【全劇終】《我喺街執咗個失憶嘅女仔返屋企》: 尋找希望（十三）

睡覺嘅時候，我習慣躺在窗旁，確保視線範圍望得到外面嘅風景；雖然年月過去，我知道高田帆可能已經唔記得咗呢個地方，更何況只係同佢見過幾次面嘅我，不過我依舊每日期待，露台外面會有人伸手敲窗，叫我俾佢入嚟，然後我就會笑住鬧佢做咩唔由正門入。
 
今日都係平平無奇嘅日子，不過又有啲特別，因為係希洋走咗之後我地嘅第十個生日。
 
自從嗰個帶走希洋嘅夜晚，生日呢個概念喺我世界徹底消失。不論係大人們，抑或係我自己，似乎都冇意欲去記念呢個日子，因為連累希洋失去人生，自私地苟活嘅我冇資格去慶祝啲咩。
 
只不過，無論我點樣表達自己冇興趣過生日，唯有卯月每一年都會瞞住其他人，偷偷地帶個蛋糕嚟同我慶祝，呢個時候我會比平日更加討厭自己，因為內心總會擅自感到高興，然而呢份心情係絕對唔應該出現。
 
時近日落，外面有人敲響房門。
 




我以為係卯月，點知係紫悅把聲：「希渝，我入嚟喇。」佢一手拎住蛋糕，另一隻手拎住禮物盒。
 
「係紫悅？」
 
「嗯，係卯月叫我嚟，蛋糕同禮物都係佢預備。」
 
「卯月佢點呀？」最近卯月唔舒服嘅次數愈來愈多，成日要臥床休息，呢啲都係紫悅話俾我知。然而，被禁止踏出房門半步嘅我就連去探卯月都做唔到，只能從紫悅口中得知佢患嘅唔係嚴重嘅病，然後稍微鬆一口氣。
 
「冇咩大礙，不過暫時都要休息多啲，所以今日嚟唔到同你慶祝。」
 




「其實我一直都話，唔需要特登同我慶祝…。」我目光聚焦於地上。
 
「唔得，卯月話生日係一個值得慶祝嘅日子嚟，作為補償，除咗預備咗份禮物之外，佢仲安排咗個特別嘉賓——一個你應該好想見到嘅人。」紫悅神神秘秘咁講。
 
「好想見到嘅人？」我不由得期待起來，腦裏浮現嘅係高田帆個樣。
 
「嗯，」然後紫悅向外面招手，「可以入嚟喇。」
 
「…咳，失禮晒。」
 




房門被一隻略顯白晳嘅手推開，雖然對上一次見面已經記唔起係幾耐之前，不過佢個樣都係冇乜點變——
 
「希渝，好耐冇見，記唔記得我呀？」一個戴眼鏡嘅男仔對我揮手說道。
 
「…羅凱撒？」內心雖然有一刻閃過失望，但更多嘅係重逢嘅喜悅，「好耐冇見！」
 
「嗯，自從嗰次嘅生日會之後。」佢講緊嘅係十年前高田帆都喺度嗰一次。
 
「你點解會嚟嘅？」我急不及待問。
 
但紫悅拍拍手：「好喇，喺聚舊之前我地應該要切咗蛋糕同拆禮物先，尤其係份禮物唔擺得好耐。」 
 
「係咩禮物？」我望向紫悅手上嘅禮物盒，先發現原來冇蓋蓋住。
 
「你自己睇吓咪知。」紫悅將禮物盒遞俾我。




 
羅凱撒都湊近來望，見到裏面係咩之後，我同羅凱撒不約而同地驚喜歡呼。
 
而裏面嘅小動物就好似回應我地一樣，發出可愛叫聲：「嘰嘰嘰嘰——」