【全劇終】《我喺街執咗個失憶嘅女仔返屋企》: 繁星祭篇：閃靈現象的真相

「關於閃靈現象…？」
 
幾秒之後，佢點頭：「嗯。」
 
我笑：「明明你而家實實在在咁喺我眼前，但係閃靈現象呢啲咁九唔搭八嘅名詞居然會喺我地口中出現，呢件事本身已經夠不可思議。」
 
奇怪嘅係佢冇跟住笑，只係帶啲認真講：「咁不如，我地就再一次試驗呢個不思議現象。」
 
「好呀，點試？」
 




佢不加思索就回答：「就好似主題公園嗰次咁，你原地數一百下。」
 
我接落去：「然後就開始捉依因？」
 
「嗯。」
 
「好呀，咁嚟啦。」我閉上眼睛，嘴裏開始唸，「100、99、98…」
 
數緊嘅同時，隱約聽到小悠遠去嘅腳步聲。
 




「60、59、58…」
 
「40、39、38…」
 
應該已經走遠喇啩（？）
 
「10、9、8…」
 
倒數完畢，我慢慢睜開雙眼，赫然發現小悠正喺不遠處嘅前方，背對住我緩慢地走。
 




我上前：「搞咩？仲唔匿埋？」
 
我講完之後，佢突然蹲低，將頭埋喺兩膝之間，嘴邊低語：「點解你要數得咁快…。」
 
「…一係我再數過？」
 
佢拼命搖頭。
 
我地靜咗一陣，佢都係維持同樣嘅姿勢，我嘗試去猜測背後原因：「你係咪未食嘢呀？買啲嘢俾你食？」
 
得到嘅答案依然係搖頭。
 
於是，我同樣蹲下，好讓我地嘅視平線高度處於同一水平。
 
「喂。」我再次叫佢。




 
然後，無預警嘅情況下，佢突然抬頭，嘴裏吐出三個字：「對唔住。」
 
細看之下，小悠嘅眼眶有被淚水沾濕過嘅痕跡。
 
但我選擇扮睇唔到，問：「…點解？」
 
佢嘅目光變得游離，一時落喺我身上，一時落喺眼下嘅水泥地。
 
最後，佢嘅目光停咗喺地上嘅某一點：「…我呃咗阿帆。」
 
「…吓？」
 
「由一開始，根本冇閃靈現象，統統都係假嘅。」
 




我呆兩三秒，然後無奈嘆息：「我就知道。」
 
聽完之後佢終於望向我：「…你一早知道？」
 
「呢個世界邊有咁多不思議現象，就好似頭先一路行，我地都冇經歷啲咩怪事一樣。」
 
「…對唔住。」佢再一次道歉。
 
「咁唯一解釋，就係你貪玩啦？」我翹起雙手問。
 
就同之前喺看更度聽到嘅答案一樣，呢條友貪玩到扮鬼嚇人，作個乜鬼嘢閃靈現象出嚟更加唔出奇。
 
「你會唔會嬲我？」小悠問。
 
我嘆道：「倒不如話，鬆一口氣。」




 
我總唔可以承認，自己對個會閃靈嘅不明物體產生感覺，所以知道佢只係個貪玩嘅普通人（？）之後，反倒鬆一口氣。
 
佢耷低頭：「唔應該係咁，一直以嚟…我帶咗太多麻煩俾你。」
 
「你知道就好，第一次見面就俾你搞到入醫院、為咗查你個閃靈現象搞到我幾日冇返學俾羅凱撒抽秤，仲有，一個人喺主題公園遊蕩嗰次都未同你計，所以——」
 
我用手刀喺佢頭頂敲咗一吓。「呢個就係你貪玩嘅懲罰。」
 
「…你明明應該嬲我呃咗你咁耐。」頭先嘅手刀似乎冇減輕到佢嘅愧疚。
 
於是我舉起食指：「我諗到喇，我有樣嘢真係好嬲，就係呢十個月以嚟你白食白住，計落應該爭我屋企冇十萬都有八萬。」
 
小悠似乎聽唔出呢句只係用嚟緩和氣氛嘅玩笑，又或者佢其實知道，但冇去理會。「…我之後會諗辦法還返俾你地，信我。」
 




望住佢愈發失落嘅表情，我開始驚惶失措：「喂喂…！我唔係真係話你爭我錢呀…」
 
「但呢個係冇得改變嘅事實。」
 
「雖然係…不過唉算喇，既然你咁講，我要嬲嘅嘢都已經嬲完。」
 
「…真係咁樣就夠？」
 
「嗯，所以…拜託你，變返做平時嘅小悠好唔好。」
 
小悠別過臉去，良久吐出一句：「多謝你，阿帆。」
 
距離繁星祭，仲有0日。
 
我冇去深究呢一晚小悠嘅坦白究竟代表啲咩，當刻最想做嘅，只有全力去享受聽日嘅繁星祭。然後，迎接離別嘅到來——