【全劇終】《我喺街執咗個失憶嘅女仔返屋企》: 休比篇：運動會（十）

由頒獎台落嚟後，我得到一塊半隻手掌大嘅金牌。
 
望住塊牌，忽然間好想去搵一個人。
 
正要邁開腳步之際，我被一個老師叫住咗：「喂邊個邊個，同我幫手放返啲物資去儲物室。」
 
我環視一圈，確定佢係叫緊我。
 
「仲唔快啲行？」
 




「…知道。」我硬著頭皮拎起用淨物資，往儲物室方向搬。
 
咪住。
 
我將頸項上嘅獎牌除下，珍而重之地放好。
 
免得一陣刮花。
 
將物資處理好後，我拍拍手：「搞掂。」
 




打開儲物室道門，赫然發現赤城紫悅就企咗喺度。
 
我下意識後退一步。
 
「頭先場比賽，幾精彩。」佢緩緩開口。
 
「…多謝。」我象徵式道謝。
 
「我都話，休比佢好有靈性架啦。」
 




回想剛才，如果我唔係抽到小悠寫嘅物件；又或者佢唔係企喺附近嘅話，我根本唔會贏到。
 
「你講得啱。」我笑。
 
「所以，我嚟呢度係正式同你提出，我要帶走休比。」
 
「帶走休比？」雖然有諗過赤城紫悅嘅目的係休比，但我估唔到佢會猖狂到直接走嚟問我。
 
「係，正確嚟講應該話將休比帶返去佢屬於嘅地方。」
 
「休比屬於嘅地方，即係邊度？」
 
「一個離呢度好遠嘅地方，放心，我唔會要你白白交休比出嚟，你會得到豐厚嘅報酬…就當係答謝你照顧咗休比咁耐。」
 
我吐一口氣：「我講過啦，休比嘅主人唔係我，我都冇權話事。」




 
「咁樣嘅話…」喺赤城紫悅講落去之前，我打斷佢嘅說話：「不過，我代佢主人拒絕你嘅請求。」
 
佢靜咗兩秒，問：「原因？」
 
我回想某天晚上小悠曾經講過嘅一句話。
 
然後直望進赤城紫悅雙眼：「因為休比係一個比親人更重要嘅存在。」
 
——對一片空白嘅小悠嚟講。
 
所以，唔理點樣我都要守護好休比。
 
赤城紫悅低語：「原來係咁。」
 




「嗯，所以你唔使諗住對休比出手。」
 
佢輕輕抬頭：「平時好似咩都唔上心，不過你份人都幾細心。」
 
「…！？？」我頓時語塞。
 
佢冇作任何解釋，轉身就走：「希望今日之後，我地唔會再見。」
 
我叫住佢：「等陣，有啲嘢想問你。」
 
佢停下腳步：「嗯？」
 
關於喺比賽之前，我喺儲物室裏面聽到嘅一句，喺比賽完結嘅呢一刻，我終於有時間理清當中嘅含意。
 
「如果你走嘅話，你主人一定同你一齊走，佢最錫就係你，係咪？」




 
「你可唔可以話俾我聽，小悠到底係咩人？」
 
時間好似忽爾停頓。
 
赤城紫悅以令人不安嘅目光上下打量我一遍：

「最清楚呢樣嘢嘅，從一開始就係你，唔係咩？」

我反駁：「點會呀？我對佢一無所知，甚至…」

佢做咗個安靜手勢，示意我停止講落去。

然後，緩緩說道：
 




「當名為希望嘅曙光再現，你就會明白一切…而家，就暫且悠然度日。」
 
留低呢句充滿問號兼唔知做乜鳩嘅說話，佢就消失喺我眼前。