【全劇終】《我喺街執咗個失憶嘅女仔返屋企》: 休比篇：禁止耍白痴打賭（一）

「小悠做咗啲咩令你覺得佢係小學雞？」阿妹突然認真問。
 
「吓？佢郁啲就扭計同𨂽地。」
 
「咁係咪只要佢唔扭計同唔𨂽地，你就唔會話佢係小學雞？」
 
我反駁：「佢唔止呢兩樣！仲有好多嘢都幼稚到你唔信！」
 
阿妹好似嘆一口氣，然後喺飯枱上放咗一張A3紙同兩支marker筆。
 




佢將marker筆遞俾我：「寫晒出嚟。」
 
「…吓？」我愕然。
 
「我叫你寫晒小悠啲白痴行為出嚟。」
 
小悠突然喺一旁叫囂：「你係咪寫唔出呀？好嘢，今次阿妹都幫我！」
 
「邊個話我寫唔出？！我驚一張A3紙唔夠寫咋！」我只係唔明，阿妹喺度玩咩。
 




於是，我拉阿妹埋一邊問：「你咁認真做咩？求其敷衍吓小悠咪算囉…」
 
阿妹用咗一句頗為高深嘅說話回應：「面對白痴們所提出嘅問題，就要用白痴們信服嘅方法去解決。」
 
我懶係明咁點頭：「哦……咪住！點解要加個們字？！」
 
阿妹行返去飯枱嗰邊：「既然你地各執己見，咁拗落去會沒完沒了，所以我地就將嚟緊呢一日當係決勝關鍵。」
 
「決勝關鍵？」我問完之後，小悠無啦啦對我扮鬼臉。
 




我喺A3紙度寫低「扮鬼臉」三個字。
 
阿妹繼續解釋：「只要小悠喺接下來嘅一日唔做阿哥寫喺A3紙上面嘅行為，就係小悠贏，相反就係阿哥贏。」
 
「即係寫啲咩落去由我話事啦？」我奸笑，只要寫呼吸同心跳，咁咪贏硬囉…
 
「不過我會監督住你寫啲咩落去，有唔合理嘅我會刪走，兼且宣佈小悠獲勝。」
 
「阿妹你真係好聰明呀！」小悠興奮到原地彈跳。
 
我冷笑：「哼，乜你覺得你真係忍到一日咩？」
 
「睇吓點～我驚到時輸得難睇嗰個係阿帆你咋～」
 
「如果你贏到嘅話，我買一箱繽紛樂俾你又點話？」




 
佢聽完，雙眼發光：「你話架！唔好輸咗唔認數！」
 
阿妹拍拍手：「睇嚟雙方都同意今次嘅打賭，咁我加多一個規則，就係無論邊個贏都好，以後都唔可以爭論邊個先係小學雞喇，好唔好？」
 
我有冇睇錯…阿妹望住我同小悠嗰陣，竟然係用一副憐憫嘅眼神…。
 
「嗯！就咁話！」小悠給予雀躍嘅反應。
 
於是，一場賭上我名譽同財產嘅禁止耍白痴大挑戰（呢個係我後來鳩改嘅名）正式展開。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

24小時之內，乙方（高小悠）不能作出以下行為，否則由甲方（高田帆）自動勝出：
 




1.  𨂽地扭計
2. 扮鬼臉
3. 食嘢食到成嘴都係
4. 食嘢食到成地都係
5. we娃鬼叫
6. 到處亂跑亂跳
7. 一有咩事就向阿妹告狀
 8. …諗到再加