【全劇終】《我喺街執咗個失憶嘅女仔返屋企》: 休比篇：爭吵

望吓雪櫃上嘅家務分工表，原來今日到我煮飯，於是我圍起圍裙，將廚房當做接下來個半鐘嘅基地。
 
準備緊食材嗰陣，客廳傳來一陣急促門鐘聲。
 
走到防盜眼前一睇，果然係小悠。
 
但佢嘅表情有啲慌張。
 
諗起放學嗰啖氣仲未吞完，開門之後我眼尾冇望過佢一眼就返入廚房。
 




佢隨即跟埋入嚟，將一支豉油塞到我手上：「你要嘅豉油！」然後又急急腳走咗。
 
我以為佢仲未嬲完，所以偷偷探頭出廳。
 
只見佢一口氣將客廳所有窗簾拉上，然後企喺大門前，捕實個防盜眼。
 
我忍唔住問：「你搞咩？」
 
佢俾咗個安靜手勢我，然後神神秘秘咁講：「阿帆，頭先返嚟嗰陣，我遇到應該係尋晚嗰個跟蹤狂。」
 




我用咗5秒時間去消化呢句說話。
 
確認佢嘅語法冇問題，而自己又冇聽錯以及理解錯之後，
 
我當場爆笑出嚟。
 
「唔好玩啦，你都會遇到跟蹤狂？笑L到我…」
 
佢明顯唔忿氣：「嗰個人真係一直跟喺我後面架！最重要嘅係，佢同阿妹尋日講嘅一樣，都係180！都係著住黑色長褸！」
 




雖然佢講嘅特徵又真係同尋日阿妹講嘅一樣，不過180＋黑色褸通街都係，所以我仍然覺得呢件事嘅可信度<1%
 
「話唔定人地咁啱真係行喺你後面？係你自我意識過剩啫。」
 
「呢樣我有試驗過，發現我停低嗰陣，後面個跟蹤狂都會一齊停低！」
 
「就算呢樣俾你講得通，咁條友點解有阿妹唔跟，要走去跟你先？」
 
「或者，佢睇中我身上帶住好多繽紛樂。」小悠一臉認真咁講。
 
我膠都費事俾，準備返廚房：「呢個世界實係有人會睺住你啲繽紛樂啦…」
 
「阿帆你唔信嘅話！我地聽日一齊放學！到時你就會知道我冇講大話！」
 
「今日我同阿妹咪就係一齊放學，個跟蹤狂可能見我地人多勢眾，所以唔敢出現囉…雖然你俾跟蹤狂睇上呢件事本身就令人難以置信…」




 
「講到尾你都係唔信我！」小悠嬲到𨂽晒地。
 
我無眼睇：「你睇吓你啲行為幼稚到，成個小學雞咁，仲要係初小嗰隻，如果真係有跟蹤狂對你有興趣，一定係個幼女控…」又或者，係一個對白痴有特殊癖好嘅痴線佬。
 
「我、我先唔係小學雞呀！」
 
「只有小學雞先會矢口否認自己係小學雞…」
 
佢鼓起兩泡腮：「咁、如果我證明到自己唔係小學雞，你係咪信有跟蹤狂跟住我！」
 
我翹埋雙手：「係，前提係你證明到先算。」
 
話音剛落，小悠即刻去敲阿妹房門：「阿妹！！！」
 




阿妹開門：「咩事呀？」
 
「你講！我係咪一隻小學雞？」小悠捉起阿妹雙手問。
 
「吓？發生咩事？」阿妹一臉疑惑。
 
我走過去：「唔好問，你只需要誠實作答。」
 
阿妹諗咗兩秒：「以實際年紀嚟講，你唔係；但以行為嚟講，某啲時候你又…」
 
「yeah！聽到未呀！」我發出勝利嘅呼聲。
 
「咩呀！你聽唔聽到呀？阿妹頭先話我唔係呀！」
 
「咩呀！佢明明就暗示緊你係！」




 
嘈到水深火熱之際，阿妹示意我地停止：「有冇人話俾我知，你地到底嘈緊咩…」
 
「小悠聲稱自己遇到尋日嗰個跟蹤狂，你信唔信嘞？」 我解釋。
 
「我咪話咗，尋日有可能只係我錯覺…不過，如果小悠咁講嘅話，都唔可以否認真係有跟蹤狂嘅可能性。」
 
「總之，除非證明到佢唔係一隻小學雞，如果唔係我係唔會信有跟蹤狂盯上佢。」
 
阿妹作思考狀，然後講：「咁好簡單啫，你親自驗證吓咪得囉。」
 
「…親、親自驗證？」