【全劇終】《我喺街執咗個失憶嘅女仔返屋企》: 休比篇：似有還無

話雖如此，為免羅凱撒真係有咩企圖，我叫咗張廷宇去陪小悠。
 
踏出校門嗰陣，天空突然落起一陣驟雨，我擔住把遮，跑去兩個街口之外嘅阿妹學校。
 
阿妹企咗喺校門等我。
 
「對唔住，我遲咗…我地行啦。」我遮埋阿妹。
 
路途上，我問阿妹：「今日喺學校有冇事發生？」
 




佢搖頭：「都係咁，我諗個跟蹤狂唔會明目張膽到潛入學校嘅。」
 
「唔一定架，都係留心啲好，尤其PE堂嗰陣！」啲痴漢最興就係偷沾滿學生妹汗味嘅PE服，一諗到個跟蹤狂拎住阿妹著過嘅衫係咁索係咁索，我就下定決心絕對唔可以俾呢件事發生。
 
「嗯，我知道架喇。」
 
行多兩步，阿妹突然變得警覺，我細聲問：「有發現？」
 
「…我地繼續行，記得扮冇嘢。」阿妹接過我手上嘅遮。
 




到底跟蹤狂嘅真面目係咩，居然大膽到搵阿妹嚟做目標——雖然好想即刻轉身同個跟蹤狂對質，但為免打草驚蛇，就先忍耐一下。
 
突然，有個黑影從後而上，爬咗我同阿妹頭。
 
係一個同我差唔多高，著住黑色大褸嘅男人。
 
個男人一路行一路撳電話，點睇都係平平無奇嘅路人。
 
呢個時候阿妹鬆一口氣：「…睇嚟係我太多心。」
 




「唔係佢？」
 
阿妹搖頭：「尋晚嗰個跟蹤狂，要再高少少。」
 
「睇嚟真正嘅跟蹤狂仲未現身。」
 
「或者尋日真係我誤會咗，嗰個人唔係特登跟住我。」
 
「點都好啦，喺搞清楚件事之前，我會陪你放學。」
 
「…如果你唔得閒嘅話，其實唔使特登過嚟喎。」
 
「我點會唔得閒？全校最得閒就係我。」
 
反正，我又唔識跳高…。




 
「咁…呢段時間，要麻煩你。」
 
我笑：「傻架你？我地兩兄妹嚟架。」
 
之後我地加快腳步，無驚無險返到屋企。
 
放低書包之後，我第一時間搵張廷宇，問佢小悠嘅情況，幾乎立刻收到reply：
 
冇呀，佢同羅凱撒好認真咁練緊跳高，好撚悶呀睇到我就嚟瞓著喇師兄 16:40
 
羅凱撒離佢好近…？ 16:40
 
一問完，張廷宇又係秒回：
 




企咗喺佢隔離指導 16:41
 
我猶疑一陣，最後喺鍵盤上打：
 
…羅凱撒同佢有冇身體接觸？
 
咪住，咁樣問法，張廷宇會唔會以為我喺度呷醋？
 
我即刻del咗行字。
 
都係亂咁回啲嘢，混淆吓視聽好啲。
 
最後，我求其打咗一句：
 
叫小悠返嚟嗰陣幫我買支豉油 16:45