【全劇終】《我喺街執咗個失憶嘅女仔返屋企》: 休比篇：運動會（十一）

喺儲物室出嚟之後，我到處尋找小悠嘅蹤影。
 
帶住滿肚疑惑，思考赤城紫悅留低嘅說話究竟蘊含住乜嘢意思。
 
當名為希望嘅曙光再現…
 
「高田帆！」向我揮手嘅係看台上嘅千惠，佢同班上眾人一望到我，就一窩鋒走出嚟迎接。
 
貌似因為剛才跑贏羅凱撒呢件事，眾人反應異常激烈。
 




「我以前真係低估咗你，請受小弟一拜！」
「真係唔敢相信，你真係贏咗羅凱撒。」
 
面對突如其來嘅熱情，我有啲反應唔來：「…邊有你地講得咁誇張，我頭先純粹撞彩。」
 
「咁你又講得啱嘅，5E班靠你真係死得。」千惠一臉得戚同我講，我至發現佢啲金牌掛到成頸都係。
 
「仲好講！一日都係你…」
 
「我？」




 
「…冇嘢喇。」
 
「我地班終於有一年係滿載而歸，好彩有阿飯個妹喺度。」班上唔知邊個講，因為千惠係用阿妹身分出席呢次運動會。
 
「喂！佢唔係我地學校架！」我抗議。
 
「不過佢係你阿妹，咁佢拎到牌即係我地班拎到牌囉。」
 
早知佢地會咁認為，我就唔使跑得咁辛苦…




 
最令我激氣嘅係，只係半日時間千惠就完全融入咗我地班，唔講仲以為我先至係外校生。
 
「喂，你地知唔知小悠喺邊？」一片吵鬧之中，我問。
 
「小悠？好似頭先就唔見咗人。」
「我都唔見呀。」
眾人你一言我一語地回答。
 
又會突然唔知去咗邊。
 
低頭心諗嘅同時，開口嘅係千惠：「小悠嘅話，」
 
我抬頭。
 




「啱啱見到佢同個紫色長髮嘅人一齊去咗看台嘅另一邊。」
 
紫色長髮，赤城紫悅？
 
「我有啲事要行開一吓先。」我求其作個藉口，然後向看台另一邊走去。
 
但千惠叫住我：「喂。」
 
我回頭。
 
「唔係呢邊呀，係嗰邊呀。」佢指住我嘅相反方向。
 
「…你又知我想去邊？」
 
「我係你阿妹嚟架嘛，點會唔知你想去邊呀？」佢一副惡作劇笑容。




 
旁邊人又加把嘴：「呢個阿哥真係一啲霸氣都冇…」
 
「大家都咁覺得嘅話，睇嚟真係一個事實～」
 
我用一種表示「離開呢個運動場之後你就知死」嘅眼神望住講完以上句說話嘅千惠，佢就用同樣嘅眼神回應我。
 
「快啲行啦，一陣小悠又走咗去架喇。」
 
到底佢係點知我想去邊…。
 
不過千惠講得啱，尤其得知小悠居然同赤城紫悅有接觸後。
 
於是我快手快腳趕向千惠所指嘅方向，見到嘅畫面係——