只想和你愛一次: 23. 談心

(輸咗…)
 
雖然沒有隊友責怪Elven，但反勝的希望葬送在自己手上還是讓Elven陷入了深深的自責。腳腕傳來的痛怎也不及心裏的痛，種種的不甘和內疚不斷衝擊著Elven的淚腺。
 
醫波過後，Elven回hall沖完涼便躺在床上整理自己的情緒，然後不知不覺便合上眼睡著了，到醒來時發覺已經是零晨一點，拿起電話才發現有幾個來自Rachel的SMS。
 
Rachel:「你無事嘛?」
Rachel:「Hello? 忙緊?」
Rachel:「知你無心情，不過可以的話都覆下我啦，好擔心你呀…」
 




「無事呀，Sorry，應承你嘅野做唔到了…」Elven覆了句。
 
Rachel:「唔緊要啦，我知你已經盡咗力，只係腳傷唔好彩啫，唔係實贏到㗎! 完場嗰陣望住你喺場上面發呆嘅背影，我都好唔開心個心覺得好唔舒服…」
 
Elven:「傷都唔係藉口… 作為球員唔應該比自己受傷，同埋輸咗就係輸咗啦，無安慰獎㗎… 」
 
Rachel:「你肚唔肚餓? 我有啲餓呀，出嚟陪下我?」
 
Elven想起自己因沒有心情所以晚飯都沒有吃，現在確實有點餓便答道:「好啦，換件衫樓下等。 」
 




不久， Elven看見Rachel拿著一袋叮好的燒賣，兩隻雞脾和兩盒朱古力奶從hall走出來。
 
「我地慢慢行返落西環海邊食?」Rachel把手上的食物向Elven舉起然後提議。
 
「好呀，無所謂。」Elven沒所謂答道。
 
於是他們開始一邊沒頭沒腦地談天，一邊慢慢行到西環海邊的長椅坐下然後開始開餐。
 
 
「知你其實係想專登帶我出嚟，我無事呀，唔駛擔心…」Elven當然知道Rachel是擔心自己所以故意找他出來散心。




 
「真係?但點解我感覺你仲係心事重重，比我好唔開心嘅感覺?」Rachel望了一望Elven然後說。
 
「可能累啫，同埋輸波咁都真係會唔開心嘅…」Elven無奈說道。
 
「不如你張你心入面唔開心嘅野講晒出嚟，可能會舒服啲呢?」Rachel又說。
 
「唔開心嘅野有咩好講呢? 我好快無事㗎喇…」Elven拒絕。
 
「但我想聽你講，我想見下真正嘅你，因為你一直比我嘅感覺都太強大太正能量喇，但直覺話我聽你其實都有好多唔開心嘅野只係自己收收埋埋... 我好想可以幫你分擔做你嘅聆聽者...」Rachel用堅持又帶著期盼的眼神望著Elven說。
 
「傻瓜，我係你師傅黎㗎嘛，有咩難關未捱過?而且點可以喺你面前show軟弱呢?」但Elven仍然不願意在Rachel前展露自己軟弱的一面。
 
「咁你今晚唔好當我係徒弟仔，當我真係你嘅好朋友，將心入面想渲泄嘅嘢講晒我聽啦…」Rachel 望著Elven，仍然很堅持地道。
 




望著Rachel堅定的雙眼，從那閃亮的膧孔中，Elven感受到Rachel真切的關心，他不忍心拒絕。
 
「好啦，我試下… 其實我覺得我好失敗，有個好好嘅女朋友自己唔識珍惜，比自己嘅好朋友出賣，然後以前啲中同又唔企喺我嗰邊… 隔咗咁耐，我都仲完全放唔低到佢，仲會為佢傷心，其實我心底入面好睇唔起自己，覺得自己好廢好卑微…
 
之後游水又輸，籃球又輸，乜都做得唔好... 唔好睇我平時喺你面前好似好有自信咁，其實喺依年幾，我已經無晒自信… 今日最後嗰兩球罰球，如果我可以射入，就唔會累到成隊波要一齊飲恨喇…」Elven努力地將心裏埋藏已久的負面情緒說了出來。
 
「我未失過戀無資格講失戀嘅真正感受係點，但我覺得你唔應該將所有責任都揹晒上身... 兩個人分手，除非係你出軌啫，唔係嘅其實大家都實有責任... 再加上你地本身又Long D，入到大學又完全唔同環境，要keep到本身難度就十分之高。
 
