【全劇終】《我喺街執咗個失憶嘅女仔返屋企》: 尋找希望（十五）

「因為咁，你至會出現喺呢個地方？」羅凱撒問。
 
我輕輕點頭：「我想做嘅事…呢個就係我嘅答案。」
 
「一切都係為咗佢？」
 
只要稍微抬頭，就可以望到我地休息嘅房間，呢一刻嘅阿帆應該處於熟睡之中，發緊一個好美好嘅夢，內容大概係同嗰個叫珀奈嘅女仔一齊，夢入面嘅佢好幸福——我知道係咁。因為一個星期總有幾晚，佢合埋眼都會叫住嗰個女仔嘅名。
 
我暗自地笑，隨即搖頭：「唔係，我做嘅一切只係好自私咁為咗自己，係一種單方面嘅自我滿足。」
 




「點解你唔同佢坦白？」
 
「冇咁嘅需要，我而家可以企喺度，係因為我攞咗原本屬於希洋嘅人生。所以高小悠只會存在一年，之後就會變返嗰個一世都背負罪疚感，代替希洋活下去嘅我。」
 
「咁樣真係好咩？你根本唔使咁自責…。」
 
我再度搖頭：「我已經決定咗。」
 
羅凱撒隔咗一陣之後講：「咁好，無論你決定係點，我都會支持你，呢個就係我嘅決定。」
 




我向佢投以感激眼神：「多謝你。」
 
佢轉身走：「返去啦，夜喇。」
 
「聽日場比賽，你要加油！」我喺佢背後大聲叫。
 
佢一臉為難：「白痴…。而家係半夜。」
 
「啊哈哈哈哈哈…」我指住佢笑，我地大家都喺度笑，好耐冇笑得咁開心。
 




＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
卯月死咗之後，所有人臉上都失去笑容。
 
但除咗咁之外，就冇任何改變發生。
 
細個嗰陣我覺得卯月係全世界最溫柔嘅人，直到而家都係咁覺得，我以為咁樣嘅人消失之後，外面嘅世界會有好大轉變，但原來唔係，冇咗卯月嘅世界仍然繼續無情地運作，絲毫冇改變過。
 
葬禮舉行嘅日子，天空由早上開始下雨。
 
本來嚟接我嘅應該係紫悅，但喺約定時間打開房門嘅係媽媽。我更加冇諗過佢嚟嘅目的係禁止我去卯月嘅葬禮。
 
任我如何哀求，佢依然無動於衷，原來我擅自踏出房間去見卯月最後一面嗰次，已經遠遠超出咗佢嘅接受範圍。
 
最後，佢甚至拎返嗰個由細到大都扣喺我雙腳，只係最近經佢批准先可以除下嘅東西出嚟。




 
一望到個腳鐐，全身發出無聲嘅顫抖。
 
「唔好，求吓你…。」
 
「首先係希洋，再嚟就係卯月，每次你踏出呢間房都唔會有好事發生。」眼前人嘅表情冷漠到令人心寒嘅程度。
 
我只能搖頭作為最後掙扎，但半點用都冇，隨著喀嚓一聲，嗰度熟悉嘅無力感又再回來。
 
我果然，咩都做唔到。