【全劇終】《我喺街執咗個失憶嘅女仔返屋企》: 尋找希望（四）

由細到大，我嘅世界除咗紫悅同卯月之外，就係希洋，呢個大我五分鐘嘅哥哥。
 
希洋唔理做咩都好叻，不論係大人安排俾我地嘅課堂，定係其他課外活動，佢從來冇令父母失望過。
 
同我完全相反。對於每日塞滿時間表嘅沉悶課堂，抑或係週末強制要學嘅鋼琴，我全部都冇興趣，都冇心機學。
 
每次被學習壓力逼到抖唔到氣，我都會偷走出大屋，匿埋喺海邊嘅燈塔裏面，呢個大概係我唯一嘅樂趣。呢個時候，希洋總會搵到我。
 
「原來你喺度？」
 




「點解你會知道…。」我瑟縮一角。
 
「因為我同你有心靈感應架嘛，你唔知咩。」
 
「…你講大話。」如果係真嘅話，點解佢樣樣嘢都做得好過我。
 
「點都好啦，捨得返去未呀？」
 
「唔返！」我堅決回答。
 




希洋嘆氣，然後坐到我隔離：「你要記住，為咗達成父母嘅期望，我地一定要好好學習，將來至可以繼承呢個屋企。」
 
「我唔想聽！我唔鍾意上堂，唔想繼承任何嘢…」
 
「我知你辛苦，所以你最低限度就做個樣啦，至少喺而家。」
 
「…做樣？」
 
「乜你以為我真係好似啲大人諗咁叻？我做任何事都花足二十倍心機，扮一個其他人眼中嘅完美榜樣，就係為咗將其他人對你嘅期望轉移去我身上，咁樣你就唔會就咁多束縛，可以自由自在咁做自己想做嘅事。」
 




我將希洋嘅說話消化一次，依然唔係好明當中意思。
 
但希洋好似識得心靈感應一樣，明明我咩都冇講，佢就輕輕拍我個頭：「唔明就算啦，總之你記住，有啲咩我都會喺前面幫你擋，知唔知？」
 
我重新展現笑容：「嗯！」
 
冇幾耐，就聽到卯月把聲：「…原來你地兩個走咗嚟燈塔呢邊？好喇我地要返去喇。」
 
「返去喇，希渝。」希洋企起身，對我伸出手。
 
卯月搵到我地之後，一句責罵嘅說話都冇，只係拖住我地返屋企，果然係世界上最溫柔體貼嘅人，繼希洋之後嘅第二個。
 
但係，唔係次次都咁好彩有卯月搵到我地。
 
嗰個伴隨狂風暴雨嘅黑夜永遠都會烙印喺我記憶裏面——




 
「就知道你又匿埋喺度。」
 
「又係心靈感應？」
 
「嗯，乜我講咁多次你都唔信架？」
 
「因為聽落就好似氹細路仔嘅大話。」我忍唔住笑。
 
「明明我同你都係細路仔…」一下雷聲打斷咗希洋嘅聲音，佢望吓外面之後向我伸手，「出面就嚟落大雨，我地要快啲返去。」
 
我跟隨佢嘅視線望向天空，原來已經落緊雨。
 
返去嘅時候，希洋拖實我隻手一步一步行。
 




雨愈落愈大，明明平時冇呢種感覺，但今晚燈塔同屋企嘅距離遠咗好多好多，就好似永遠唔會返到一樣。
 
身體漸漸失去氣力，好凍。
 
「我地會唔會返唔到去…。」我瑟縮喺希洋身後問。
 
「唔會，我話過架嘛，就算前面有啲咩，我都會幫你擋。」
 
希洋嘅說話令我安心咗少許。
 
我心裏祈禱，要我乖乖地學咩政治經濟鋼琴都好，我想合埋眼再打開就即刻返到屋企…。
 
經過沿途岩石堆嘅時候，我腳下一滑——失去意識之前聽到嘅係希洋叫我個名。
 
到醒返之後，我已經返咗屋企。




 
卯月一見到就抱實我，發出哽咽聲。
 
「…發生咩事？希洋呢？」望吓隔離張床，唔見希洋。
 
卯月咩都冇講，只係搖頭。
 
之後我問親希洋喺邊，全部人都唔講嘢，只係搖頭。
 
我決定自己去搵，就好似希洋用心靈感應搵我一樣。
 
但係，搵唔到。
 
希洋從此喺世界裏面消失。
 




直到唔知幾時，卯月同我講：「係時候接受現實，希洋已經唔會再返嚟…」
 
「點會，我同佢明明有心靈感應…。」
 
卯月攬住我，不停喺度喊。
 
我都話心靈感應係呃人，如果係真嘅話，點解我搵唔到希洋。
 
唔單止心靈感應，希洋講嘅其他嘢全部都係大話；喺佢已經消失嘅呢個世界裏面，全部變晒呃人嘅說話，變晒唔會成真嘅謊言。