而且點可以因為自己放唔低就覺得自己廢㗎? 正正係因為你投入哩段感情，真係愛過付出過，所以先咁難放得低...唔通認真拎個心出嚟反而係錯? 調返轉如果7年感情轉眼間你就可以放低無晒事，咁我反而覺得你有問題啦，其實哩啲長情嘅男仔先Charm呀~
 
至於游水同籃球，我明輸咗係好難受…不過冠軍永遠只得一個，唔係贏就係輸㗎啦，而且輸嘅人永遠比贏嘅人多唔知幾多倍，唔可以因為輸就否定晒自己一切嘅努力... 你諗下哩兩年嘅過程，就算最後輸咗係咪又真係完全無得著? 記唔記得之前水運會公佈你地hall拎第三嗰陣全場嘅掌聲?  果啲對手嘅respect同欣賞都係你地自己努力賺返嚟㗎! 而且你嚟緊仲有隊足球嘛，所以完全未到放棄嘅時候㗎~
 
或者你哩家真係有信心危機，但對我嚟講你真係好比到信心同正能量我，只要係你講基本上我都會聽都會信~ 你知唔知呀，我近排發覺自己不知不覺間對你都產生咗種依賴呀，有咩問題或或者唔開心第一時間都會諗起你想同你講!
 
所以比啲信心自己啦~ 雖然結果唔係完美，但由初初連球隊都無，到到今日拎到咁嘅成績，我真心覺得你已經好勁!」Rachel一口氣講道。




 
「哈，突然咁識安慰人，我都老懷安慰喇~ 放心啦，你講嘅嘢，理性上我完全明白，只係感性上暫時未必係我控制到啫... 同埋我咪一直講我無事囉，係你唔信咋嘛~  黎緊足球隊真係最後喇，一定要Champ!」聽到Rachel千字文般的鼓勵，Elven感覺到自己的心情好像真的好回了不少，便回復自己一貫本色道。
 
「今次真係要講到做到呀，唔係我就叛出師門，以後唔睬你!」見Elven回復正常Rachel都放心了不少。
 
「咁為咗你哩個徒弟仔，都真係唔可以再輸喎~」Elven終於笑道。
 
Rachel:「梗係啦! 同埋見你咁頹咁無自信，我再講個秘密你聽啦... 記唔記得我之前講過其實我一早對你己經唔陌生?」
 
Elven:「記得呀。」
 
Rachel:「其實喺中學嗰陣有段時間，我成日聽Susan講關於你嘅野㗎~佢以前單戀咗你一段唔短嘅時間，只係你唔知啫~ 之後估唔到有日你會add我MSN，依家仲做埋好朋友~ 哈，如果無Susan之前嘅詳盡介紹，我都唔會咁放心同你傾偈咁快同你混熟，嗰種感覺就好似識咗一個己經神交咗好耐嘅朋友咁~」
 
「!!! 我真係完全唔知喎…」Rachel的資訊確實讓Elven感到驚訝，他從不知道Susan以前原來曾經暗戀過自己一段時間。
 




「佢嗰陣講到你好勁㗎，文武雙全，讀書運動音樂無一不曉，人靚仔又Charm，喺學校嘅萬人迷~ 唯一缺點就係太早有女朋友攪到佢無機會… 所以比啲信心自己啦，萬人迷!
 
其實嗰陣佢最後無同Paul一齊，同你都有啲關係... 不過放心啦，佢依家對你無晒野㗎喇，喺大學都識咗新男朋友lu~  所以你繼續扮唔知啦，唔係佢實嬲死我呀! 唔係見你今日咁頹我都唔會講你知呀!」Rachel哀求道。
 
「多謝你講個咁大嘅秘密我聽喎… 放心啦，我唔會出賣你嘅~」對方一番好意，Elven亦沒有理由陷Rachel於不義，而且都已成過去，所以Elven亦樂於讓這繼續成為秘密。
 
之後她們又繼續講東講西，直至天色開始轉白，Elven發現Rachel原來已經挨著他的膊頭睡著了。
 
 
突然間， Elven發覺自己的心情輕鬆了很多，之前一直積壓已久的鬱悶感亦好像消散不見了。
 
(本身已經咁累，仲要陪咗我成晚，辛苦你喇徒弟仔...)
 
想著想著，再望著旁邊這個女孩勞累的臉孔，Elven知道這一切都多得身旁這突然出現在自己身邊的女孩，然後嘴唇情不自禁地在她的額頭上輕輕點了一點…