【全劇終】《我喺街執咗個失憶嘅女仔返屋企》: 繁星祭篇：離別之日（六）

我記得小悠講過，送俾大家嘅禮物會偷偷放喺佢地locker，所以我首先去咗呢度搵。
 
透過隙間望入去，塞滿咗半個locker嘅書同廢紙之上，有一個薄薄嘅長方形。
 
…信？
 
我打開locker，拎起因為精緻而格外顯眼嘅杏色信封，反轉背面，只係寫咗三隻字：
 
給阿帆。
 




我認得係小悠嘅手跡。
 
打開信封，裏面係由文字舖成嘅信紙——
 
 
恭喜阿帆！你睇到呢封信，即係你搵啱地方！
 
 
我忍唔住笑，呢句究竟咩開場白嚟…。
 




 
不過，你只係完成咗第一步！因為呢封信唔算係一份禮物，充其量係一個引導你去搵嗰份禮物嘅提示…
 
同埋，一個機會俾我去寫低一啲臨走前想對你講嘅說話。
 
 
我繼續睇落去。
 
 
執筆嘅同時，我望向桌上嘅月曆，原來遇到阿帆之後，已經過咗十個月。




 
呢十個月以嚟，我真係過得好開心，結識到嘅大家都係有趣嘅人，而且都係好人。
 
而將呢一切帶俾我嘅人係你，我有時會諗，如果當初遇到嘅唔係阿帆，而係第二個人，今日嘅我唔知會變成點。
 
我諗你實會覺得就算嗰個人唔係你都冇所謂，不過你就大錯特錯！你好嘅地方比你想像中要多，係真架。雖然平日唔認，但每次你為咗其他人而努力嘅模樣，我都有好好見到，由從前直到而家，到今次嘅繁星祭，我知道你有喺背後付出，真係好多謝你。
 
仲有，多謝你喺我最徬徨、最無助嘅時候出現拯救咗我，帶我踏出去睇呢個世界。
 
作為報答，我預備咗一份禮物俾你，就收埋咗喺我地班間鬼屋裏面。但嚴格嚟講，又唔算係禮物，或者應該話，物歸原主…？
 
你收到之後，可能會嚇一跳吧？
 
然而，你唔需要在意我點樣得返嚟。
 




你只需要知道，呢樣嘢曾經係我一生嘅寶物。不過我覺得而家嘅你，比我更需要佢。
 
同埋，我已經得到另一份更加珍貴嘅禮物。只係當我地唔覺意提起嘅時候，我大概會因為怕醜而同你講唔知放咗去邊，或者整唔見咗…之類嘅說話吧？不過其實我都有一直好好珍惜——嗰幅你送俾我嘅畫，佢將取代過去，成為我往後人生嘅支撑。
 
記唔記得喺聯校宿營嗰陣，我曾經問過你，覺得我地嘅相遇係唔係一個偶然；嗰陣你冇答我，不過而家我可以答，對我嚟講有關阿帆嘅一切，包括嗰份被我放咗喺鬼屋，等待你去取回嘅禮物；抑或係我地相遇嘅夏天，全部全部都係一個奇蹟。
 
最後最後，好慶幸從一開始遇到嘅係你，可以喺你身邊係我最大嘅幸福。
 
——信就此完結。
 
「…呢個蠢才。」我壓抑輕微顫抖嘅聲線，將小悠寫嘅呢封信緊握喺掌心之中。
 
然後二話不說折返回禮堂。
 
好彩嘅係度門未鎖，裏面嘅佈景仲未開始拆，我地用咗滿腔心機完成嘅鬼屋迷宮依然喺度。我由入口跑入去，沿途仔細檢查每一角落，睇吓會唔會有小悠講嘅禮物，可惜一無所獲。




 
「…又唔講清楚啲，叫我點搵。」我低聲說道。
 
時值炎夏，加上禮堂嘅冷氣一早熄晒，額頭早已開始冒汗。
 
我拖住經歷完運動嘅身軀，去到舞台旁邊嘅開關掣，開啟頭頂嘅吊扇，隨即攤喺舞台上稍作休息。
 
鬆開手掌，小悠封信已經被捏皺少許。
 
望住信上面嘅一字一句，我先察覺到自己原來一直違背緊內心最真實嘅想法。
 
我認為小悠搵到夢想，就唔應該俾任何嘢成為佢嘅阻礙。所以我至會選擇將對佢嘅感情埋藏喺心入面。
 
但係，唔應該係咁。所有嘢都係我單方面去認為，我從來冇問過小悠係點諗，冇嘗試去了解過佢諗咩，甚至要喺離別嘅時刻靠住呢封信至得知佢嘅想法。
 




或者從一開始我就製造咗個無謂嘅顧慮出嚟，就算佢要離開呢個地方，要去追尋想做嘅事，講到底其實同我鍾意佢無關。
 
所以，接下來儘管隨心所欲，去正直地將自己嘅想法傳遞——。
 
涼風經由頭頂上嘅吊扇產生，將一張薄薄嘅物體送到我視線範圍內。
 
物體隨風打轉，徐徐飄落。
 
「…紙？」
 
我有預感，呢份就係小悠講嘅禮物。
 
攤開手掌，一張顯得有點陳舊嘅畫紙不偏不倚地落入手心——正確嚟講，係一幅畫。
 
我睜大眼睛，看清畫嘅內容。




 
然後，腦裏憶起不久前同小悠嘅對話——
 
「啲畫係咪對你好重要架？」小悠忽然問咗呢個問題。
 
我諗咗一陣，然後點頭：「…不過，唔見晒都冇辦法，只不過諗住搵返出嚟，時刻提醒自己最初鍾意畫畫嘅心情，就算畫到氣餒，都唔好咁易放棄。」
 
「對阿帆好重要嘅畫…」小悠低語咗一句。
 
「算啦，已經過咗去。」我伸個懶腰。
 
「你一定可以搵返你嘅畫，只要你相信。」望住小悠嗰一雙彷彿映照出遠方嘅瞳孔，有一瞬間我相信佢講嘅嘢會成真。
 
幅畫係我好耐之前畫下，早以為已經整唔見咗嘅過去遺物。
 
而畫紙上，係以稚嫩畫功畫下——一個外表與小悠相似嘅女生；喺佢旁邊嘅係一隻龍貓。