想嘅... 不過如果真係想補償我，嚟緊都真係有個機會~」
 
Rachel: 「咩機會?」
 
Elven:「你有無興趣去ball? 我地每年學期尾都會同另外幾間其他大學嘅hall一齊攪個ball，要帶女ball partner呀…」
 




Rachel: 「ohhh 我聽Annie 講過，不過咁又好似唔太好，我驚惹人誤會呀…」
 
Elven:「識你嘅都知你有男朋友啦~ 我又唔會誤會嘅… 不過如果你覺得唔舒服就由佢啦，其實我原本都諗住唔去…」
 
Rachel: 「點解呀? 最後一年唔去好可惜喎…」
 
Elven:「無partner我又唔想格硬搵… 我其實都係無咩女仔friend所以先問下你咋，上年我都無去…」
 
Rachel: 「嗯… 如果你唔會誤會，我都可以陪你嘅，等我唔駛再為今日中途走咗而內疚嘛~ 同埋最後一次我都希望你可以參與多啲 hall嘅活動，唔好比自己留有遺憾! 而且Annie都會去我應該唔會悶嘅~」
 




Elven:「哈哈，又未會去到遺憾咁誇張掛… 咁我預定你明天報名㗎喇 ， 多謝!」
 
Rachel: 「你請我去ball我多謝你至啱~」
 
 
若果不是Rachel，Elven是絕對不會參加這個ball。兩年前的ball因碰巧是在復活節，所以那年Elven能夠和Ada攜手參與，留下了一段那時甜蜜現在痛苦的回憶，這亦是為甚麼上一年Elven毫不猶疑選擇缺席，因為這個ball勾起的回憶對他來說實在是太過傷感。
 
至於今年，他願意參與的原因當然是因為Rachel願意當他的ball partner，他希望自己和Rachel也能製造多一點屬於他倆的回憶。
 
那天Rachel的中途離開， Elven表面上看似沒甚麼事，但心底裏其實是十分失落。上天的警告並沒有讓他退縮，相反，讓從不認命的他更加想向天挑戰。
 
隨著對Rachel越陷越深，他也越來越介懷她有男朋友這事實，而一次又一次的不快樂更讓他開始產生一些其他的想法，他想要更多...
 
當然，這一切Elven只能藏在心中，因為他知道這些想法一旦被對方知道，那他們就不可能再做朋友，然後他又會再次跌入那無盡痛苦的輪迴。
 




以後別做朋友 朋友不能牽手
想愛你的衝動 我只能笑著帶過
最好的朋友 有些夢 不能說出口
就不用承擔 會失去你的心痛
 
考完了所有試後，終於到了這joint-hall ball的日子。比約定時間早了15分鐘，Elven便已在L-hall樓下等著Rachel，因為他覺得在這種場合男孩子等待女孩子也是約會的其中一部份。當他看見那天的Rachel後，他簡直不敢相信自己的眼睛。
 
Rachel一身黑色露肩長裙配上紅色的高踭鞋，而悉心打扮後的她少了平時那份稚氣，多了一份驚豔和高貴的氣質，那一刻Elven更加羨慕Rachel的男朋友能夠擁有這樣漂亮的一位女孩。
 
「嘩，你今日真係好靚呀!」Elven 亳不吝嗇自己由衷的讚賞。
 
 「哈哈 ，多謝! 會唔會化得太衡呀?」得到讚賞Rachel笑得很開心但同時又有少少擔憂地問。
 
「唔會呀，真係好靚!」Elven如實作答。
 




「真係識講嘢呀下~」得到Elven的肯定Rachel終於放下心笑著說道。
 
所謂的ball其實有點像中學時代的謝師宴，就是大家都盛裝到酒店出席的晚宴。由於Elven和Jacky同枱，所以Rachel和Annie能坐在一起，讓大家整晚氣氛都不會有悶場。
 
說起Annie，她和Jacky仍處於蜜月期恩愛非常，而因為Jacky的關係，她自然亦知道Elven喜歡Rachel這事。
 
有感於Elven有份幫手撮合自己和Jacky，加上Jacky間中亦有幫Elven講說話，又告訴了Annie Elven和他ex的故事，所以Annie對Elven的印象十分不錯。此外，其實Annie心裏一直覺得Rachel男朋友對Rachel並不是十分好，所以雖然她明面上不會做甚麼，但暗地裏如有需要時她還是十分願意幫Elven一把。
 
Ball的中段開始，便會開放舞池讓人跳舞，而對於也是他們第一次的Jacky和Annie，很快他們便踴躍地出了去跳舞。也許是怕尷尬，Elven和Rachel並沒有跟他們出去而只是坐在原位上傾偈，間中討論一下Jacky和Annie的舞姿。
 
跳完了一支舞，Annie 突然回來把Rachel捉了出去一起跳，而隔了一回Jacky同樣把Elven捉了出去。
 
「嗱，做兄弟算係咁啦，之後就靠你自己把握機會喇~」Jacky靜俏俏在Elven耳邊說了句，然後便走到Annie旁主動把她搶回來。
 
「噢， 我要同返Jacky跳了，反正都出咗嚟， Elven你代我同Rachel跳埋隻舞佢啦~」Annie作勢把Rachel推到Elven面前，然後抱著Jacky繼續沉醉於只屬於他們兩個自己的世界之中。




 
望著一臉尷尬的Rachel，Elven說道「都出咗嚟咯，我地都跳下啦，唔係唔似去ball㗎嘛~」
 
也許是害怕拒絕會讓情況更尷尬或是會傷害到Elven，Rachel略一遲疑便答道「好呀。」
 
作為波牛，Elven其實並不太會跳舞，不過順著拍子慢慢一步一步跳的基本動作，他還是能勉強應付。
 
Rachel把左手輕輕放在Elven的肩膊上，而Elven則把右手放在Rachel的纖腰上，然後他們的另一隻手十指緊握，慢慢順著音樂的節奏一步一步的移動。
 
這刻，Elven的心臟比他之前任何的比賽和表演都跳得還要快和緊張。望著這讓自己越愛越深的Rachel，他很希望這首音樂永遠都不會完，時間能夠永遠停留在這一刻，他很希望自己能夠永遠和這女孩在一起… 而感受到Elven 灼熱的目光，Rachel並沒有迴避，只是用一個很柔和的眼光回望著Elven。
 
沒人知道Rachel這刻在想甚麼，他們彼此亦沒有再說話，只是靜靜地享受著這一刻…
 
可惜音樂總會完結，當音樂靜止，Rachel首先回神過來。
 




「跳完喇 ，返去咯~」她鬆開了和Elven緊握的手說了句，然後便轉身走回自己的坐位上。
 
望著Rachel的背影，Elven知道自己這一生永遠也不會忘記剛剛的數分鐘。
 
 
隨著晚會曲終人散，Elven再不捨得在送Rachel回到hall樓下後還是要和她分別。
 
「多謝你邀請我呀~ 我今日玩得好開心!」因喝了酒而臉略帶點紅的Rachel對Elven說道。
 
「我都好開心呀! 多謝你肯陪我，我估我以後唔會再一聽見ball就諗起啲唔開心嘅嘢喇~ 你返到去早啲休息啦~」Elven又習慣性把手輕輕放到Rachel頭上拍了拍說道。
 
就在Elven講完再見打算轉身離開的時候，Rachel突然行前了一步並用自己的嘴唇輕輕在Elven的臉上點了一點，溫柔地說了句「傻瓜，多謝你呀，byebye~」然後便頭也不回轉身直接走入了宿舍，剩下一臉驚呆的Elven企在原地…