【全劇終】《我喺街執咗個失憶嘅女仔返屋企》: 繁星祭篇：離別之日（一）

結果，我同小悠差唔多十點先離開學校。
 
返到屋企，平時好早瞓嘅阿妹居然未瞓，一問之下（雖然阿妹冇直接承認，但從佢支支吾吾嘅反應中，我推斷）原來佢等緊小悠。
 
啱嘅，小悠聽晚就要走，阿妹想見多佢幾眼都正常。
 
呢一晚，小悠走咗去阿妹間房瞓，我就久違地嘗到一個人霸晒成間房嘅滋味。
 
或者係時候習慣吓，以後都變返一個人。
 




臨瞓前，我喺群組再次提醒大家聽日照計劃行事——喺繁星祭落幕嘅一刻製造停電假象，然後眾人集合向小悠道別，好快得到大家嘅回覆。
 
望住窗外嘅月亮，意識逐漸變得朦朧。
 
一覺醒來，已經係繁星祭嘅早上。
 
食緊阿妹預備嘅早餐同時，先知小悠早早就出咗門口，就連休比同其他行李都帶走埋。（倒不如話，佢本身都冇乜行李可以帶走）
 
搞咩？就算係班級委員，都唔使咁早返學校…。
 




阿妹突然打亂我思緒：「哥。」
 
「嗯？」
 
「我地同小悠會唔會再見？」一向表現得理性嘅阿妹居然會咁樣問，我有啲反應唔來，尤其當初佢對小悠有過保留。
 
「…或者等佢救咗好多龍貓之後，我地會再見？」最後我答。
 
食完早餐，我就返咗學校，班上眾人已經喺禮堂作最後打點。
 




此時此刻，禮堂嘅大家各有各忙，一片熱鬧融和嘅氣氛。望住呢個畫面，我甚至想像唔到今日過後，小悠就唔會再存在喺呢間學校裏面。
 
「帆！」小悠已經披上一身黑袍，喺我面前轉咗個圈，「我叫張廷宇幫我改咗少少件衫，你覺得點呀？」
 
雖然睇唔出改咗啲咩，不過我答：「嗯，好啱你。」
 
「真係出奇，阿帆居然會讚我。」
 
聽佢嘅語氣，佢已經變返平時嘅小悠，我為此鬆一口氣：「…終於變返白悠。」
 
「第二次！」小悠突然指住我。
 
「咩第二次呀？」我撥開佢隻手。
 
「阿帆講白悠呢兩個字，計埋之前運動會嗰排，你一共講過兩次。」




 
我趕快轉移話題：「其他嘢唔見你咁好記性…喂，我個面具呢？」
 
「喺呢度。」小悠向我遞出。
 
我接過之後，將面具戴上：「個面具又幾透氣喎，哈哈…。」
 
「梗係啦，張廷宇話佢俾錢請人特製架。」
 
「咁破費呀…。」果然，班會budget呢樣嘢，要用嘅時候至會覺得少。
 
「嗯，佢話下年繁星祭可以再用，然後畢業嗰陣一定要帶走。」
 
「下年…」呢兩個字又提醒咗我小悠要走。
 




下一年嘅繁星祭，即使我地班又係整鬼屋，都唔會有著住黑袍，戴住白鬼面具，周圍去嚇人嘅小悠。
 
一旦諗到呢度，就好似再控制唔到某種衝動。
 
「小悠，不如你…」我都未將「留喺度」三個字講出口，佢就阻止咗我講落去：
 
「嗯，我知你諗緊咩。」
 
隔住面具，我望到小悠臉上嘅表情。雖然望到，但睇唔透。
 
「既然嚟到最後，就等我地好好享受埋今次嘅繁星祭。」
 
小悠講嘅最後，大概係指佢喺呢間學校裏面度過嘅時間。佢講得啱，我唔可以俾自己無謂嘅感情破壞呢一個最後嘅回憶。
 
「點呀1號同2號你地埋得位未？」走過嚟問嘅係張廷宇，1號2號係我之前幫我同小悠扮嘅兩隻鬼亂改嘅名。




 
「O！K！」小悠爽快答完，就行咗去主舞台嗰邊。
 
「咁你呢？」張廷宇大力扯我面具，啪一聲面具反彈到臉上。
 
「痛…」但多得呢一吓，我得以重新整理好心情。